Artikolu 506d Trattament prudenzjali ta' titolizzazzjoni

Sal-31 ta' Diċembru 2026, l-EBA, f'kollaborazzjoni mill-qrib mal-ESMA, għandha tirrapporta lill-Kummissjoni dwar it-trattament prudenzjali tat-tranżazzjonijiet ta' titolizzazzjoni, filwaqt li tiddistingwi bejn tipi differenti ta' titolizzazzjonijiet, inkluż titolizzazzjonijiet sintetiċi, bejn l-oriġinaturi u l-investituri, u bejn tranżazzjonijiet STS u mhux STS.

B'mod partikolari, l-EBA għandha timmonitorja l-użu tal-arranġament tranżizzjonali msemmi fl-Artikolu 465(13) u tivvaluta l-punt sa fejn l-applikazzjoni tal-minimu tal-output għal skoperturi ta' titolizzazzjoni taffettwa t-tnaqqis tal-kapital miksub mill-istituzzjonijiet oriġinaturi fi tranżazzjonijiet li għalihom ikun ġie rikonoxxut trasferiment tar-riskju sinifikanti, tnaqqas b'mod eċċessiv is-sensittività għar-riskju u taffettwa l-vijabbiltà ekonomika ta' tranżazzjonijiet ġodda ta' titolizzazzjoni. F'każijiet bħal dawn ta' tnaqqis tas-sensittivitajiet għar-riskju, l-EBA tista' tqis li tipproponi rikalibrar 'l isfel tal-fatturi ta' non-newtralità għal tranżazzjonijiet li għalihom ikun ġie rikonoxxut trasferiment tar-riskju sinifikanti. L-EBA għandha tivvaluta wkoll l-adegwatezza tal-fatturi ta' non-newtralità kemm skont is-SEC-SA kif ukoll skont is-SEC-IRBA, filwaqt li tqis il-prestazzjoni storika tal-kreditu tat-tranżazzjonijiet ta' titolizzazzjoni fl-Unjoni u r-riskji mnaqqsa tal-mudell u tal-aġenzija tal-qafas ta' titolizzazzjoni.

Abbażi ta' dak ir-rapport imsemmi fil-paragrafu 1 u filwaqt li jitqiesu kif xieraq l-istandards relatati miftiehma internazzjonalment żviluppati mill-BCBS, il-Kummissjoni għandha, fejn xieraq, tippreżenta proposta leġiżlattiva lill-Parlament Ewropew u lill-Kunsill sal-31 ta' Diċembru 2027.