Artikolu 4 Proċedura għal ordnijiet ta’ tneħħija transfruntiera

1.   Soġġett għall-Artikolu 3, fejn il-fornitur ta’ servizzi ta’ hosting ma jkollux l-istabbiliment prinċipali jew ir-rappreżentant legali tiegħu fl-Istat Membru tal-awtorità kompetenti li ħarġet l-ordni ta’ tneħħija, dik l-awtorità għandha, simultanjament, tippreżenta kopja tal-ordni ta’ tneħħija lill-awtorità kompetenti tal-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit.

2.   Fejn fornitur ta’ servizzi ta’ hosting jirċievi ordni ta’ tneħħija kif imsemmi f’dan l-Artikolu, huwa għandu jieħu l-miżuri previsti fl-Artikolu 3 u jieħu l-miżuri meħtieġa biex ikun jista’ jerġa’ jdaħħal il-kontenut jew jerġa’ jippermetti l-aċċess għalih, f’konformità mal-paragrafu 7 ta’ dan l-Artikolu.

3.   L-awtorità kompetenti tal-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit tista’, fuq l-inizjattiva tagħha stess, fi żmien 72 siegħa minn meta tirċievi l-kopja tal-ordni ta’ tneħħija skont il-paragrafu 1, tiskrutinizza l-ordni ta’ tneħħija biex tiddetermina jekk din tiksirx serjament jew manifestament dan ir-Regolament jew id-drittijiet u l-libertajiet fundamentali ggarantiti mill-Karta.

Fejn issib li hemm ksur, hija għandha, fl-istess żmien, tadotta deċiżjoni motivata f’dak is-sens.

4.   Il-fornituri ta’ servizzi ta’ hosting u l-fornituri ta’ kontenut għandhom id-dritt li jippreżentaw, fi żmien 48 siegħa minn meta jirċievu ordni ta’ tneħħija jew informazzjoni skont l-Artikolu 11(2), talba motivata lill-awtorità kompetenti tal-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit biex tiskrutinizza l-ordni ta’ tneħħija kif imsemmi fl-ewwel subparagrafu tal-paragrafu 3 ta’ dan l-Artikolu.

L-awtorità kompetenti għandha, fi żmien 72 siegħa minn meta tirċievi t-talba, tadotta deċiżjoni motivata wara l-iskrutinju minnha tal-ordni ta’ tneħħija, li tistabbilixxi s-sejbiet tagħha dwar jekk hemmx ksur.

5.   L-awtorità kompetenti għandha, qabel ma tadotta deċiżjoni skont t-tieni subparagrafu tal-paragrafu 3 jew deċiżjoni li tiddetermina li hemm ksur taħt it-tieni subparagrafu tal-paragrafu 4, tinforma lill-awtorità kompetenti li ħarġet l-ordni ta’ tneħħija bl-intenzjoni tagħha li tadotta d-deċiżjoni u bir-raġunijiet tagħha għal dan.

6.   Fejn l-awtorità kompetenti tal-Istat Membru fejn il-fornitur ta’ servizzi ta’ hosting ikollu l-istabbiliment prinċipali tiegħu jew fejn ir-rappreżentant legali tiegħu jirrisjedi jew ikun stabbilit tadotta deċiżjoni motivata taħt il-paragrafu 3 jew 4 ta’ dan l-Artikolu, hija għandha, mingħajr dewmien, tikkomunika dik id-deċiżjoni lill-awtorità kompetenti li ħarġet l-ordni ta’ tneħħija, lill-fornitur ta’ servizzi ta’ hosting, lill-fornitur ta’ kontenut li talab l-iskrutinju taħt il-paragrafu 4 ta’ dan l-Artikolu u, f’konformità mal-Artikolu 14, lill-Europol. Fejn id-deċiżjoni ssib ksur taħt il-paragrafu 3 jew 4 ta’ dan l-Artikolu, l-ordni ta’ tneħħija ma jibqax ikollha effetti legali.

7.   Malli jirċievi deċiżjoni li tiddetermina li hemm ksur ikkomunikata f’konformità mal-paragrafu 6, il-fornitur ta’ servizzi ta’ hosting ikkonċernat għandu immedjatament jerġa’ jdaħħal il-kontenut jew jerġa’ jippermetti l-aċċess għalih, mingħajr preġudizzju għall-possibbiltà li jiġu infurzati t-termini u l-kondizzjonijiet tiegħu f’konformità mal-liġi tal-Unjoni u ma’ dik nazzjonali.