Raon feidhme an chur i bhfeidhm

Ba cheart d’údaráis inniúla na treoirlínte sin a chur i bhfeidhm i gcomhréir leis an leibhéal cur i bhfeidhm a chinntear in Airteagal 110 de Threoir 2013/36/AE i gcomhréir leis na ceanglais agus na tarscaoiltí a úsáidtear de bhun Airteagal 108 agus Airteagal 109 de Threoir 2013/36/AE.

Maidir le máthairghnóthais agus fochuideachtaí atá san áireamh sa chomhdhlúthú, ba cheart d'údaráis inniúla doimhneacht agus leibhéal gráinneachta a gcuid measúnuithe a choigeartú ionas go mbeidh siad ag teacht lena leibhéal cur i bhfeidhm arna bhunú i gceanglais Rialachán (AE) Uimh. 575/2013 atá sonraithe i gCuid a hAon, Teideal II den Rialachán sin, go háirithe agus tarscaoiltí á n-aithint a chuirtear i bhfeidhm de bhun Airteagal 7 agus 10 de Rialachán (AE) Uimh. 575/2013 agus Airteagal 21 de Threoir 2013/36/AE.

Sa chás go bhfuil fochuideachta ag institiúid sa Bhallstát céanna, ach nár deonaíodh aon tarscaoileadh a shonraítear i gCuid a hAon de Rialachán (AE) Uimh. 575/2013, féadfar cur chuige comhréireach a chur i bhfeidhm chun measúnú a dhéanamh ar leordhóthanacht chaipitil agus leachtachta trí dhíriú ar an measúnú ar leithdháileadh caipitil agus leachtachta ar fud na n-eintiteas agus baic ionchasacha ar inaistritheacht caipitil nó leachtachta laistigh den ghrúpa.

I gcás grúpaí trasteorann, ba cheart ceanglais nós imeachta a chur i bhfeidhm ar bhealach comhordaithe faoi chuimsiú na gcoláistí maoirseoirí a bhunaítear de bhun Airteagal 116 nó Airteagal 51 de Threoir 2013/36/AE. Mínítear i dTeideal 11 na sonraí faoin gcaoi a mbaineann na treoirlínte seo le grúpaí trasteorann agus lena n-eintitis.

Nuair a bheidh foghrúpa leachtachta bunaithe ag institiúid de bhun Airteagal 8 de Rialachán (AE) Uimh. 575/2013, ba cheart d'údaráis inniúla a measúnú a dhéanamh ar rioscaí do leachtacht agus do chistiú, agus bearta maoirseachta a chur i bhfeidhm, maidir leis na heintitis arna gclúdach ag foghrúpa den sórt sin ar leibhéal an fhoghrúpa leachtachta.