ANNESS VI PASSAPORT DIĠITALI TAL-PRODOTT

(a)

l-isem kummerċjali, l-identifikatur uniku tal-prodott tad-deterġent jew tal-aġent tensjoattiv għall-utenti finali u immaġni bil-kulur tal-imballaġġ jew tat-tikketta tal-mudell tad-deterġent jew tal-aġent tensjoattiv għall-utenti finali b'ċarezza suffiċjenti li tippermetti l-identifikazzjoni tiegħu;

(b)

l-isem, l-indirizz postali u dak elettroniku u n-numru tat-telefown tal-manifattur u, fejn applikabbli, tal-importatur jew tar-rappreżentant awtorizzat, kif ukoll l-identifikatur uniku tal-operatur tal-manifattur;

(c)

ir-referenza għall-fornitur tas-servizzi tal-passaport diġitali tal-prodott li jospita l-kopja ta' riżerva tal-passaport diġitali tal-prodotti:

(d)

l-identifikazzjoni tad-deterġent jew tal-aġent tensjoattiv għall-utenti finali li tippermetti t-traċċabbiltà;

(e)

indikazzjoni li l-passaport diġitali tal-prodott qed jinħareġ taħt ir-responsabbiltà unika tal-manifattur;

(f)

meta applikabbli, il-kodiċijiet tal-komodità kif stabbiliti fl-Anness I tar-Regolament (KEE) Nru 2658/87 li taħtu jiġi kklassifikat id-deterġent jew l-aġent tensjoattiv għall-utenti finali fil-mument li jinħoloq il-passaport diġitali tal-prodott;

(g)

dikjarazzjoni li l-konformità tad-deterġent jew tal-aġent tensjoattiv għall-utenti finali ma' dan ir-Regolament ġiet murija, u, fejn rilevanti, referenzi għal liġi oħra tal-Unjoni li magħha jikkonforma d-deterġent jew l-aġent tensjoattiv għall-utenti finali;

(h)

lista sħiħa ta' sustanzi miżjuda intenzjonalment fid-deterġent jew l-aġent tensjoattiv, identifikati f'konformità mal-Artikolu 18(3) tar-Regolament (KE) Nru 1272/2008; il-preservattivi ta' trasferiment għandhom jiġu elenkati wkoll jekk iridu jiġu inklużi fit-tikketta f'konformità mal-Artikolu 18(3), il-punt (b), tar-Regolament (KE) Nru 1272/2008, l-Artikolu 58 tar-Regolament (UE) Nru 528/2012 jew il-Parti A, il-punt 1(h)(iii), tal-Anness V ta' dan ir-Regolament;

(i)

il-lista tal-mikroorganiżmi kollha miżjuda intenzjonalment li jipprovdu l-klassifikazzjoni tassonomika tagħhom (il-ġeneru, l-ispeċi u l-isem jew il-kodiċi tar-razza).