Artikolu 3 Ordnijiet ta’ tneħħija

1.   L-awtorità kompetenti ta’ kull Stat Membru għandu jkollha s-setgħa li toħroġ ordni ta’ tneħħija li tirrikjedi lill-fornituri ta’ servizzi ta’ hosting ineħħu kontenut terroristiku jew jiddiżattivaw l-aċċess għall-kontenut terroristiku fl-Istati Membri kollha.

2.   Fejn awtorità kompetenti ma tkunx ħarġet preċedentement ordni ta’ tneħħija lil fornitur ta’ servizzi ta’ hosting, hija għandha tipprovdi lil dak il-fornitur ta’ servizzi ta’ hosting informazzjoni dwar il-proċeduri applikabbli u l-iskadenzi applikabbli, tal-inqas 12-il siegħa qabel ma toħroġ l-ordni ta’ tneħħija.

L-ewwel subparagrafu ma għandux japplika f’każijiet ta’ emerġenza debitament ġustifikati.

3.   Il-fornituri ta’ servizzi ta’ hosting għandhom ineħħu kontenut terroristiku jew jiddiżattivaw l-aċċess għall-kontenut terroristiku fl-Istati Membri kollha mill-aktar fis possibbli u fi kwalunkwe każ fi żmien siegħa minn meta jirċievu l-ordni ta’ tneħħija.

4.   L-awtoritajiet kompetenti għandhom joħorġu ordnijiet ta’ tneħħija permezz tal-mudell stabbilit fl-Anness I. L-ordnijiet ta’ tneħħija għandu jkun fihom l-elementi li ġejjin:

5.   L-awtorità kompetenti għandha tindirizza l-ordni ta’ tneħħija lill-istabbiliment prinċipali tal-fornitur ta’ servizzi ta’ hosting jew lir-rappreżentant legali tiegħu maħtur skont l-Artikolu 17.

Dik l-awtorità kompetenti għandha tibgħat l-ordni ta’ tneħħija lill-punt ta’ kuntatt imsemmi fl-Artikolu 15(1) b’mezz elettroniku li jkun kapaċi jipproduċi rekord bil-miktub taħt kondizzjonijiet li jippermettu li tiġi stabbilita l-awtentikazzjoni tal-mittent, inkluża l-akkuratezza tad-data u l-ħin meta ntbagħtet u meta tasal l-ordni.

6.   Il-fornitur ta’ servizzi ta’ hosting għandu, mingħajr dewmien żejjed, jinforma lill-awtorità kompetenti, billi juża l-mudell li jinsab fl-Anness II, dwar it-tneħħija tal-kontenut terroristiku jew id-diżattivazzjoni tal-aċċess għall-kontenut terroristiku fl-Istati Membri kollha, filwaqt li jindika, b’mod partikolari, il-ħin ta’ dik it-tneħħija jew ta’ dik id-diżattivazzjoni.

7.   Jekk il-fornitur ta’ servizzi ta’ hosting ma jkunx jista’ jikkonforma mal-ordni ta’ tneħħija għal raġunijiet ta’ force majeure jew ta’ impossibbiltà de facto li ma jkunux attribwibbli lill-fornitur ta’ servizzi ta’ hosting, inkluż għal raġunijiet tekniċi jew operazzjonali oġġettivament ġustifikabbli, huwa għandu, mingħajr dewmien żejjed, jinforma lill-awtorità kompetenti li ħarġet l-ordni ta’ tneħħija dwar dawk ir-raġunijiet, billi juża l-mudell li jinsab fl-Anness III.

L-iskadenza stipulata fil-paragrafu 3 għandha tibda tiddekorri hekk kif ir-raġunijiet imsemmija fl-ewwel subparagrafu ta’ dan il-paragrafu ma jkunux jeżistu iżjed.

8.   Jekk il-fornitur ta’ servizzi ta’ hosting ma jkunx jista’ jikkonforma mal-ordni ta’ tneħħija minħabba li jkun hemm fiha żbalji evidenti jew ma jkunx hemm fiha biżżejjed informazzjoni biex tiġi eżegwita, huwa għandu, mingħajr dewmien żejjed, jinforma lill-awtorità kompetenti li ħarġet l-ordni ta’ tneħħija u jitlob il-kjarifika meħtieġa, billi juża l-mudell li jinsab fl-Anness III.

L-iskadenza stipulata fil-paragrafu 3 għandha tibda tiddekorri hekk kif il-fornitur ta’ servizzi ta’ hosting ikun irċieva l-kjarifika meħtieġa.

9.   Ordni ta’ tneħħija għandha ssir finali malli tiskadi l-iskadenza għal appell fejn ma jkun ġie mressaq ebda appell skont il-liġi nazzjonali jew malli tiġi kkonfermata wara appell.

Malli l-ordni ta’ tneħħija ssir finali, l-awtorità kompetenti li tkun ħarġet l-ordni ta’ tneħħija għandha tinforma lill-awtorità kompetenti msemmija fil-punt (c) tal-Artikolu 12(1) tal-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit b’dak il-fatt.