Artikolu 8 Repożitorju tal-valuri ta’ referenza

1.   L-ECHA għandha tistabbilixxi u tiġġestixxi repożitorju tal-valuri ta’ referenza bħala parti mill-pjattaforma komuni tad-data.

2.   Mingħajr dewmien, l-ECHA għandha tinkludi kwalunkwe valur ta’ referenza adottat skont l-atti legali tal-Unjoni elenkati fl-Anness I fir-repożitorju tal-valuri ta’ referenza.

3.   Għall-valuri ta’ referenza mhux adottati skont l-atti legali tal-Unjoni elenkati fl-Anness I, l-Aġenziji li jkollhom jew li jistabbilixxu valuri ta’ referenza bħala parti mill-attivitajiet tagħhom skont l-atti legali tal-Unjoni elenkati fl-Anness I, il-Parti I, jew il-valuri ta’ referenza msemmija fl-Anness II għandhom jagħmlu dawk il-valuri ta’ referenza disponibbli għall-ECHA, mingħajr dewmien, fil-formati standard previsti fl-Artikolu 17, fejn disponibbli, u biex jiġu inkorporati fir-repożitorju tal-valuri ta’ referenza.

4.   Għall-finijiet tal-paragrafu 3, fejn il-valuri ta’ referenza jkunu inklużi f’dossier regolatorju ppreżentat lill-Aġenziji, l-Aġenziji għandhom jikkondividu dawk il-valuri ta’ referenza fil-formati standard mal-ECHA mingħajr dewmien ladarba jkunu tlestew il-valutazzjonijiet rilevanti tal-validità u tal-kunfidenzjalità mill-oriġinatur f’konformità mar-regoli applikabbli.

5.   Mingħajr dewmien, l-ECHA għandha tinkludi fir-repożitorju tal-valuri ta’ referenza kwalunkwe valur ta’ referenza li tqis rilevanti li jiġi ġġenerat bħala parti minn programmi tal-Unjoni, nazzjonali jew internazzjonali jew minn attivitajiet ta’ riċerka u magħmul disponibbli lill-ECHA fil-formati standard kif imsemmi fl-Artikolu 17, fejn tali format standard ikun żviluppat.

6.   L-ECHA għandha tiżgura li d-data li tinsab fir-repożitorju tal-valuri ta’ referenza tista’ tinqara mill-magni.