Airteagal 26 Nós imeachta ar an leibhéal náisiúnta maidir le faireachas margaidh ar ghlantaigh agus ar dhromchlaghníomhaithe

1.   Féadfaidh údaráis faireachais margaidh Ballstáit meastóireacht a dhéanamh i ndáil le glantach nó dromchlaghníomhaí, lena gcumhdófar na ceanglais a leagtar síos sa Rialachán seo. I gcás ina bhfuil cúis lena chreidiúint go bhfuil riosca do shláinte an duine nó don chomhshaol ag baint le glantach nó le dromchlaghníomhaí, déanfaidh na húdaráis faireachais margaidh an mheastóireacht sin. Comhoibreoidh na hoibreoirí eacnamaíocha ábhartha leis na húdaráis faireachais margaidh.

2.   Agus tástálacha á ndéanamh acu chun críche na meastóireachta dá dtagraítear i mír 1, úsáidfidh na húdaráis faireachais margaidh na modhanna tagartha a leagtar amach sna hIarscríbhinní, de réir mar is infheidhme.

3.   Más rud é, le linn na meastóireachta dá dtagraítear i mír 1, go gcinnfidh na húdaráis faireachais margaidh, nach gcomhlíonann an glantach nó an dromchlaghníomhaí na ceanglais a leagtar síos sa Rialachán seo, ceanglóidh siad gan mhoill ar an oibreoir eacnamaíoch ábhartha gach gníomhaíocht cheartaitheach iomchuí a dhéanamh chun an glantach nó an dromchlaghníomhaí a thabhairt chun comhréireachta leis na ceanglais sin, iad a tharraingt siar ón margadh, nó iad a aisghairm laistigh de thréimhse réasúnta, tréimhse a leagfaidh na húdaráis faireachais margaidh síos agus a bheidh i gcomhréir leis an gcineál riosca dá dtagraítear i mír 1.

4.   I gcás ina measann údarás faireachais margaidh nach bhfuil an neamhchomhlíonadh srianta dá chríoch náisiúnta, cuirfidh sé an Coimisiún agus údaráis faireachais margaidh na mBallstát eile ar an eolas faoi thorthaí na meastóireachta agus faoin ngníomhaíocht cheartaitheach a d’éiligh sé ar an oibreoir eacnamaíoch a dhéanamh.

5.   Áiritheoidh an t-oibreoir eacnamaíoch go ndéanfar an ghníomhaíocht cheartaitheach iomchuí uile i leith na nglantach nó na ndromchlaghníomhaithe uile lena mbaineann a bheidh curtha ar fáil aige ar an margadh san Aontas.

6.   I gcás nach ndéanfaidh an t-oibreoir eacnamaíoch ábhartha gníomhaíocht cheartaitheach laistigh den tréimhse dá dtagraítear i mír 3, déanfaidh na húdaráis faireachais margaidh na bearta sealadacha iomchuí uile chun toirmeasc nó srian a chur ar an nglantach nó an dromchlaghníomhaí a chur ar a margadh náisiúnta, chun é a aistarraingt ón margadh nó chun é a aisghairm.

Cuirfidh na húdaráis faireachais margaidh an Coimisiún agus údaráis faireachais margaidh na mBallstát eile ar an eolas, gan mhoill, i dtaobh aon bhearta a dhéanfaidh siad faoin gcéad fhomhír. Leis an bhfaisnéis sin, áireofar na sonraí uile atá ar fáil, go háirithe na sonraí sin is gá chun an glantach nó an dromchlaghníomhaí neamhchomhlíontach a shainaithint, tionscnamh an ghlantaigh nó an dromchlaghníomhaí sin, cineál an neamhchomhlíonta atá á líomhain, an riosca atá i gceist, maille le cineál agus fad na mbeart a rinneadh agus na hargóintí a léirigh an t-oibreoir eacnamaíoch ábhartha.

7.   Údaráis faireachais margaidh na mBallstát, seachas an Ballstát a chuir tús leis an nós imeachta faoin Airteagal seo, cuirfidh siad an Coimisiún agus údaráis faireachais margaidh na mBallstát eile ar an eolas faoi aon bhearta a glacadh nó faoi aon fhaisnéis bhreise a bheidh acu i dtaobh neamhchomhlíonadh an ghlantaigh nó an dromchlaghníomhaí lena mbaineann agus i gcás nach n-aontóidh siad leis na bearta sin, cuirfidh siad a gcuid agóidí in iúl freisin.

8.   Más rud é, laistigh de 3 mhí ón bhfaisnéis dá dtagraítear sa dara fomhír de mhír 6 a fháil, nach ndéanann údarás faireachais margaidh ná an Coimisiún agóid in aghaidh beart sealadach a dhéanann Ballstát, measfar go bhfuil údar leis an mbeart sin.

9.   Áiritheoidh na húdaráis faireachais margaidh go ndéanfar bearta sriantacha sealadacha iomchuí, mar shampla an glantach nó an dromchlaghníomhaí a tharraingt siar ón margadh, i leith an ghlantaigh nó an dromchlaghníomhaí lena mbaineann gan mhoill.

10.   Chun críocha mhíreanna 4, 6, 7 agus 8 den Airteagal seo, cuirfidh na húdaráis faireachais margaidh an fhaisnéis isteach sa chóras faisnéise agus cumarsáide dá dtagraítear in Airteagal 34(1) de Rialachán (AE) 2019/1020.