Artikolu 15 Awditjar

1.   Is-sistema ta’ kontroll għall-Programm Euratom 2026-2027 għandha tiżgura bilanċ xieraq bejn il-fiduċja u l-kontroll, filwaqt li tqis il-kostijiet amministrattivi u kostijiet oħra tal-kontrolli fil-livelli kollha, speċjalment għall-benefiċjarji. Ir-regoli tal-awditjar għandhom ikunu ċari, konsistenti u koerenti tul il-Programm Euratom 2026-2027 kollu.

2.   L-azzjonijiet li jirċievu finanzjament konġunt mingħand programmi differenti tal-Unjoni għandhom jiġu awditjati darba biss, b’mod li jkunu koperti l-programmi kollha involuti u r-regoli applikabbli rispettivi tagħhom.

3.   Il-Kummissjoni jew il-korp tal-finanzjament rilevanti jistgħu jistrieħu fuq rieżamijiet ikkombinati tas-sistemi fil-livell tal-benefiċjarji. Dawk ir-rieżamijiet ikkombinati għandhom ikunu fakultattivi għal ċerti tipi ta’ benefiċjarji u għandhom jikkonsistu f’awditjar tas-sistemi u tal-proċessi li jkun ikkomplementat minn awditjar tat-tranżazzjonijiet. Dan l-awditjar tat-tranżazzjonijiet għandu jsir minn awditur indipendenti kompetenti li jkun ikkwalifikat biex iwettaq awditjar statutorju tad-dokumenti tal-kontabbiltà f’konformità mad-Direttiva 2006/43/KE tal-Parlament Ewropew u tal-Kunsill (20). L-awditjar tas-sistema u tal-proċessi jista’ jintuża mill-Kummissjoni jew il-korp ta’ finanzjament rilevanti biex jiddeterminaw l-assigurazzjoni ġenerali tal-ġestjoni finanzjarja soda tan-nefqa u biex jerġa’ jitqies il-livell tal-awditjar ex post u ċ-ċertifikati dwar id-dikjarazzjonijiet finanzjarji.

4.   F’konformità mal-Artikolu 127 tar-Regolament Finanzjarju, il-Kummissjoni jew il-korp tal-finanzjament jistgħu joqgħodu fuq awditjar dwar l-użu tal-kontribuzzjonijiet tal-Komunità li jkun twettaq minn persuni jew entitajiet oħra indipendenti u kompetenti, inkluż oħrajn li ma jkunux tqabbdu mill-istituzzjonijiet jew mill-korpi tal-Unjoni.

5.   L-awditjar jista’ jsir sa sentejn wara l-ħlas tal-bilanċ.

6.   Il-Kummissjoni għandha tippubblika linji gwida tal-awditjar biex tiżgura applikazzjoni u interpretazzjoni affidabbli u uniformi tal-proċeduri u r-regoli tal-awditjar tul id-durata tal-Programm Euratom 2026-2027.