RIALACHÁN TARMLIGTHE (AE) 2025/295 ÓN gCOIMISIÚN an 24 Deireadh Fómhair 2024 lena bhforlíontar Rialachán (AE) 2022/2554 ó Pharlaimint na hEorpa agus ón gComhairle a mhéid a bhaineann le caighdeáin theicniúla rialála maidir le coinníollacha lena gcumasaítear stiúradh na ngníomhaíochtaí formhaoirseachta a chomhchuibhiú (Téacs atá ábhartha maidir le LEE)

(1)

Leis an gcreat maidir le hathléimneacht dhigiteach oibríochtúil don earnáil airgeadais a bhunaítear le Rialachán (AE) 2022/2554, tugtar isteach creat formhaoirseachta de chuid an Aontais le haghaidh soláthraithe seirbhísí tríú páirtí teicneolaíochta faisnéise agus cumarsáide (TFC) don earnáil airgeadais a ainmnítear mar sholáthraí criticiúil i gcomhréir le hAirteagal 31 den Rialachán sin.

(2)

Ba cheart do sholáthraí seirbhísí TFC tríú páirtí a chinneann iarraidh dheonach a chur isteach le bheith ainmnithe mar sholáthraí criticiúil an fhaisnéis uile is gá a sholáthar don Údarás Maoirseachta Eorpach (ÚME) is faighteoir chun a chriticiúlacht a léiriú de réir na bprionsabal agus na gcritéar a leagtar amach i Rialachán (AE) 2022/2554. Ar an gcúis sin, ba cheart an fhaisnéis atá le háireamh san iarratas ar iarraidh dheonach a bheith mionsonraithe agus iomlán go leor chun gur féidir measúnú soiléir agus iomlán a dhéanamh ar chriticiúlacht faoi Airteagal 31(11) den Rialachán sin. Ba cheart do ÚME ábhartha aon iarratas neamhiomlán a dhiúltú agus an fhaisnéis atá in easnamh a iarraidh.

(3)

Ba cheart sainaithint dhlíthiúil soláthraithe seirbhísí TFC tríú páirtí a thagann faoi raon feidhme an Chaighdeáin Theicniúil Rialála sin a ailíniú leis an gcód aitheantais a leagtar amach i Rialachán Cur Chun Feidhme ón gCoimisiún arna ghlacadh i gcomhréir le hAirteagal 28(9) ó Rialachán (AE) 2022/2554.

(4)

Mar obair leantach ar na moltaí arna n-eisiúint ag an bPríomh-Fhormhaoirseoir chuig soláthraithe seirbhísí TFC tríú páirtí criticiúla, ba cheart don Phríomh-Fhormhaoirseoir faireachán a dhéanamh ar chomhlíonadh na moltaí ag soláthraithe seirbhísí TFC tríú páirtí criticiúla. D’fhonn faireachán éifeachtúil agus éifeachtach a áirithiú ar na gníomhaíochtaí a rinne na soláthraithe seirbhísí TFC tríú páirtí criticiúla nó ar na réitigh a chuir siad chun feidhme i ndáil leis na moltaí sin, ba cheart don Phríomh-Fhormhaoirseoir a bheith in ann na tuarascálacha dá dtagraítear in Airteagal 35(1), pointe (c), de Rialachán (AE) 2022/2554 a éileamh, tuarascálacha ar dhul chun cinn eatramhacha agus tuarascálacha críochnaitheacha.

(5)

Chun críoch an mheasúnaithe a shonraítear in Airteagal 42(1) de Rialachán (AE) 2022/2554, ar dá réir a bhfuil sé d’oibleagáid ar an bPríomh-Fhormhaoirseoir meastóireacht a dhéanamh i dtaobh an leor an míniú a thugann soláthraí seirbhísí TFC tríú páirtí criticiúil, agus maidir leis an bhfógra ón soláthraí seirbhísí TFC tríú páirtí criticiúil chuig an bPríomh-Fhormhaoirseoir ina insítear go bhfuil sé ar intinn aige na moltaí a fhaightear a leanúint, ba cheart é a chomhlánú le tuairisc ar na gníomhaíochtaí agus ar na bearta a rinneadh chun na rioscaí a leagtar amach sna moltaí a mhaolú, mar aon lena spriocdhátaí faoi seach. Ba cheart an míniú sin a bheith i bhfoirm plean feabhsúcháin.

(6)

Ós rud é go bhfuiltear ag súil go ndéanfaidh an Príomh-Fhormhaoirseoir measúnú ar shocruithe fochonraitheoireachta an tsoláthraí seirbhísí TFC tríú páirtí chriticiúil, is gá teimpléad a fhorbairt chun faisnéis maidir leis na socruithe sin a sholáthar. Ba cheart a chur san áireamh sa teimpléad go bhfuil struchtúir ag na soláthraithe seirbhísí TFC tríú páirtí criticiúla nach ionann agus na struchtúir atá ag eintitis airgeadais.

(7)

A luaithe a eiseoidh an Príomh-Fhormhaoirseoir na moltaí do sholáthraí seirbhísí TFC tríú páirtí criticiúil, agus a luaithe a chuirfidh na húdaráis inniúla na heintitis airgeadais ábhartha ar an eolas faoi na rioscaí a shainaithnítear sna moltaí sin, ba cheart don Phríomh-Fhormhaoirseoir faireachán agus measúnú a dhéanamh ar chur chun feidhme na ngníomhaíochtaí agus na réitigh chun na moltaí a chomhlíonadh ag an soláthraí seirbhísí TFC tríú páirtí criticiúil. Ba cheart do na húdaráis inniúla faireachán agus measúnú a dhéanamh ar a mhéid atá na heintitis airgeadais neamhchosanta ar na rioscaí a shainaithnítear sna moltaí sin. D’fhonn cothrom iomaíochta a choinneáil ar bun agus a gcúraimí faoi seach á ndéanamh acu, go háirithe nuair a bhíonn na rioscaí a shainaithnítear sna moltaí dian agus comhroinnte i measc líon mór eintiteas airgeadais i roinnt Ballstát, ba cheart do na húdaráis inniúla agus don Phríomh-Fhormhaoirseoir araon aon toradh ábhartha atá riachtanach dóibh chun a gcúraimí faoi seach a dhéanamh a chomhroinnt le chéile. Is é is cuspóir don chomhroinnt faisnéise a áirithiú go gcuirfear san áireamh an tionchar ar rioscaí na n-eintiteas airgeadais san aiseolas ón bPríomh-Fhormhaoirseoir chuig an soláthraí seirbhísí TFC tríú páirtí criticiúil i ndáil leis na gníomhaíochtaí agus na leigheasanna atá á gcur chun feidhme ag an soláthraí sin, agus go mbeidh na gníomhaíochtaí maoirseachta a dhéanann na húdaráis inniúla bunaithe ar an measúnú a dhéanann an Príomh-Fhormhaoirseoir.

(8)

Chun go mbeifear in ann faisnéis a chomhroinnt go héifeachtúil agus go héifeachtach, ba cheart do na húdaráis inniúla measúnú a dhéanamh, mar chuid dá ngníomhaíochtaí maoirseachta, ar a mhéid atá na heintitis airgeadais a ndéanann siad maoirseacht orthu neamhchosanta ar na rioscaí a shainaithnítear sna moltaí. Ba cheart an measúnú sin a dhéanamh ar bhealach comhréireach agus rioscabhunaithe. Ba cheart don Phríomh-Fhormhaoirseoir iarraidh ar na húdaráis inniúla torthaí an mheasúnaithe sin a roinnt sna cásanna sonracha ina bhfuil na rioscaí a bhaineann leis na moltaí dian agus comhroinnte i measc líon mór eintiteas airgeadais i roinnt Ballstát. Chun an úsáid is fearr a bhaint as acmhainní na n-údarás inniúil, agus é ag iarraidh torthaí an mheasúnaithe sin a sholáthar, ba cheart don Phríomh-Fhormhaoirseoir a chur san áireamh i gcónaí gurb é cuspóir na n-iarrataí sin meastóireacht a dhéanamh ar chur chun feidhme ghníomhaíochtaí agus réitigh na soláthraithe seirbhísí TFC tríú páirtí criticiúla.

(9)

Chuathas i gcomhairle leis an Maoirseoir Eorpach ar Chosaint Sonraí i gcomhréir le hAirteagal 42(1) de Rialachán (AE) 2018/1725 ó Pharlaimint na hEorpa agus ón gComhairle (2) agus thug sé tuairim uaidh an 22 Iúil 2024.

(10)

Tá an Rialachán sin bunaithe ar na dréachtchaighdeáin theicniúla rialála arna gcur faoi bhráid an Choimisiúin ag na ÚMEnna.

(11)

Rinne Comhchoiste ÚMEnna comhairliúcháin phoiblí oscailte maidir leis na dréachtchaighdeáin theicniúla rialála ar a bhfuil an Rialachán sin bunaithe, rinne sé anailís ar na costais agus ar na tairbhí a d’fhéadfadh a bheith ag baint leo ann agus d’iarr sé comhairle ar an nGrúpa Geallsealbhóirí Baincéireachta arna bhunú i gcomhréir le hAirteagal 37 de Rialachán (AE) Uimh. 1093/2010 ó Pharlaimint na hEorpa agus ón gComhairle (3), ar an nGrúpa Geallsealbhóirí Árachais agus Athárachais agus ar an nGrúpa Geallsealbhóirí Pinsean Ceirde arna bhunú i gcomhréir le hAirteagal 37 de Rialachán (AE) Uimh. 1094/2010 ó Pharlaimint na hEorpa agus ón gComhairle (4), agus ar an nGrúpa Geallsealbhóirí um Urrúis agus Margaí arna bhunú i gcomhréir le hAirteagal 37 de Rialachán (AE) Uimh. 1095/2010 ó Pharlaimint na hEorpa agus ón gComhairle (5),