Parti 1 – Kunsiderazzjonijiet ġenerali

Id-Direttiva 2014/49/UE għandha l-għan li ‘tarmonizza l-metodi ta’ finanzjament ta’ SGD¹ , permezz ta’ taħlit ta’ kontribuzzjonijiet ex-ante u ex-post.

¹ Il-Premessa 27 tad-Direttiva 2014/49/UE

Skont l-Artikolu 10(3) tad-Direttiva 2014/49/UE, il-mezzi finanzjarji disponibbli li għandhom jiġu kkunsidrati sabiex jintlaħaq il-livell immirat tal-SGD jistgħu jinkludu impenji ta’ pagament, sakemm is-sehem totali tal-impenji ta’ pagament ma jaqbiżx 30% tal-ammont totali tal-mezzi finanzjarji disponibbli miġbura b’konformità ma’ dak l-Artikolu.

Din id-dispożizzjoni timplika obbligu għall-Istati Membri li jipprovdu lill-awtoritajiet maħtura jew lill-SGDs bis-setgħa li jaċċettaw l-impenji ta’ pagament sa 30% tal-mezzi finanzjarji disponibbli. Madankollu, l-Artikolu 10(3) tad-Direttiva 2014/49/UE ma għandux jinqara bħala dritt awtomatiku għall-istituzzjonijiet tal-kreditu, infurzabbli kontra l-SGD, biex jipprovdu l-kontribuzzjonijiet tagħhom fil-forma ta’ impenji ta’ pagament. L-SGD għandha timplimenta dan il-mekkaniżmu abbażi ta’ kriterji nondiskriminatorji. B’mod partikolari, l-SGDs ma għandhomx jaċċettaw iktar minn 30% ta’ kontribuzzjonijiet ex-ante ta’ membru speċifiku fil-forma ta’ impenji ta’ pagament.

L-awtoritajiet maħtura għandhom jivverifikaw li l-Arranġamenti ta’ Impenn ta’ Pagament u l-Arranġamenti ta’ Kollateral Finanzjarju li jkunu daħlu fihom l-SGD u l-istituzzjoni tal-kreditu huma konsistenti ma’ dawn il-linji gwida.