Artikolu 26 Proċedura fil-livell nazzjonali għas-sorveljanza tas-suq tad-deterġenti u l-aġenti tensjoattivi

1.   L-awtoritajiet tas-sorveljanza tas-suq ta' Stat Membru jistgħu jwettqu evalwazzjoni fir-rigward ta' deterġent jew aġent tensjoattiv, li tkopri r-rekwiżiti stabbiliti f'dan ir-Regolament. Meta jkun hemm raġuni biex wieħed jemmen li deterġent jew aġent tensjoattiv joħloq riskju għas-saħħa tal-bniedem jew għall-ambjent, l-awtoritajiet tas-sorveljanza tas-suq għandhom iwettqu dik l-evalwazzjoni. L-operaturi ekonomiċi rilevanti għandhom jikkooperaw mal-awtoritajiet tas-sorveljanza tas-suq.

2.   Meta jwettqu t-testijiet għall-fini tal-evalwazzjoni msemmija fil-paragrafu 1, l-awtoritajiet tas-sorveljanza tas-suq għandhom jużaw il-metodi ta' referenza li jinsabu fl-Annessi, kif applikabbli.

3.   Meta, matul l-evalwazzjoni msemmija fil-paragrafu 1, l-awtoritajiet tas-sorveljanza tas-suq isibu li d-deterġent jew l-aġent tensjoattiv ma jikkonformax mar-rekwiżiti stabbiliti f'dan ir-Regolament, għandhom jitolbu, mingħajr dewmien, li l-operatur ekonomiku rilevanti jieħu l-azzjoni korrettiva xierqa kollha biex id-deterġent jew l-aġent tensjoattiv jinġieb konformi ma' dawk ir-rekwiżiti, jiġi rtirat mis-suq, jew jissejjaħ lura f'perjodu raġonevoli stabbilit mill-awtoritajiet tas-sorveljanza tas-suq u li jkun proporzjonat man-natura tar-riskju msemmi fil-paragrafu 1.

4.   Meta awtorità tas-sorveljanza tas-suq tqis li n-nuqqas ta' konformità ma jkunx limitat għat-territorju nazzjonali tagħha, hija għandha tinforma lill-Kummissjoni u lill-awtoritajiet tas-sorveljanza tas-suq tal-Istati Membri l-oħra bir-riżultati tal-evalwazzjoni u bl-azzjoni korrettiva li tkun talbet lill-operatur ekonomiku jieħu.

5.   L-operatur ekonomiku għandu jiżgura li tittieħed l-azzjoni korrettiva xierqa kollha fir-rigward tad-deterġenti jew l-aġenti tensjoattivi kkonċernati kollha li jkun qiegħed fis-suq fl-Unjoni.

6.   Meta l-operatur ekonomiku ma jiħux azzjoni korrettiva fil-perjodu ta' żmien imsemmi fil-paragrafu 3, l-awtoritajiet tas-sorveljanza tas-suq għandhom jieħdu l-miżuri proviżorji xierqa kollha biex jipprojbixxu jew jirrestrinġu t-tqegħid tad-deterġent jew l-aġent tensjoattiv fis-suq nazzjonali tagħhom, biex jirtirawh minn dak is-suq jew biex isejħuh lura.

L-awtoritajiet tas-sorveljanza tas-suq għandhom jinfurmaw lill-Kummissjoni u lill-awtoritajiet tas-sorveljanza tas-suq tal-Istati Membri l-oħra, mingħajr dewmien, bi kwalunkwe miżura li jieħdu skont l-ewwel subparagrafu. Dik l-informazzjoni għandha tinkludi d-dettalji disponibbli kollha, partikolarment id-data neċessarja għall-identifikazzjoni tad-deterġent jew l-aġent tensjoattiv li mhux konformi, l-oriġini ta’ dak id-deterġent jew l-aġent tensjoattiv, in-natura tal-allegat nuqqas ta' konformità u r-riskju involut, in-natura u d-durata tal-miżuri meħuda u l-argumenti mressqa mill-operatur ekonomiku rilevanti.

7.   L-awtoritajiet tas-sorveljanza tas-suq tal-Istati Membri għajr l-Istat Membru li jibda l-proċedura skont dan l-Artikolu għandhom jinfurmaw mingħajr dewmien lill-Kummissjoni u lill-awtoritajiet tas-sorveljanza tas-suq tal-Istati Membri l-oħra bi kwalunkwe miżura adottata u bi kwalunkwe informazzjoni addizzjonali għad-dispożizzjoni tagħhom relatata man-nuqqas ta' konformità tad-deterġent jew l-aġent tensjoattiv ikkonċernat u, fil-każ ta' nuqqas ta' qbil ma' dawk il-miżuri, bl-oġġezzjonijiet tagħhom.

8.   Meta, fi żmien tliet xhur minn meta tasal l-informazzjoni msemmija fil-paragrafu 6, it-tieni subparagrafu, ma tkun tqajmet l-ebda oġġezzjoni la minn awtorità tas-sorveljanza tas-suq u lanqas mill-Kummissjoni fir-rigward ta' miżura proviżorja meħuda minn Stat Membru, dik il-miżura għandha titqies bħala ġustifikata.

9.   L-awtoritajiet tas-sorveljanza tas-suq għandhom jiżguraw li jittieħdu mingħajr dewmien miżuri restrittivi proviżorji xierqa, bħall-irtirar mis-suq tad-deterġent jew l-aġent tensjoattiv, fir-rigward tad-deterġent jew l-aġent tensjoattiv ikkonċernat.

10.   Għall-finijiet tal-paragrafi 4, 6, 7 u 8 ta' dan l-Artikolu, l-awtoritajiet tas-sorveljanza tas-suq għandhom idaħħlu l-informazzjoni fis-sistema ta' informazzjoni u komunikazzjoni msemmija fl-Artikolu 34(1) tar-Regolament (UE) 2019/1020.