Artikolu 65 Kooperazzjoni fl-infurzar bejn l-Istati Membri

L-Istati Membri għandhom jikkooperaw, bilateralment u multilateralment, ma’ xulxin sabiex jiffaċilitaw il-prevenzjoni u d-detezzjoni ta’ vjeġġi illegali. Għandhom jiskambjaw informazzjoni rilevanti relatata ma’ tali prevenzjoni u detezzjoni, inkluż dwar il-vjeġġi tal-iskart, il-flussi tal-iskart, l-operaturi u l-faċilitajiet, u jikkondividu l-esperjenza u l-għarfien dwar il-miżuri ta’ infurzar, inkluż il-valutazzjoni tar-riskju mwettqa skont l-Artikolu 62(1), fi ħdan strutturi stabbiliti, b’mod partikolari, permezz tal-grupp ta’ infurzar tal-vjeġġi ta’ skart stabbilit skont l-Artikolu 66.

L-Istati Membri għandhom jidentifikaw l-awtorità jew l-awtoritajiet u l-membri tal-persunal permanenti tagħhom li jkunu responsabbli għall-kooperazzjoni msemmija fil-paragrafu 1 u għandhom jidentifikaw ukoll awtorità jew awtoritajiet u membri responsabbli tal-persunal permanenti tagħhom bħala l-punti fokali għall-kontrolli fiżiċi msemmija fl-Artikolu 61(1). L-Istati Membri għandhom jibagħtu dik l-informazzjoni lill-Kummissjoni li għandha tikkompila l-informazzjoni u tqegħedha għad-dispożizzjoni tal-awtoritajiet identifikati u tal-membri tal-persunal permanenti tagħhom.

Fuq it-talba ta’ awtorità fi Stat Membru ieħor, awtorità ta’ Stat Membru tista’ tieħu azzjoni ta’ infurzar kontra persuni, preżenti f’dak l-Istat Membru, suspettati li jkunu mdaħħla fi vjeġġi ta’ skart illegali.