Airteagal 65 Comhar forfheidhmiúcháin idir na Ballstáit

Comhoibreoidh na Ballstáit, ar bhonn déthaobhach agus iltaobhach, i gcomhar le chéile chun éascú a dhéanamh ar loingsithe neamhdhleathacha a chosc agus a bhrath. Malartóidh siad faisnéis ábhartha a bhaineann leis an gcosc agus leis an mbrath sin, lena n-áirítear faoi loingsithe dramhaíola, sruthanna dramhaíola, oibreoirí agus saoráidí, agus roinnfidh siad taithí agus eolas faoi bhearta forfheidhmiúcháin, lena n-áirítear an measúnú riosca a dhéantar de bhun Airteagal 62(1), laistigh de struchtúir bhunaithe, go háirithe, tríd an ngrúpa forfheidhmiúcháin um loingsiú dramhaíola arna bhunú faoi Airteagal 66.

Sainaithneoidh na Ballstáit an t-údarás nó na húdaráis agus comhaltaí a mbuanfhoirne atá freagrach as an gcomhar dá dtagraítear i mír 1 agus sainaithneoidh siad freisin údarás nó údaráis agus comhaltaí freagracha a mbuanfhoirne mar na pointí fócasacha le haghaidh na seiceálacha fisiceacha dá dtagraítear in Airteagal 61(1). Déanfaidh na Ballstáit an fhaisnéis sin a sheoladh chuig an gCoimisiún a thiomsóidh an fhaisnéis sin agus chuirfidh ar fáil í do na húdaráis shainaitheanta agus do chomhaltaí a mbuanfhoirne.

Arna iarraidh sin d’údarás i mBallstát eile, féadfaidh údarás Ballstáit gníomhaíocht forfheidhmiúcháin a ghlacadh i gcoinne daoine atá sa Bhallstát sin a bhfuil amhras ann fúthu go bhfuil siad ag gabháil do loingsiú neamhdhleathach dramhaíola.