Artikolu 7 Ittestjar fuq l-annimali

1.   Il-konformità tad-deterġenti u tal-aġenti tensjoattivi ma' dan ir-Regolament għandha tiġi stabbilita bl-użu ta' metodi ta' ttestjar validati fil-livell tal-Unjoni jew fil-livell internazzjonali li ma jinvolvux l-annimali.

2.   Mingħajr preġudizzju għall-Artikolu 1(1), l-introduzzjoni fis-suq ta' deterġenti u ta' aġenti tensjoattivi li għalihom il-formulazzjoni finali jew l-ingredjenti jew it-taħlitiet tal-ingredjenti kienu l-objettiv tal-ittestjar fuq l-annimali bil-ħsieb li jiġu ssodisfati r-rekwiżiti ta' dan ir-Regolament għandha tkun projbita.

3.   Il-paragrafi 1 u 2 għandhom ikunu applikabbli mingħajr preġudizzju għal-liġi rilevanti tal-Unjoni u ma għandhomx jipprevjenu l-użu ta' data miksuba qabel it-22 ta’ Marzu 2026.

4.   F'ċirkostanzi eċċezzjonali, meta jinqala' tħassib fir-rigward tas-sikurezza ta' ingredjent f'deterġent jew f'aġent tensjoattiv, il-Kummissjoni tista' tadotta deċiżjoni ta' implimentazzjoni li tagħti deroga mill-paragrafi 1 u 2, fuq inizjattiva tagħha stess jew abbażi ta' talba motivata minn operatur ekonomiku jew minn Stat Membru.

5.   Meta l-Kummissjoni taġixxi abbażi ta' talba motivata minn operatur ekonomiku jew Stat Membru, kif imsemmi fil-paragrafu 4, dik it-talba għandha tinkludi evalwazzjoni tas-sitwazzjoni u tindika l-miżuri meħtieġa. Fuq dik il-bażi, il-Kummissjoni tista' tikkonsulta liċ-Ċentru Ewropew għall-Validazzjoni ta' Metodi Alternattivi (ECVAM).

6.   Deċiżjoni li tagħti deroga, kif imsemmi fil-paragrafu 4, għandha tistabbilixxi l-kundizzjonijiet assoċjati ma' dik id-deroga f'termini ta' għanijiet speċifiċi, it-tul taż-żmien u r-rappurtar tar-riżultati. Deroga għandha tingħata biss meta:

Il-Kummissjoni għandha tindirizza d-deċiżjoni tagħha li tagħti deroga lill-Istati Membri kollha u għandha tikkomunikaha minnufih lilhom u lill-operaturi ekonomiċi rilevanti.