REGOLAMENT (UE) 2026/405 TAL-PARLAMENT EWROPEW U TAL-KUNSILL tal-11 ta’ Frar 2026 dwar deterġenti u aġenti tensjoattivi, u li jħassar ir-Regolament (KE) Nru 648/2004 (Test b'rilevanza għaż-ŻEE)

(1)

Il-kundizzjonijiet għall-introduzzjoni fis-suq, u għat-tqegħid fis-suq, ta' deterġenti u aġenti tensjoattivi għad-deterġenti ġew armonizzati permezz tar-Regolament (KE) Nru 648/2004 tal-Parlament Ewropew u tal-Kunsill (3). Dak ir-Regolament jistipula r-rekwiżiti relatati mal-bijodegrabbiltà tal-aġenti tensjoattivi, ir-restrizzjonijiet jew il-projbizzjonijiet fuq l-aġenti tensjoattivi għal raġunijiet ta' bijodegrabbiltà, il-limitazzjoni fuq il-kontenut tal-fosfati u ta' komposti oħra tal-fosforu fid-deterġent tal-ħasil tal-ħwejjeġ għall-konsumaturi u fid-deterġent tal-magni tal-ħasil tal-platti awtomatiċi għall-konsumaturi, l-informazzjoni li l-manifatturi għandhom iżommu għad-disponibbiltà tal-awtoritajiet kompetenti tal-Istati Membri u għall-persunal mediku, u r-regoli dwar it-tikkettar tad-deterġenti, inkluż fir-rigward tal-fwejjaħ allerġeniċi.

(2)

L-evalwazzjoni tal-Kummissjoni tar-Regolament (KE) Nru 648/2004 kkonkludiet li dak ir-Regolament laħaq il-biċċa l-kbira tal-objettivi tiegħu. Madankollu, dik l-evalwazzjoni identifikat ukoll għadd ta' dgħufijiet u oqsma għal aktar titjib. F'dawn l-aħħar snin, il-qafas regolatorju għas-sustanzi kimiċi nbidel radikalment, u ħoloq duplikazzjonijiet u nuqqas ta' koerenza fir-regoli applikabbli għad-deterġenti u b'mod partikolari r-rekwiżiti ta' informazzjoni rilevanti. Għalhekk hemm bżonn li tiġi żgurata l-konsistenza u jiġu eliminati r-rekwiżiti ta' informazzjoni duplikati.

(3)

Ċerti żviluppi ġodda fis-suq, b'mod partikolari l-iżvilupp ta' deterġenti li fihom mikroorganiżmi u l-bejgħ tar-rikariki ta' deterġenti, jew mhuma koperti xejn mir-Regolament (KE) Nru 648/2004 jew huma koperti parzjalment. Barra minn hekk, l-għadd ta' prodotti offruti għall-bejgħ fuq l-Internet qed jiżdied u bejgħ online bħal dan joħloq problemi ta' infurzar f'sitwazzjonijiet fejn la hemm manifattur stabbilit fl-Unjoni u lanqas importatur. Min-naħa l-oħra, id-diġitalizzazzjoni toffri opportunitajiet għas-simplifikazzjoni, għat-tnaqqis tal-piżijiet u għaż-żieda fil-faċilità tal-użu u l-fehim tal-informazzjoni dwar is-sikurezza u l-użu li bħalissa huma mixtieqa. Għalhekk huwa meħtieġ li jitqiesu l-prodotti u l-prattiki ġodda u jiżdiedu l-isforzi ta' diġitalizzazzjoni f'konformità mal-objettivi ġenerali tal-Unjoni, speċjalment f'termini ta' sostenibbiltà u t-tranżizzjoni ekoloġika u dik diġitali. Barra minn hekk, il-bejgħ tar-rikariki jenħtieġ li jiġi inkoraġġut bħala miżura speċifika għall-prevenzjoni tal-iskart meħtieġa biex jintlaħqu l-miri tal-użu mill-ġdid u tar-rikarika, f'konformità mal-Patt Ekoloġiku Ewropew li jinsab fil-komunikazzjoni tal-Kummissjoni tal-11 ta' Diċembru 2019, u l-Pjan ta' Azzjoni l-ġdid dwar l-Ekonomija Ċirkolari għal Ewropa aktar nadifa u kompetittiva, li jinsab fil-komunikazzjoni tal-Kummissjoni tal-11 ta' Marzu 2020. Sabiex it-tranżizzjoni tal-Unjoni timxi aktar lejn ekonomija ċirkolari, jenħtieġ li l-użu mill-ġdid u l-mili mill-ġdid tal-imballaġġ jiġu inkoraġġuti u promossi. L-operaturi ekonomiċi jenħtieġ li jagħmlu ħilithom ukoll biex iqiegħdu d-deterġenti fis-suq għall-konsumaturi f'forom oħra ta' bejgħ sostenibbli, pereżempju fl-imballaġġ riċiklabbli li jippermetti lill-konsumaturi jerġgħu jimlew l-imballaġġ xieraq id-dar, filwaqt li jiżguraw is-sikurezza tal-konsumaturi.

(4)

Il-Kontroll tal-Idoneità tal-aktar leġiżlazzjoni rilevanti dwar is-sustanzi kimiċi, li ma nkludiex ir-Regolament (KE) Nru 1907/2006 tal-Parlament Ewropew u tal-Kunsill (4), issottolinja l-kumplessità tal-qafas regolatorju tal-Unjoni għas-sustanzi kimiċi u attribwixxa dik il-kumplessità għall-għadd kbir ta' atti legali interkonnessi li huma speċifiċi għall-prodott u speċifiċi għas-settur. Il-Kontroll tal-Idoneità indika li l-problemi ta' infurzar huma rrapportati mill-awtoritajiet tas-sorveljanza tas-suq dwar prodotti li jidħlu fl-Unjoni minn pajjiżi terzi permezz ta' bejgħ online. Indika wkoll li hemm lok għal simplifikazzjoni fil-komunikazzjoni tal-informazzjoni permezz ta' tikketti lill-utenti tal-prodotti u sab li bħalissa mhux qed jittieħed gwadann mill-użu ta' għodod innovattivi għall-komunikazzjoni tal-informazzjoni dwar il-prodott. Għalhekk hemm bżonn li r-regoli attwali jiġu ssimplifikati sabiex jitnaqqas il-piż fuq l-operaturi ekonomiċi, jitjieb il-fehim tal-konsumatur u tiġi ffaċilitata s-sorveljanza tas-suq. Għalhekk, jenħtieġ li r-Regolament (KE) Nru 648/2004 jiġi sostitwit.

(5)

Id-Deċiżjoni Nru 768/2008/KE tal-Parlament Ewropew u tal-Kunsill (5) tistabbilixxi l-prinċipji komuni u d-dispożizzjonijiet ta' referenza maħsuba biex japplikaw fil-leġiżlazzjoni settorjali kollha sabiex jipprovdu bażi koerenti għal reviżjoni ta' dik il-leġiżlazzjoni. Il-qafas legali l-ġdid għad-deterġenti u għall-aġenti tensjoattivi jenħtieġ li jiġi allinjat sa fejn ikun possibbli ma' dawk il-prinċipji komuni u d-dispożizzjonijiet ta' referenza.

(6)

Sabiex jiġu żgurati ċ-ċertezza legali u kundizzjonijiet ekwivalenti ta' kompetizzjoni għall-operaturi ekonomiċi, jenħtieġ li d-definizzjoni eżistenti ta' “deterġent” tiġi estiża biex tkopri d-deterġenti li għadhom kif ġew żviluppati li fihom mikroorganiżmi miżjuda intenzjonalment. Jenħtieġ li dik id-definizzjoni tkopri wkoll prodotti li jappoġġaw il-proċess tat-tindif meta jintużaw flimkien ma' deterġent tal-ħasil tal-ħwejjeġ jew ma' deterġent tal-magni tal-ħasil tal-platti awtomatiċi, kif ukoll prodotti li jimmodifikaw ir-riħa tad-drapp, minħabba r-rwol anċillari li dawk il-prodotti għandhom biex jaqdu l-funzjoni ta' tindif. Ir-referenzi għal superfiċje jinkludu wċuh il-frott u l-ħxejjex.

(7)

Peress li l-aġenti tensjoattivi huma l-ingredjenti ewlenin fid-deterġenti, jenħtieġ li r-rekwiżiti eżistenti tal-bijodegradabbiltà jinżammu. Peress li l-aġenti tensjoattivi jinbiegħu primarjament fi tranżazzjonijiet minn negozju għal negozju sabiex jintużaw fil-manifattura tad-deterġenti, dawn ma hemmx bżonn li jkunu soġġetti għall-istess rekwiżiti bħad-deterġenti. Għalhekk, jenħtieġ li jiġu stabbiliti regoli minimi għall-aġenti tensjoattivi, jiġifieri regoli dwar l-informazzjoni tat-tikkettar u l-obbligu tal-manifatturi li jfasslu dokumentazzjoni teknika. Sabiex tiġi evitata tqegħid ta' piż amministrattiv żejjed, jenħtieġ li l-manifattur ikun obbligat li joħloq passaport diġitali tal-prodott u jipprovdi l-iskeda tad-data tal-ingredjenti għal reazzjoni ta' emerġenza relatata mas-saħħa biss fejn l-aġenti tensjoattivi jitqiegħdu direttament fis-suq għad-dispożizzjoni tal-konsumaturi jew tal-utenti finali oħrajn. Barra minn hekk, id-dispożizzjonijiet dwar il-bejgħ ta' rikariki jenħtieġ li japplikaw ukoll għall-aġenti tensjoattivi għall-utenti finali.

(8)

Il-Patt Ekoloġiku Ewropew stabbilixxa l-għan li jiġu protetti aħjar is-saħħa tal-bniedem u l-ambjent bħala parti minn approċċ ambizzjuż biex jiġi indirizzat it-tniġġis mis-sorsi kollha u biex nimxu lejn ambjent ħieles mit-tossiċità. Bħala parti minn dak l-approċċ, dan ir-Regolament jenħtieġ li jikkomplementa r-regoli stabbiliti fl-istrumenti leġiżlattivi eżistenti.

(9)

Peress li l-Unjoni diġà għandha wieħed mill-aktar oqfsa regolatorji komprensivi u protettivi għas-sustanzi kimiċi, appoġġat mill-bażi tal-għarfien l-aktar avvanzata fid-dinja, dan ir-Regolament ma jaffettwax l-applikazzjoni tal-liġi tal-Unjoni eżistenti fir-rigward tal-aspetti tal-protezzjoni tas-saħħa tal-bniedem, tas-sikurezza u tal-ambjent mhux koperti minn dan ir-Regolament. Jenħtieġ li dan ir-Regolament japplika, b'mod partikolari, mingħajr preġudizzju għar-Regolamenti (KE) Nru 1907/2006, (KE) Nru 1272/2008 (6) u (UE) Nru 528/2012 (7) tal-Parlament Ewropew u tal-Kunsill.

(10)

L-aġenti tensjoattivi huma aġenti li jaħdmu fuq is-superfiċje li jgħinu biex ikissru l-interfaċċa bejn l-ilma u ż-żjut jew il-ħmieġ. Huma wieħed mill-ingredjenti ewlenin użati fid-deterġenti. L-aġenti tensjoattivi jistgħu, madankollu, joħolqu riskju għall-ambjent peress li jintremew fis-sistemi tad-drenaġġ jew direttament fl-ilma tal-wiċċ. Biex jiġi evitat kwalunkwe effett negattiv li l-aġenti tensjoattivi jista' jkollhom fuq l-ambjent, hu meħtieġ li jiġu stabbiliti rekwiżiti li jiżguraw li l-aġenti tensjoattivi jkunu kompletament bijodegradabbli, kemm jekk jiġu introdotti fis-suq waħedhom u jkunu maħsuba għall-użu fid-deterġenti kif ukoll jekk ikunu jinsabu fid-deterġenti.

(11)

Xi sustanzi użati fid-deterġenti, għajr aġenti tensjoattivi, jistgħu jibqgħu fl-ilma mormi wara l-użu u, jekk ma jitneħħewx mill-operaturi tal-impjanti tat-trattament tal-ilma mormi permezz ta' proċessi li jiswew ħafna flus, dawn jippersistu u jinġemgħu fl-ambjent. Sabiex tiġi ffaċilitata l-innovazzjoni u jiġu indirizzati r-riskji potenzjali għas-saħħa tal-bniedem u tal-ambjent, u sabiex jiġu appoġġati l-objettivi tad-Direttiva (UE) 2024/3019 tal-Parlament Ewropew u tal-Kunsill (8), jenħtieġ li jiġu stabbiliti miri ambizzjużi għall-introduzzjoni ta' kriterji ta' bijodegrabbiltà u metodi korrispondenti tal-ittestjar għall-ingredjenti l-oħra fid-deterġenti, bil-prijorità mogħtija lill-ingredjenti b'impatti potenzjalment ogħla fuq l-ambjent. Jenħtieġ li l-Kummissjoni, fl-ewwel stadju, tiżviluppa kriterji ta' bijodegradabbiltà għal riti polimeriċi li jinħallu fl-ilma użati biex jinkapsulaw id-deterġenti u għall-polimeri kollha f'tali riti, u fit-tieni stadju jenħtieġ li tiżviluppa tali kriterji għal sustanzi organiċi oħra użati f'konċentrazzjoni għolja fid-deterġenti, li jirrappreżentaw mill-anqas 10 % tal-prodott. Sabiex jiġi żgurat trattament ugwali bejn il-prodotti irrispettivament mill-forma likwida jew solida tagħhom u sabiex tiġi evitata d-dilwizzjoni, dak il-perċentwal jenħtieġ li jiġi kkalkulat mill-massa totali tas-sustanzi, inkluż diversi solventi, mingħajr ma jitqies il-kontenut tal-ilma. Jenħtieġ li l-Kummissjoni tiddetermina wkoll metodi ta' ttestjar xierqa, biex tiżgura l-implimentazzjoni uniformi u s-sorveljanza effettiva tas-suq madwar l-Unjoni. Barra minn hekk, għal raġunijiet ta' ċarezza legali u prevedibbiltà, jenħtieġ li jiġu stipulati skedi ta' żmien realistiċi għall-manifatturi biex jadattaw il-preparati tal-prodotti tagħhom biex jissodisfaw il-kriterji ta' bijodegradabbiltà li għandhom jiġu żviluppati mill-Kummissjoni jew għar-riti jew għall-polimeri fir-riti u s-sustanzi organiċi f'konċentrazzjonijiet għolja. Sabiex tiġi żgurata l-flessibbiltà tar-regoli f'każijiet debitament ġustifikati, jenħtieġ li l-Kummissjoni tingħata s-setgħa li tintroduċi derogi mir-rekwiżiti tal-bijodegradabbiltà biex tiżgura li l-effiċjenza, id-disponibbiltà u l-affordabbiltà tad-deterġenti ma jiġux affettwati. Fl-aħħar nett, biex jiġi żgurat livell għoli ta' protezzjoni tal-ambjent, jenħtieġ li l-Kummissjoni tivvaluta wkoll il-fattibbiltà tal-introduzzjoni ta' kriterji ta' bijodegradabbiltà għas-sustanzi organiċi preżenti f'konċentrazzjonijiet aktar baxxi jew tat-tnaqqis tal-limitu minimu. Tali approċċ komprensiv u fi stadji lejn il-bijodegradabbiltà jenħtieġ li jiżgura progress kostanti lejn prodotti bijodegradabbli, fi skedi ta' żmien realistiċi. Sabiex il-manifatturi jingħataw iż-żmien jadattaw il-preparati tal-prodott, jenħtieġ li jingħataw perjodi ta’ tranżizzjoni suffiċjenti u jenħtieġ li jiġu stabbiliti kriterji rilevanti tal-ittestjar minn qabel sew.

(12)

Il-fosforu huwa ingredjent ewlieni ieħor użat fid-deterġenti. Madankollu, il-fosforu u l-komposti tiegħu jistgħu jikkawżaw ħsara lill-ekosistemi u lill-ambjenti akkwatiċi peress li jikkontribwixxu għall-ewtrofikazzjoni. Huwa mistenni li jsir progress sinifikanti għall-irkupru tal-fosforu mill-ilma mormi urban skont id-Direttiva (UE) 2024/3019. Madankollu, importanti li l-kwistjoni tibqa' tiġi indirizzata f'ras il-għajn bil-limitazzjoni tal-kontenut tal-fosforu fit-tipi ta' deterġenti li jintużaw fl-ogħla volumi. Għalhekk, sabiex jibqa' jiġi żgurat livell għoli ta' protezzjoni lill-ambjent, u sabiex jitnaqqas il-kontribut tad-deterġenti għall-ewtrofikazzjoni, huwa meħtieġ li jinżammu l-limiti armonizzati fuq il-kontenut tal-fosfati u ta' komposti tal-fosforu fid-deterġenti tal-ħasil tal-ħwejjeġ għall-konsumaturi u fid-deterġenti tal-magni tal-ħasil tal-platti awtomatiċi għall-konsumaturi. Minħabba l-konsegwenzi sinifikanti li jista' jkollha l-ewtrofikazzjoni, jenħtieġ li l-Kummissjoni tivvaluta l-fattibbiltà li tkompli tnaqqas tali limiti u li tintroduċi limiti ġodda għal kategoriji oħra ta' prodotti u, fejn xieraq, tadotta proposta biex temenda tali elementi essenzjali ta' dan ir-Regolament.

(13)

F'dawn l-aħħar snin, ġew żviluppati prodotti ġodda tat-tindif li fihom mikroorganiżmi ħajjin bħala ingredjenti attivi. Il-mikroorganiżmi għandhom il-bijoloġija u r-rispons proprji tagħhom għall-ambjent. Minħabba l-kapaċità tagħhom li jipproliferaw, hemm differenza ċara bejn id-deterġenti konvenzjonali u dawk mikrobiċi. Għalhekk, il-perikli inerenti u r-riskji li jinħolqu ma humiex neċessarjament tal-istess natura bħal dawk ippreżentati mis-sustanzi kimiċi, speċjalment fir-rigward tal-kapaċità tal-mikroorganiżmi li jissopravivu u jimmultiplikaw f'ambjenti differenti u li jipproduċu firxa ta' metaboliti u tossini differenti ta' sinifikat tossikoloġiku potenzjali.

(14)

Peress li l-mikroorganiżmi ma humiex soġġetti għal reġistrazzjoni skont ir-Regolament (KE) Nru 1907/2006 jew kwalunkwe liġi oħra tal-Unjoni li tirrikjedi li l-manifatturi juru li l-użu maħsub huwa sikur, jenħtieġ li dawn ikunu eliġibbli għall-użu fid-deterġenti biss sal-punt li jkunu ġew identifikati b'mod ċar u bl-appoġġ ta' data li turi li l-użu tagħhom huwa sikur. Għalhekk jenħtieġ li jiġu stabbiliti regoli armonizzati li jirregolaw l-użu sikur tal-mikroorganiżmi fid-deterġenti. Sabiex jiġi żgurat livell għoli ta' protezzjoni tas-saħħa tal-bniedem u tal-ambjent u kundizzjonijiet ekwivalenti ta' kompetizzjoni għall-operaturi ekonomiċi, jenħtieġ li l-Kummissjoni tistabbilixxi metodoloġija għall-valutazzjoni tar-riskju ta' deterġenti li fihom mikroorganiżmi. Tali metodoloġija jenħtieġ li tkun komprensiva kemm jista' jkun u tkopri r-riskji magħrufa kollha, inkluż għal kategoriji speċifiċi ta' prodotti bħal dawk f'format ta' sprej jew dawk li jintużaw fuq superfiċje f'kuntatt mal-ikel.

(15)

F'konformità mad-Direttiva 2010/63/UE tal-Parlament Ewropew u tal-Kunsill (9), jeħtieġ li l-ittestjar fuq l-annimali jiġi sostitwit, imnaqqas jew irfinat, bil-ħsieb li l-użu tal-annimali għall-ittestjar jiġi eliminat gradwalment kemm jista' jkun malajr. Għaldaqstant, jenħtieġ li l-introduzzjoni fis-suq ta' deterġenti u ta' aġenti tensjoattivi li kienu s-suġġett ta' ttestjar fuq l-annimali sabiex jiġu ssodisfati r-rekwiżiti ta' dan ir-Regolament tiġi pprojbita b'mod ġenerali waqt li xorta jibqa' permess l-użu ta' data storika. Jenħtieġ li l-Kummissjoni tipprevedi deroga, fejn xieraq, biex tiżgura livell għoli ta' protezzjoni tas-saħħa tal-bniedem u tal-ambjent, u jenħtieġ li tikkomunika lill-Istati Membri u lill-operaturi ekonomiċi rilevanti kwalunkwe deċiżjoni bħal din li tagħti deroga.

(16)

Sabiex jiġi żgurat livell għoli ta' protezzjoni fl-interess pubbliku, u sabiex tiġi ggarantita kompetizzjoni leali fis-suq intern, jenħtieġ li l-operaturi ekonomiċi jkunu responsabbli għall-konformità tad-deterġenti u tal-aġenti tensjoattivi ma' dan ir-Regolament fir-rigward tar-rwoli rispettivi tagħhom fil-katina tal-provvista. Kull meta jkun xieraq, jenħtieġ li l-manifatturi u l-importaturi jwettqu testijiet ta' kampjun tad-deterġenti u tal-aġenti tensjoattivi li jkunu qiegħdu fis-suq, sabiex jipproteġu s-saħħa u s-sikurezza tal-konsumaturi u tal-ambjent.

(17)

Jenħtieġ li l-operaturi ekonomiċi kollha li jintervjenu fil-katina tal-provvista u tad-distribuzzjoni jieħdu miżuri xierqa u effettivi biex jiżguraw li fis-suq tal-Unjoni jqiegħdu biss deterġenti u aġenti tensjoattivi li jkunu konformi ma' dan ir-Regolament. Għalhekk, jeħtieġ li tiġi prevista distribuzzjoni ċara u proporzjonata tal-obbligi li jikkorrispondu għar-rwol ta' kull operatur ekonomiku fil-katina tal-provvista u tad-distribuzzjoni.

(18)

Sabiex l-operaturi ekonomiċi jkunu jistgħu juru li d-deterġenti u l-aġenti tensjoattivi mqiegħda fis-suq jikkonformaw mar-rekwiżiti ta' dan ir-Regolament, u sabiex l-awtoritajiet kompetenti jkunu jistgħu jivverifikaw dan, hu meħtieġ li tiġi prevista proċedura ta' valutazzjoni tal-konformità. Id-Deċiżjoni Nru 768/2008/KE tistabbilixxi moduli għall-proċeduri ta' valutazzjoni tal-konformità, mill-anqas stretti sal-aktar stretti, fi proporzjon mal-livell ta' riskju involut u l-livell ta' sikurezza meħtieġ. Sabiex tiġi żgurata l-koerenza intersettorjali u biex jiġu evitati varjanti ad hoc, dik id-Deċiżjoni tispeċifika l-proċeduri ta' valutazzjoni tal-konformità li jistgħu jintgħażlu minn fost dawk il-moduli.

(19)

Il-manifatturi, li għandhom għarfien dettaljat tad-disinn u tal-proċess tal-produzzjoni, jinsabu fl-aħjar pożizzjoni biex jiżguraw il-konformità tad-deterġent jew tal-aġent tensjoattiv ma' dan ir-Regolament. Għalhekk jenħtieġ li l-manifatturi jkunu l-uniċi responsabbli għat-twettiq tal-proċedura ta' valutazzjoni tal-konformità għad-deterġenti u għall-aġenti tensjoattivi. Il-Modulu A li jinsab fl-Anness II tad-Deċiżjoni Nru 768/2008/KE jenħtieġ li jkun applikabbli għall-valutazzjoni tal-konformità tad-deterġenti u tal-aġenti tensjoattivi. Il-manifatturi jenħtieġ li jiġbru wkoll id-dokumentazzjoni teknika li turi l-konformità tad-deterġent jew tal-aġent tensjoattiv mar-regoli u l-metodi ta' ttestjar rilevanti.

(20)

Ladarba d-deterġenti u l-aġenti tensjoattivi jistgħu jdumu fuq l-ixkaffa għal żmien twil u sabiex tiġi żgurata l-koerenza mar-rekwiżiti li tinżamm id-dokumentazzjoni skont ir-Regolament (KE) Nru 1272/2008 li huma applikabbli għall-maġġoranza tad-deterġenti, jenħtieġ li l-manifatturi jżommu d-dokumentazzjoni teknika, il-passaport diġitali tal-prodott u, meta applikabbli, it-tikketta diġitali għal perjodu ta' 10 snin mid-data li fiha d-deterġent jew l-aġent tensjoattiv kopert minn dik id-dokumentazzjoni teknika, mill-passaport diġitali tal-prodott jew mit-tikketta diġitali jkun ġie introdott fis-suq.

(21)

Biex tiġi ffaċilitata l-konformità tal-manifatturi mal-obbligi tagħhom skont dan ir-Regolament, jenħtieġ li l-manifatturi stabbiliti fl-Unjoni jkunu jistgħu jaħtru rappreżentant awtorizzat biex iwettaq kompiti speċifiċi f'isimhom. Tali ħatra jenħtieġ li tkun valida biss meta tiġi aċċettata bil-miktub mir-rappreżentant awtorizzat. Barra minn hekk, sabiex tiġi żgurata distribuzzjoni ċara u proporzjonata tar-responsabbiltajiet bejn il-manifattur u r-rappreżentant awtorizzat, hu meħtieġ li tingħata l-lista tal-kompiti li jenħtieġ li jiġu fdati lir-rappreżentant awtorizzat mill-manifatturi, kif ukoll il-lista ta' kompiti li ma jistgħux jiġu ddelegati. Barra minn hekk, sabiex jiġu żgurati l-infurzabbiltà u l-effettività tar-rekwiżiti tas-sorveljanza tas-suq u jiġi żgurat li d-deterġenti u l-aġenti tensjoattivi konformi biss jitqiegħdu fis-suq tal-Unjoni, jenħtieġ li dejjem ikun hemm entità stabbilita fl-Unjoni responsabbli għall-kollegament mal-awtoritajiet tas-sorveljanza tas-suq u għall-iżgurar tal-konformità ma' dan ir-Regolament. Għal dak l-għan, il-manifatturi stabbiliti barra mill-Unjoni jenħtieġ li jaħtru rappreżentant awtorizzat stabbilit fl-Unjoni fir-rigward tad-deterġenti u l-aġenti tensjoattivi li jqiegħdu fis-suq tal-Unjoni permezz ta' bejgħ mill-bogħod, inkluż permezz ta' swieq online. Għalhekk, jenħtieġ li dan ir-Regolament ikun fih lista ta' kompiti addizzjonali li bihom tali manifatturi jridu jafdaw lir-rappreżentanti awtorizzati. Dik il-lista jenħtieġ li tinkludi obbligu li jsiru l-aħjar sforzi biex jiġi vverifikat li l-informazzjoni u d-dokumentazzjoni pprovduti mill-manifattur juru konformità ma' dan ir-Regolament. Tali obbligu jenħtieġ li jinftiehem bħala verifika bbażata fuq id-dokumenti, peress li r-rappreżentant awtorizzat jenħtieġ li ma jkunx mitlub jwettaq investigazzjonijiet dettaljati jew analiżijiet eżawrjenti tal-konformità. Dan jiżgura protezzjoni xierqa tas-saħħa tal-bniedem u tal-ambjent filwaqt li jirrispetta, f'konformità mal-prinċipju tal-proporzjonalità, ir-rwol u l-kapaċitajiet partikolari tar-rappreżentanti awtorizzati.

(22)

Bil-għan li tiġi ffaċilitata l-komunikazzjoni bejn l-operaturi ekonomiċi, l-awtoritajiet ta' sorveljanza tas-suq u l-konsumaturi, jenħtieġ li l-operaturi ekonomiċi jindikaw u jaġġornaw id-dettalji ta' kuntatt tagħhom, bħal numru tat-telefown minbarra l-indirizz postali u dak elettroniku jew kanali oħra ta' komunikazzjoni.

(23)

Sabiex jiġi ssalvagwardjat il-funzjonament tas-suq intern u biex jiġi żgurat li jintlaħaq l-objettiv li jiġi pprovdut livell għoli ta' protezzjoni lis-saħħa tal-bniedem u lill-ambjent, hu meħtieġ li jiġi stabbilit li d-deterġenti u l-aġenti tensjoattivi minn pajjiżi terzi li jidħlu fis-suq tal-Unjoni, inkluż permezz ta' bejgħ online, jikkonformaw ukoll ma' dan ir-Regolament. B'mod partikolari, jeħtieġ li jkun żgurat li l-manifatturi jkunu wettqu proċeduri xierqa ta' valutazzjoni tal-konformità fir-rigward ta' dawk il-prodotti. Hu meħtieġ ukoll li jiġu stabbiliti regoli għall-importaturi biex jiġi żgurat li d-deterġenti u l-aġenti tensjoattivi introdotti fis-suq jikkonformaw ma' dawk ir-rekwiżiti. L-importaturi u r-rappreżentanti awtorizzati jenħtieġ li jiżguraw li d-dokumentazzjoni mfassla mill-manifatturi tkun disponibbli għall-ispezzjoni mill-awtoritajiet nazzjonali kompetenti. Jenħtieġ li jkun previst li l-importaturi u, fejn applikabbli, ir-rappreżentanti awtorizzati jiżguraw li jkun inħoloq passaport diġitali tal-prodott għad-deterġenti u l-aġenti tensjoattivi għall-utenti finali.

(24)

Peress li l-importaturi jaqdu rwol ewlieni biex jiggarantixxu l-konformità tad-deterġenti u tal-aġenti tensjoattivi importati fis-suq tal-Unjoni, jenħtieġ li meta jintroduċu fis-suq deterġent jew aġent tensjoattiv, l-importaturi jindikaw fuq it-tikketta tal-prodott isimhom, l-isem kummerċjali rreġistrat jew it-trade mark irreġistrata tagħhom, kif ukoll l-indirizz postali u dak elettroniku tagħhom u n-numru tat-telefown.

(25)

Peress li d-distributuri jqiegħdu deterġent jew aġent tensjoattiv fis-suq wara li dawn ikunu ġew introdotti fis-suq mill-manifattur jew mill-importatur, jenħtieġ li d-distributuri jaġixxu bl-attenzjoni dovuta fir-rigward tar-rekwiżiti applikabbli. Jenħtieġ li d-distributuri jiżguraw ukoll li meta jimmaniġġaw id-deterġent jew l-aġent tensjoattiv ma jaffettwawx ħażin il-konformità tagħhom mar-rekwiżiti ta' dan ir-Regolament.

(26)

Peress li d-distributuri, l-importaturi u, fejn applikabbli, ir-rappreżentanti awtorizzati huma qrib is-suq u jaqdu rwol importanti biex jiżguraw il-konformità tal-prodott, jenħtieġ li jkunu involuti fil-kompiti ta' sorveljanza tas-suq imwettqa mill-awtoritajiet nazzjonali kompetenti, u jenħtieġ li jkunu lesti li jieħdu sehem attiv, billi jagħtu l-informazzjoni kollha meħtieġa lil dawk l-awtoritajiet fir-rigward tad-deterġent jew tal-aġent tensjoattiv ikkonċernat.

(27)

L-importaturi u d-distributuri li jew jintroduċu deterġent jew aġent tensjoattiv fis-suq f'isimhom jew bit-trade mark tagħhom jew jimmodifikaw deterġent jew aġent tensjoattiv b'tali mod li l-konformità ma' dan ir-Regolament tista' tiġi affettwata, jenħtieġ li jitqiesu bħala manifatturi u għaldaqstant jenħtieġ li jassumu l-obbligi tal-manifatturi. Bl-istess mod, l-importaturi u d-distributuri li jqiegħdu fis-suq għall-utenti finali aġent tensjoattiv li ma ġiex prodott għall-provvista lill-utenti finali iżda lill-produtturi tad-deterġenti, jenħtieġ li jassumu r-rwol tal-manifatturi u, fost l-oħrajn, joħolqu passaport diġitali tal-prodott. F'każijiet oħra, jenħtieġ li l-operaturi ekonomiċi li kull ma jagħmlu huwa li jimballaw jew jimballaw mill-ġdid deterġent jew aġent tensjoattiv li diġà jkun ġie introdott fis-suq minn operaturi ekonomiċi oħra jkunu jistgħu juru li dik il-konformità ma' dan ir-Regolament ma ġietx affettwata, billi jindikaw l-identità tagħhom fuq il-pakkett u billi jżommu kopja tal-informazzjoni tat-tikkettar oriġinali. L-attivitajiet tal-imballaġġ u tal-imballaġġ mill-ġdid jenħtieġ li jinftiehmu bħala li jipprovdu prodotti lill-utenti finali f'imballaġġ individwali u jenħtieġ li ma jkoprux il-bejgħ tal-mili mill-ġdid.

(28)

Peress li d-deterġenti industrijali u istituzzjonali jintużaw minn persunal speċjalizzat barra mill-isfera domestika, huma soġġetti għal rekwiżiti differenti mid-deterġenti tal-konsumaturi. Sabiex jiġu evitati riskji għas-saħħa tal-konsumaturi jew għall-ambjent u biex jiġu ffaċilitati l-attivitajiet ta' sorveljanza tas-suq, id-deterġenti industrijali u istituzzjonali jenħtieġ li jiġu identifikati b'mod ċar mit-tikketta tagħhom.

(29)

Sabiex jiġi żgurat livell għoli ta' protezzjoni lis-saħħa tal-bniedem, minħabba d-disponibbiltà mifruxa ta' deterġenti u aġenti tensjoattivi għall-utenti finali u r-riskju għoli ta' avvelenament aċċidentali, partikolarment fost it-tfal, jenħtieġ li l-korpi tal-Istati Membri maħtura skont ir-Regolament (KE) Nru 1272/2008 li jappoġġaw ir-rispons għal emerġenza tas-saħħa jkollhom aċċess għal informazzjoni kwalitattiva u kwantitattiva dwar il-kompożizzjoni tad-deterġenti u tal-aġenti tensjoattivi għall-utenti finali, anke jekk mhux mitlub skont dak ir-Regolament. Għalhekk, qabel ma tali prodotti jitqiegħdu fis-suq, il-manifatturi u, fejn applikabbli, l-importaturi jew ir-rappreżentanti awtorizzati tagħhom jenħtieġ li jipprovdu skeda tad-data dwar l-ingredjenti għad-deterġenti u l-aġenti tensjoattivi għall-utenti finali li huma taħlitiet li mhumiex perikolużi għas-saħħa tal-bniedem. Barra minn hekk, jenħtieġ li d-distributuri li jqiegħdu l-prodotti fis-suq fl-Istati Membri għajr dawk li fihom il-prodotti huma diġà disponibbli, jipprovdu wkoll l-iskeda tad-data dwar l-ingredjenti. Sabiex tiġi ottimizzata l-komunikazzjoni tal-informazzjoni, jenħtieġ li l-obbligi f'dan ir-Regolament jibnu fuq is-sistema marbuta mar-rispons ta' emerġenza tas-saħħa diġà stabbilit skont ir-Regolament (KE) Nru 1272/2008, peress li diġà huwa familjari ma' ħafna operaturi ekonomiċi u ċentri għat-trattament ta' avvelenament. Jenħtieġ li l-Kummissjoni tingħata s-setgħa li tistabbilixxi r-rekwiżiti tekniċi biex jiġi ssodisfat l-obbligu li tiġi pprovduta l-iskeda tad-data dwar l-ingredjenti.

(30)

It-tikketti jikkomunikaw lill-utenti informazzjoni importanti dwar l-użu u s-sikurezza, pereżempju, l-preżenza f'deterġenti u aġenti tensjoattivi ta' sensitizzaturi tal-ġilda jew dawk respiratorji bħal fwejjaħ allerġeniċi, preservattivi jew enzimi. Billi tiġi pprovduta informazzjoni dwar il-kontenut ta' dawk is-sustanzi fuq it-tikketti tad-deterġenti u tal-aġenti tensjoattivi huwa possibbli għall-utenti b'allerġiji jew bi predispożizzjonijiet allerġiċi li jagħmlu għażliet infurmati, u b'hekk jitnaqqsu r-reazzjonijiet potenzjali relatati mal-użu tad-deterġenti u tal-aġenti tensjoattivi. Għalhekk jeħtieġ li jiġu stabbiliti rekwiżiti ta' tikkettar għad-deterġenti u għall-aġenti tensjoattivi.

(31)

Peress li t-tikkettar tad-deterġenti u tal-aġenti tensjoattivi jista' jkun kopert minn diversi atti legali tal-Unjoni, l-informazzjoni fuq it-tikketti tad-deterġenti u tal-aġenti tensjoattivi jeħtieġ li tiġi simplifikata sabiex meta tkun meħtieġa informazzjoni simili li tirriżulta minn atti legali differenti tal-Unjoni fuq it-tikketti tad-deterġenti u tal-aġenti tensjoattivi, dik l-informazzjoni tingħata darba biss f'konformità mar-regoli aktar stretti. Dik is-simplifikazzjoni, min-naħa waħda, ittejjeb il-leġibbiltà u l-komprensibbiltà tat-tikketti mill-utenti finali u, min-naħa l-oħra, tnaqqas il-piż amministrattiv fuq il-manifatturi.

(32)

Is-sustanzi tal-fwieħa huma komposti organiċi bi rwejjaħ karatteristiċi, ġeneralment pjaċevoli, li jintużaw ħafna fid-deterġenti kif ukoll f'ħafna prodotti oħra bħall-fwejjaħ u kożmetiċi oħra bil-fwieħa. Dawk is-sustanzi jistgħu jikkawżaw reazzjoni allerġika mal-kuntatt, speċjalment għal persuni sensitizzati, anki meta jkunu f'konċentrazzjonijiet baxxi. Għalhekk, huwa importanti li tiġi pprovduta informazzjoni dwar il-preżenza ta' sustanzi allerġeniċi individwali fid-deterġenti sabiex il-persuni sensitizzati jkunu jistgħu jevitaw il-kuntatt mas-sustanza li għaliha jkunu allerġiċi. Għalhekk, jenħtieġ li jiġu stabbiliti rekwiżiti speċifiċi ta' tikkettar li japplikaw biss meta l-fwejjaħ allerġeniċi ma jkollhomx jiġu ttikkettati skont ir-Regolament (KE) Nru 1272/2008. Dan mhux biss jipprevjeni li jitqiegħed piż amministrattiv bla bżonn fuq l-operaturi ekonomiċi iżda jiżgura wkoll li l-konsumaturi jew utenti finali oħra jirċievu dik l-informazzjoni ppreżentata b'mod ċar, u hekk jiġi provdut livell għoli ta' protezzjoni lis-saħħa tal-bniedem għall-persuni sensitizzati.

(33)

Huma meħtieġa rekwiżiti addizzjonali ta' tikkettar għal ċerti sustanzi, bħall-preservattivi, sabiex jiġi żgurat livell għoli ta' protezzjoni lis-saħħa tal-bniedem. Għalhekk, jenħtieġ li r-rekwiżiti tat-tikkettar għall-preservattivi jkopru mhux biss dawk il-preservattivi miżjuda intenzjonalment mill-manifattur mad-deterġent, iżda anki dawk li jirriżultaw mit-taħlitiet kostitwenti tiegħu u li spiss jissejħu “preservattivi ta' trasferiment”.

(34)

L-informazzjoni dwar l-ammont korrett ta' deterġent li l-konsumaturi jeħtieġ jużaw meta jwettqu attivitajiet ta' tindif, jiġifieri l-informazzjoni dwar id-dożaġġ, jenħtieġ li tiġi inkluża fuq it-tikketta tad-deterġenti tal-ħasil tal-ħwejjeġ għall-konsumaturi, id-deterġenti tal-magni tal-ħasil tal-platti awtomatiċi għall-konsumaturi u d-deterġenti għas-superfiċji għall-konsumaturi sabiex jiġi evitat l-użu żejjed potenzjali tad-deterġenti u b'hekk jitnaqqas l-ammont totali ta' deterġent u ta' aġent tensjoattiv li jidħlu fl-ambjent.

(35)

It-tikkettar diġitali jista' jtejjeb il-komunikazzjoni tal-informazzjoni tat-tikkettar kemm billi jevita tikketti fiżiċi mimlija żżejjed kif ukoll billi jippermetti lill-utenti jserrħu fuq diversi għażliet ta' qari disponibbli biss għal formati diġitali, bħal tipa akbar, tiftix awtomatiku, loudspeakers jew traduzzjoni f'lingwi oħra. It-tikkettar diġitali jista' għalhekk iżid il-leġġibbiltà, il-faċilità tal-użu u l-komprensjoni tat-tikketti għall-konsumaturi, inkluż il-konsumaturi vulnerabbli u b'indeboliment tal-vista. Il-provediment ta' tikketti diġitali jista' jwassal ukoll għal ġestjoni aktar effiċjenti tal-obbligi ta' tikkettar mill-operaturi ekonomiċi, billi jiffaċilita l-aġġornament tal-informazzjoni tat-tikkettar, inaqqas il-kostijiet tat-tikkettar u jippermetti l-provediment aktar immirat tal-informazzjoni lill-utenti. Għalhekk, l-operaturi ekonomiċi jenħtieġ li jkunu jistgħu jipprovdu ċerta informazzjoni tat-tikkettar għad-deterġenti biss permezz tat-tikketta diġitali, soġġett għal ċerti kundizzjonijiet li jiżguraw livell għoli ta' protezzjoni lill-utenti.

(36)

Biex jiġi evitat li jiġi impost piż amministrattiv bla bżonn fuq l-operaturi ekonomiċi u peress li t-tikketta diġitali hija komplementari għal dik fiżika, jenħtieġ li l-operaturi ekonomiċi jkunu jistgħu jiddeċiedu jekk jużawx tikketti diġitali jew jipprovdux l-informazzjoni kollha fuq tikketta fiżika biss. L-għażla li tiġi pprovduta tikketta diġitali jenħtieġ li tkun f'idejn il-manifatturi u l-importaturi, li huma responsabbli biex jipprovdu ġabra preċiża ta' informazzjoni tat-tikkettar.

(37)

It-tikkettar diġitali jista' wkoll joħloq sfidi għall-gruppi vulnerabbli tal-popolazzjoni mingħajr ħiliet diġitali jew b'ħiliet diġitali insuffiċjenti u jżid id-distakk diġitali. Għal dik ir-raġuni, l-informazzjoni speċifika li trid tiġi pprovduta fuq tikketta diġitali biss jenħtieġ li tirrifletti l-livell attwali ta' prontezza diġitali u s-sitwazzjoni partikolari tal-utenti tad-deterġenti, kif ukoll il-prontezza tal-infrastruttura bla fili u infrastruttura teknoloġika oħra meħtieġa biex ikun permess aċċess mingħajr restrizzjonijiet għall-informazzjoni. Barra minn hekk, l-informazzjoni kollha tat-tikkettar dwar il-protezzjoni tas-saħħa u tal-ambjent, kif ukoll l-istruzzjonijiet minimi dwar l-użu għad-deterġenti, jenħtieġ li jibqgħu fuq it-tikketta fiżika, biex il-konsumaturi u utenti finali oħra jkunu jistgħu jagħmlu għażliet infurmati qabel ma jixtru d-deterġent u biex jiġi żgurat l-immaniġġar sikur tiegħu.

(38)

Għad-deterġenti u l-aġenti tensjoattivi mibjugħa lill-utenti finali permezz tal-mili mill-ġdid, jenħtieġ li jkun possibbli li jiġi pprovdut ammont aktar estensiv ta' informazzjoni b'mod diġitali biss, sabiex jinkisbu bis-sħiħ mhux biss il-benefiċċji offruti mid-diġitalizzazzjoni, iżda anki l-benefiċċji ambjentali kbar f'termini ta' tnaqqis tal-imballaġġ u tal-iskart mill-imballaġġ relatat li toffri l-prattika tal-bejgħ tal-mili mill-ġdid. Madankollu, jenħtieġ li mill-anqas l-utenti finali jirċievu f'forma fiżika struzzjonijiet simplifikati dwar id-dożaġġ għad-deterġenti tal-ħasil tal-ħwejjeġ għall-konsumaturi u informazzjoni dwar fwejjaħ allerġeniċi u preservattivi, sabiex jiġi evitat ir-riskju ta' reazzjonijiet allerġiċi.

(39)

Biex jiġu żgurati kundizzjonijiet ekwivalenti ta' kompetizzjoni fost l-operaturi ekonomiċi li jqiegħdu d-deterġenti fis-suq, u biex jiġu protetti l-konsumaturi u utenti finali oħra, jenħtieġ li jiġu stabbiliti rekwiżiti ġenerali għat-tikkettar diġitali. Pereżempju, jenħtieġ li l-operaturi ekonomiċi jiżguraw aċċess liberu u faċli għat-tikketti diġitali u li l-informazzjoni obbligatorja tat-tikkettar meħtieġa skont dan ir-Regolament tkun separata minn informazzjoni oħra.

(40)

Minħabba l-iżvilupp attwali tal-ħiliet diġitali, jenħtieġ li l-operaturi ekonomiċi jipprovdu wkoll l-informazzjoni tat-tikkettar b'mezzi alternattivi lill-konsumaturi u utenti finali oħra li ma jkunux kapaċi jaċċessaw it-tikketta diġitali. Dak l-obbligu jenħtieġ li jiġi impost bħala miżura ta' sikurezza biex jitnaqqas kwalunkwe riskju potenzjali tan-nuqqas ta' disponibbiltà tal-informazzjoni tat-tikkettar, b'mod partikolari fir-rigward tad-deterġenti u aġenti tensjoattivi għall-utenti finali mimlija mill-ġdid, meta aktar informazzjoni tat-tikkettar tkun tista' tiġi pprovduta fuq tikketta diġitali biss.

(41)

Peress li d-deterġenti u l-aġenti tensjoattivi għall-utenti finali għandhom l-istess użu u jippreżentaw l-istess riskji irrispettivament mill-format li fih jitqiegħdu fis-suq, jenħtieġ li l-operaturi ekonomiċi li jqiegħdu tali prodotti fis-suq permezz tar-rikariki jiżguraw li dawk il-prodotti jikkonformaw mal-istess rekwiżiti bħall-prodotti f'imballaġġ individwali. Barra minn hekk, jenħtieġ li l-konsumaturi jirċievu l-informazzjoni meħtieġa tat-tikkettar meta jagħżlu deterġenti mimlija mill-ġdid, u jenħtieġ li jiġu stabbiliti rekwiżiti minimi ta' sikurezza għall-istazzjonijiet ta' rikarika. Għalhekk, il-bejgħ tar-rikariki tad-deterġenti jenħtieġ li jkun kopert b'mod espliċitu minn dan ir-Regolament sabiex jiġi żgurat livell għoli ta' protezzjoni lis-saħħa tal-bniedem u tal-ambjent u kundizzjonijiet ekwivalenti ta' kompetizzjoni għall-operaturi ekonomiċi.

(42)

Sabiex jinżamm il-pass mal-iżviluppi teknoloġiċi u l-mezzi ġodda ta' bejgħ, filwaqt li tiġi żgurata informazzjoni tajba għall-konsumaturi u attivitajiet effiċjenti ta' sorveljanza tas-suq, jenħtieġ li l-informazzjoni tat-tikkettar tad-deterġenti u tal-aġenti tensjoattivi tiġi indikata fil-każ ta' bejgħ mill-bogħod, inkluż permezz ta' swieq online.

(43)

L-iżgurar tat-traċċabbiltà ta' deterġent jew ta' aġent tensjoattiv tul il-katina kollha tal-provvista jgħin biex is-sorveljanza tas-suq issir aktar sempliċi u effiċjenti. Sistema effiċjenti ta' traċċabbiltà tiffaċilita l-kompitu tal-awtoritajiet tas-sorveljanza tas-suq li jittraċċaw operaturi ekonomiċi li jqiegħdu fis-suq deterġenti jew aġenti tensjoattivi mhux konformi.

(44)

Jenħtieġ li l-manifatturi joħolqu passaport diġitali tal-prodott biex jipprovdu informazzjoni dwar il-konformità tad-deterġenti u tal-aġenti tensjoattivi għall-utenti finali ma' dan ir-Regolament. Filwaqt li dan ir-Regolament jistabbilixxi l-kontenut minimu tal-passaport diġitali tal-prodott, li jibda mid-dikjarazzjoni ta' konformità tal-UE, l-inklużjoni ta' informazzjoni addizzjonali, bħad-dokumentazzjoni teknika, tista' tiġi prevista fil-futur. Sabiex jiġu ffaċilitati l-kontrolli fuq id-deterġenti jew l-aġenti tensjoattivi għall-utenti finali mill-awtoritajiet tas-sorveljanza tas-suq u biex l-atturi fil-katina tal-provvista, il-konsumaturi u utenti finali oħra, kif ukoll partijiet ikkonċernati rilevanti oħra bħall-organizzazzjonijiet tas-soċjetà ċivili u r-riċerkaturi, ikunu jistgħu jaċċessaw l-informazzjoni neċessarja bħall-ingredjenti, l-informazzjoni dwar il-passaport diġitali tal-prodott jenħtieġ li tiġi pprovduta b'mod diġitali u b'mod direttament aċċessibbli u faċli għall-utent permezz ta' mezz ta' data. Il-mezz ta' data jenħtieġ li jkun viżibbli b'mod ċar għall-utenti finali qabel kwalunkwe xiri, inkluż meta d-deterġent jew l-aġent tensjoattiv għall-utenti finali jsir disponibbli permezz ta' reklam online. Għalhekk, l-awtoritajiet tas-sorveljanza tas-suq, l-awtoritajiet doganali, l-operaturi ekonomiċi, il-konsumaturi u utenti finali oħra jenħtieġ li jkollhom aċċess immedjat permezz tal-mezz ta' data għall-informazzjoni rilevanti għalihom u abbażi tad-drittijiet ta' aċċess rispettivi tagħhom.

(45)

Sabiex jiġi evitat li jitqiegħdu kostijiet fuq il-kumpaniji li jkunu sproporzjonati għall-benefiċċji usa', jenħtieġ li l-passaport diġitali tal-prodott ikun speċifiku għall-mudell ta' deterġent jew ta' aġent tensjoattiv għall-utenti finali. Id-deterġenti jew l-aġenti tensjoattivi għall-utenti finali jenħtieġ li jitqiesu li jappartjenu għall-istess mudell sakemm ma jkun hemm l-ebda bidla fil-formula jew fil-produzzjoni li twassal għal modifiki fit-tikketta tal-prodotti.

(46)

Biex tkun evitata d-duplikazzjoni tal-investiment fid-diġitalizzazzjoni mill-atturi kollha involuti, inkluż il-manifatturi, l-awtoritajiet tas-sorveljanza tas-suq u l-awtoritajiet doganali, meta kwalunkwe liġi oħra tal-Unjoni tkun teżiġi passaport diġitali tal-prodott għad-deterġenti jew l-aġenti tensjoattivi, jenħtieġ li jkun disponibbli passaport diġitali wieħed tal-prodotti li jkun fih l-informazzjoni meħtieġa skont dan ir-Regolament u l-liġi l-oħra tal-Unjoni. Barra minn hekk, jenħtieġ li l-passaport diġitali tal-prodott stabbilit skont dan ir-Regolament ikun interoperabbli għalkollox ma' kwalunkwe passaport diġitali tal-prodott meħtieġ skont liġi oħra tal-Unjoni.

(47)

B'mod partikolari, ir-Regolament (UE) 2024/1781 tal-Parlament Ewropew u tal-Kunsill (10) jistabbilixxi wkoll rekwiżiti u speċifikazzjonijiet tekniċi għal passaport diġitali tal-prodott, l-istabbiliment mill-Kummissjoni ta' reġistru tal-passaporti diġitali tal-prodott (ir-“reġistru”) fejn tinħażen l-informazzjoni tal-passaporti diġitali tal-prodott u l-interkonnessjoni tar-reġistru mas-Sistema ta' Skambju ta' Ċertifikati tat-Tieqa Unika tal-UE għad-Dwana stabbilita bir-Regolament (UE) 2022/2399 tal-Parlament Ewropew u tal-Kunsill (11). Dak ir-Regolament jista' jinkludi d-deterġenti jew l-aġenti tensjoattivi fil-kamp ta' applikazzjoni tiegħu fuq terminu medju, u b'hekk jirrikjedi li jkun hemm disponibbli għalihom passaport diġitali tal-prodott.

(48)

Il-passaport diġitali tal-prodott għad-deterġenti u l-aġenti tensjoattivi għall-utent finali maħluq skont dan ir-Regolament jenħtieġ għalhekk li jikkonforma mal-istess rekwiżiti u elementi tekniċi bħal dawk stipulati fir-Regolament (UE) 2024/1781, inkluż l-aspetti tekniċi, semantiċi u organizzattivi tiegħu tal-komunikazzjoni minn tarf sa tarf u tal-iskambju tad-data.

(49)

Huwa kruċjali li jiġi ċċarat kemm lill-manifatturi kif ukoll lill-utenti li, meta manifattur joħloq il-passaport diġitali tal-prodott għal deterġent jew għal aġent tensjoattiv għall-utent finali, ikun qed jiddikjara li l-prodott jikkonforma mar-rekwiżiti applikabbli kollha u li l-manifattur qed jerfa' r-responsabbiltà sħiħa għal dik il-konformità.

(50)

Meta l-informazzjoni tiġi pprovduta b'mod diġitali biss, huwa meħtieġ li jiġi ċċarat li tali informazzjoni jenħtieġ li tiġi pprovduta permezz ta' mezz tad-data uniku, iżda tiġi pprovduta separatament u tkun tista' tingħaraf b'mod ċar minn informazzjoni oħra. Dan jiffaċilita l-ħidma tal-awtoritajiet tas-sorveljanza tas-suq u jipprovdi wkoll ċarezza lill-konsumaturi jew lil utenti finali dwar il-biċċiet differenti ta' informazzjoni li huma disponibbli għalihom f'format diġitali.

(51)

Il-Kapitolu VII tar-Regolament (UE) 2019/1020 tal-Parlament Ewropew u tal-Kunsill (12), li jistabbilixxi r-regoli dwar il-kontrolli fuq il-prodotti li jidħlu fis-suq tal-Unjoni, japplika għad-deterġenti u għall-aġenti tensjoattivi. L-awtoritajiet responsabbli minn dawk il-kontrolli, li fi kważi l-Istati Membri kollha huma l-awtoritajiet doganali, iridu jwettquhom abbażi tal-analiżi tar-riskju kif imsemmi fl-Artikoli 46 u 47 tar-Regolament (UE) Nru 952/2013 tal-Parlament Ewropew u tal-Kunsill (13), l-atti ta' implimentazzjoni tiegħu u l-gwida korrispondenti. Għalhekk, jenħtieġ li dan ir-Regolament ma jimmodifika bl-ebda mod il-Kapitolu VII tar-Regolament (UE) 2019/1020 jew il-mod li bih l-awtoritajiet bil-kompitu tal-kontrolli fuq il-prodotti li jidħlu fis-suq tal-Unjoni jorganizzaw ruħhom u jwettqu l-attivitajiet tagħhom.

(52)

Minbarra l-qafas ta' kontrolli stabbilit mill-Kapitolu VII tar-Regolament (UE) 2019/1020, jenħtieġ li l-awtoritajiet doganali jkunu jistgħu jivverifikaw awtomatikament li jkun jeżisti passaport diġitali tal-prodott għad-deterġenti u l-aġenti tensjoattivi importati soġġetti għal dan ir-Regolament sabiex jissaħħu l-kontrolli fil-fruntieri esterni tal-Unjoni u jiġi evitat li deterġenti u aġenti tensjoattivi mhux konformi jidħlu fis-suq tal-Unjoni.

(53)

Meta d-deterġenti u l-aġenti tensjoattivi għall-utenti finali li jkunu ġejjin minn pajjiżi terzi jitqiegħdu fil-proċedura doganali tar-rilaxx għal ċirkolazzjoni ħielsa, jenħtieġ li r-referenza għal passaport diġitali tal-prodott ta' dawk id-deterġenti u aġenti tensjoattivi titqiegħed għad-dispożizzjoni tal-awtoritajiet doganali mill-operatur ekonomiku. Tali referenza jenħtieġ li tikkorrispondi għal identifikatur uniku tar-reġistrazzjoni kkomunikat lill-operatur ekonomiku mir-reġistru. Jenħtieġ li l-awtoritajiet doganali jivverifikaw bħala minimu li l-identifikatur uniku tar-reġistrazzjoni u l-kodiċi tal-komodità rilevanti għad-deterġent jew l-aġent tensjoattiv għall-utenti finali pprovdut jew imqiegħed għad-dispożizzjoni tagħhom jikkorrispondi mad-data maħżuna fir-reġistru. Dan jippermetti lill-awtoritajiet doganali jivverifikaw li jeżisti passaport diġitali tal-prodott għad-deterġenti u l-aġenti tensjoattivi importati. Biex titwettaq dik il-verifika awtomatika, jenħtieġ li tintuża l-interkonnessjoni bejn ir-reġistru u s-Sistema ta' Skambju ta' Ċertifikati tat-Tieqa Unika tal-UE għad-Dwana.

(54)

Id-data inkluża fil-passaport diġitali tal-prodott għandha l-għan li tippermetti lill-awtoritajiet doganali jtejbu u jiffaċilitaw il-ġestjoni tar-riskji u li l-kontrolli fil-fruntieri jkunu aktar immirati. Għalhekk, jenħtieġ li l-awtoritajiet doganali jkunu jistgħu jirkupraw u jużaw id-data inkluża fil-passaport diġitali tal-prodott u fir-reġistru relatat biex iwettqu l-kompiti tagħhom f'konformità mal-liġi tal-Unjoni, inkluż għall-ġestjoni tar-riskju f'konformità mar-Regolament (UE) Nru 952/2013.

(55)

Jenħtieġ li l-verifika awtomatika mill-awtoritajiet tad-dwana tar-referenza tal-passaport diġitali tal-prodott għad-deterġenti u l-aġenti tensjoattivi li jidħlu fis-suq tal-Unjoni ma tissostitwix jew ma timmodifikax ir-responsabbiltajiet tal-awtoritajiet tas-sorveljanza tas-suq, iżda jenħtieġ minflok li tikkomplementa l-qafas ġenerali għall-kontrolli fuq il-prodotti li jidħlu fis-suq tal-Unjoni. Jenħtieġ li l-awtoritajiet tas-sorveljanza tas-suq, f'konformità mar-Regolament (UE) 2019/1020, iwettqu kontrolli tad-data li tinsab fil-passaporti diġitali tal-prodott, verifiki fuq il-prodotti fis-suq u, f'każ ta' sospensjoni tar-rilaxx għal ċirkolazzjoni ħielsa mill-awtoritajiet maħtura għall-kontrolli fil-fruntieri esterni tal-Unjoni, jiddeterminaw il-konformità u r-riskji serji tal-prodotti skont il-Kapitolu VII tar-Regolament (UE) 2019/1020.

(56)

Is-sorveljanza tas-suq hija strument essenzjali biex tiġi żgurata l-applikazzjoni tajba u uniformi tal-liġi tal-Unjoni. Ir-Regolament (UE) 2019/1020 jistabbilixxi l-qafas għas-sorveljanza tas-suq ta' prodotti li huma soġġetti għal-liġi ta' armonizzazzjoni tal-Unjoni. Għalhekk, jenħtieġ li l-Istati Membri jorganizzaw u jwettqu sorveljanza tas-suq tad-deterġenti u tal-aġenti tensjoattivi f'konformità ma' dak ir-Regolament.

(57)

Ir-Regolament (KE) Nru 648/2004 jipprevedi proċedura ta' salvagwardja li tippermetti lill-Kummissjoni teżamina l-ġustifikazzjoni għal miżura meħuda minn Stat Membru fir-rigward ta' deterġenti u aġenti tensjoattivi meqjusa li jikkostitwixxu riskju. Sabiex tiżdied it-trasparenza, huwa meħtieġ li tittejjeb il-proċedura ta' salvagwardja preċedenti, bil-ħsieb li din issir aktar effiċjenti u tkun ibbażata fuq l-għarfien espert disponibbli fl-Istati Membri. Is-sistema preċedenti jenħtieġ li tiġi ssostitwita bi proċedura li biha l-partijiet interessati jiġu infurmati bil-miżuri li jkunu maħsuba li jittieħdu fir-rigward ta' deterġenti u aġenti tensjoattivi li joħolqu riskju għas-saħħa jew għall-ambjent. L-awtoritajiet tas-sorveljanza tas-suq jenħtieġ li jkunu jistgħu, f'kooperazzjoni mal-operaturi ekonomiċi rilevanti, jaġixxu fi stadju bikri fir-rigward ta' tali deterġenti u aġenti tensjoattivi. Jenħtieġ li l-Kummissjoni, permezz ta' atti ta' implimentazzjoni, bl-applikazzjoni tal-proċedura ta' eżami stabbilita fir-Regolament (UE) Nru 182/2011 tal-Parlament Ewropew u tal-Kunsill (14), tiddetermina jekk miżura proviżorja fir-rigward ta' deterġent jew aġent tensjoattiv li joħloq riskju tkunx ġustifikata. Dik il-proċedura speċifika ta' salvagwardja tapplika mingħajr preġudizzju għall-kontrolli ta' rutina mwettqa mill-awtoritajiet tas-sorveljanza tas-suq f'konformità mar-Regolament (UE) 2019/1020.

(58)

L-esperjenza miksuba bl-applikazzjoni tar-Regolament (KE) Nru 648/2004 wriet li f'każijiet speċifiċi, deterġenti u aġenti tensjoattivi li kienu konformi mar-rekwiżiti applikabbli xorta ħolqu riskju għas-saħħa jew għall-ambjent. Jenħtieġ li jkun hemm dispożizzjonijiet biex jiġi żgurat li l-awtoritajiet tas-sorveljanza tas-suq jieħdu azzjoni kontra kwalunkwe deterġent jew aġent tensjoattiv li joħloq riskju għas-saħħa jew għall-ambjent, anki jekk il-prodott ikun konformi mar-rekwiżiti legali. Jenħtieġ li l-Kummissjoni, permezz ta' atti ta' implimentazzjoni, u bl-applikazzjoni tal-proċedura ta' eżami stabbilita bir-Regolament (UE) Nru 182/2011, tiddetermina jekk miżura proviżorja, meħuda fir-rigward ta' deterġenti jew aġenti tensjoattivi konformi li Stat Membru jsib li joħloq riskju għas-saħħa u għas-sikurezza tal-persuni jew tal-ambjent, tkunx ġustifikata.

(59)

Sabiex jittieħed kont tal-progress tekniku u xjentifiku jew ta' evidenza xjentifika ġdida, u tal-livell ta' prontezza diġitali, jenħtieġ li l-Kummissjoni tiġi ddelegata s-setgħa ta' adozzjoni ta' atti skont l-Artikolu 290 tat-Trattat dwar il-Funzjonament tal-Unjoni Ewropea fir-rigward ta': l-emendi tal-Annessi ta' dan ir-Regolament biex tadattahom għall-progress tekniku; is-supplimentar ulterjuri tar-rekwiżiti ġenerali dwar it-tikkettar diġitali; l-emendi tal-informazzjoni tat-tikkettar li tista' tiġi pprovduta f'format diġitali biss; l-emendi tal-limitu tal-fwejjaħ allerġeniċi meta jiġu stabbiliti limiti ta' konċentrazzjoni individwali bbażati fuq ir-riskju għall-fwejjaħ allerġeniċi skont ir-Regolament (KE) Nru 1223/2009 tal-Parlament Ewropew u tal-Kunsill (15) jew iż-żieda ta' fwejjaħ allerġeniċi ġodda; u l-emendi tar-rekwiżiti eżistenti ta' bijodegradabbiltà biex jiġu introdotti rekwiżiti ta' bijodegradabbiltà għal sustanzi u taħlitiet għajr aġenti tensjoattivi fid-deterġenti, inkluż il-kapsuli ta' deterġenti, meta evidenza xjentifika ġdida tkun teħtieġ dan jew biex tkun permessa deroga minn tali kriterji f'każijiet debitament ġustifikati. Jenħtieġ li l-Kummissjoni tingħata s-setgħa wkoll li, permezz ta' atti delegati, temenda l-informazzjoni speċifika li trid tiġi inkluża fil-passaport diġitali tal-prodott, kif ukoll l-informazzjoni li trid tiġi inkluża fir-reġistru. Barra minn hekk, sabiex tiġi ffaċilitata l-ħidma tal-awtoritajiet doganali fir-rigward tad-deterġenti u tal-aġenti tensjoattivi u tar-rekwiżiti stabbiliti f'dan ir-Regolament, jenħtieġ li l-Kummissjoni tingħata s-setgħa li tadotta atti delegati li jemendaw l-Anness ta' dan ir-Regolament li fih il-lista ta' kodiċijiet tal-komodità, kif jinsab fl-Anness I tar-Regolament (KEE) Nru 2658/87 (16), u deskrizzjonijiet tal-prodott tad-deterġenti u tal-aġenti tensjoattivi.Meta tadotta atti delegati skont dan ir-Regolament, huwa ta' importanza partikolari li l-Kummissjoni twettaq konsultazzjonijiet xierqa matul il-ħidma preparatorja tagħha, inkluż fil-livell tal-esperti, u li dawk il-konsultazzjonijiet jitwettqu f'konformità mal-prinċipji stabbiliti fil-Ftehim Interistituzzjonali tat-13 ta' April 2016 dwar it-Tfassil Aħjar tal-Liġijiet (17). B'mod partikolari, biex tiġi żgurata parteċipazzjoni ugwali fit-tħejjija ta' atti delegati, il-Parlament Ewropew u l-Kunsill jirċievu d-dokumenti kollha fl-istess ħin li jirċevuhom l-esperti tal-Istati Membri, u l-esperti tagħhom ikollhom aċċess sistematiku għal-laqgħat tal-gruppi tal-esperti tal-Kummissjoni li jittrattaw it-tħejjija ta' atti delegati.

(60)

Sabiex jiġu żgurati kundizzjonijiet uniformi għall-implimentazzjoni ta' dan ir-Regolament, jenħtieġ li l-Kummissjoni tingħata s-setgħa ta' implimentazzjoni biex tistabbilixxi r-rekwiżiti tekniċi dettaljati għall-passaport tal-prodotti għad-deterġenti u għall-aġenti tensjoattivi. Jenħtieġ li dik is-setgħa tiġi eżerċitata skont ir-Regolament (UE) Nru 182/2011.

(61)

Bil-ħsieb tal-bżonn li jiġi żgurat livell għoli ta' protezzjoni lis-saħħa tal-bniedem u lill-ambjent u tal-ħtieġa li jitqiesu żviluppi ġodda bbażati fuq fatti xjentifiċi, jenħtieġ li l-Kummissjoni tagħmel rapport lill-Parlament Ewropew u lill-Kunsill dwar l-applikazzjoni ta' dan ir-Regolament. Il-Kummissjoni jenħtieġ li, fost l-oħrajn, tivvaluta jekk dan ir-Regolament ikunx qed jilħaq l-objettivi tiegħu, waqt li tqis l-impatt fuq l-intrapriżi żgħar u ta' daqs medju. Fir-rigward tal-fosforu, jenħtieġ li r-rapport ikun fih valutazzjoni tal-fattibbiltà ta' aktar tnaqqis tal-limiti tal-fosforu, bil-ħsieb li jiġi eliminat gradwalment l-użu tiegħu fil-futur, jekk ikun possibbli. Fir-rigward tas-sustanzi l-aktar ta' ħsara, jenħtieġ li l-Kummissjoni, filwaqt li tqis il-kisbiet skont liġijiet rilevanti oħra tal-Unjoni, tivvaluta l-ħtieġa li jiġu inklużi dispożizzjonijiet f'dan ir-Regolament dwar il-preżenza ta' dawk is-sustanzi fid-deterġenti u l-aġenti tensjoattivi, bl-għan li jiġi żgurat li jintlaħqu l-għanijiet stabbiliti fil-Patt Ekoloġiku Ewropew dwar l-approċċ ġeneriku għall-ġestjoni tar-riskju għas-sustanzi l-aktar ta' ħsara fil-prodotti għall-konsumaturi, u bil-ħsieb li possibbilment jiġi eliminat gradwalment l-użu ta' tali sustanzi, jekk ikun xieraq. Barra minn hekk, fir-rigward tas-sustanzi attivi bijoċidali, jenħtieġ li l-Kummissjoni tivvaluta l-ħtieġa li jiġu introdotti regoli aktar stretti biex tiġi evitata ċ-ċirkomvenzjoni tal-iskema ta' approvazzjoni stabbilita bir-Regolament (UE) Nru 528/2012. Sabiex jiġi żgurat livell għoli ta' protezzjoni lis-saħħa tal-bniedem u lill-ambjent, titrawwem l-innovazzjoni u tingħata spinta lill-kompetittività, jenħtieġ li l-Kummissjoni tivvaluta r-rekwiżiti tas-sikurezza għad-deterġenti li fihom mikroorganiżmi. Sabiex tiġi ffaċilitata t-tranżizzjoni lejn ekonomija kompletament ċirkolari, jenħtieġ li l-Kummissjoni tivvaluta l-introduzzjoni ta' miri għall-materja prima rinnovabbli u għall-kontenut riċiklat għad-deterġenti.

(62)

Dan ir-Regolament jintroduċi l-possibbiltà li tiġi pprovduta parti mill-informazzjoni obbligatorja dwar it-tikkettar biss fuq tikketti diġitali f'ċerti sitwazzjonijiet u jirrikjedi l-ħolqien ta' passaport diġitali tal-prodott għad-deterġenti u għall-aġenti tensjoattivi. Għalhekk, jeħtieġ li jiġi previst żmien suffiċjenti biex l-operaturi ekonomiċi jikkonformaw mal-obbligi tagħhom skont dan ir-Regolament, biex l-Istati Membri jistabbilixxu l-infrastruttura amministrattiva meħtieġa għall-applikazzjoni tiegħu u biex il-Kummissjoni tħejji l-implimentazzjoni tar-rekwiżiti tekniċi tal-passaport diġitali tal-prodott. Konsegwentement, jenħtieġ li l-applikazzjoni ta' dan ir-Regolament tiġi differita sa data meta dawk it-tħejjijiet ikunu jistgħu jiġu ffinalizzati b'mod raġonevoli.

(63)

Sabiex tiġi żgurata ċ-ċertezza legali u biex jiġi evitat l-iskart, l-operaturi ekonomiċi jeħtieġ li jkunu jistgħu jbigħu l-istokk li jkun jew fil-katina tad-distribuzzjoni, jew maħżun, fid-data tal-applikazzjoni ta' dan ir-Regolament. Għalhekk, jeħtieġ li jiġu previsti arranġamenti tranżizzjonali li jippermettu t-tqegħid fis-suq ta' deterġenti u aġenti tensjoattivi li jkunu ġew introdotti fis-suq f'konformità mar-Regolament (KE) Nru 648/2004 qabel dik id-data mingħajr ma dawk il-prodotti jkollhom jikkonformaw ma' dan ir-Regolament. Għalhekk, jenħtieġ li d-distributuri jkunu jistgħu jintroduċu fis-suq deterġenti u aġenti tensjoattivi, jiġifieri stokk li diġà jkun fil-katina tad-distribuzzjoni qabel id-data tal-applikazzjoni ta' dan ir-Regolament.

(64)

Sabiex tiġi żgurata aktar iċ-ċertezza legali u tiġi evitata l-ħela, huwa importanti li l-operaturi ekonomiċi jkunu jistgħu, għal perjodu limitat wara d-data tal-applikazzjoni ta' dan ir-Regolament, ibigħu stokk li għadu mhux fil-katina tad-distribuzzjoni. Għal dak l-għan, jenħtieġ li jsiru wkoll arranġamenti tranżizzjonali li jippermettu t-introduzzjoni fis-suq ta' deterġenti u aġenti tensjoattivi li jkunu għadhom mhumiex fil-katina tad-distribuzzjoni fid-data tal-applikazzjoni ta' dan ir-Regolament, mingħajr ma dawk il-prodotti jkollhom jikkonformaw ma' dan ir-Regolament, dment li jikkonformaw mar-Regolament (KE) Nru 648/2004. Għalhekk, jenħtieġ li l-manifatturi u l-importaturi jkunu jistgħu jintroduċu fis-suq tali deterġenti u aġenti tensjoattivi, jiġifieri stokk li għadu mhux fil-katina tad-distribuzzjoni, wara d-data tal-applikazzjoni ta' dan ir-Regolament. Minħabba l-objettiv ta' dak il-perjodu tranżitorju, jenħtieġ li dik il-possibbiltà tkun strettament limitata fiż-żmien għal sena waħda wara dik id-data u, b'mod partikolari, jenħtieġ li ma jkunx possibbli li tali stokk jitqiegħed fis-suq wara dak il-perjodu ta' sena.

(65)

Minħabba li l-objettivi ta' dan ir-Regolament, jiġifieri li jiggarantixxi l-funzjonament tas-suq intern filwaqt li jiżgura li d-deterġenti u l-aġenti tensjoattivi fis-suq jissodisfaw ir-rekwiżiti li jipprevedu livell għoli ta' protezzjoni lis-saħħa u lill-ambjent, ma jistgħux jinkisbu b'mod suffiċjenti mill-Istati Membri iżda jistgħu pjuttost, minħabba l-iskala u l-effetti tagħhom, jinkisbu aħjar fil-livell tal-Unjoni, l-Unjoni tista' tadotta miżuri, f'konformità mal-prinċipju ta’ sussidjarjetà kif stabbilit fl-Artikolu 5 tat-Trattat dwar l-Unjoni Ewropea. F'konformità mal-prinċipju ta’ proporzjonalità kif stabbilit f'dak l-Artikolu, dan ir-Regolament ma jmurx lil hinn minn dak li huwa meħtieġ sabiex jinkisbu dawk l-objettivi,