Kamp ta’ applikazzjoni

L-awtoritajiet kompetenti għandhom japplikaw dawn il-linji gwida f’konformità mal-livell ta’ applikazzjoni determinat fl-Artikolu 110 tad-Direttiva 2013/36/UE b’mod konformi mar-rekwiżiti u r-rinunzji użati skont l-Artikoli 108 u 109 tad-Direttiva 2013/36/UE.

Għall-impriżi prinċipali u s-sussidjarji inklużi fil-konsolidazzjoni, l-awtoritajiet kompetenti għandhom jaġġustaw il-fond u l-livell tal-granularità tal-valutazzjonijiet tagħhom biex jikkorrispondu mal-livell ta’ applikazzjoni stabbilit fir-rekwiżiti tar-Regolament (UE) 575/2013 speċifikati fl-Ewwel Parti, it-Titolu II ta’ dak ir-Regolament, b’mod partikolari r-rikonoxximent ta’ rinunzji applikati skont l-Artikoli 7 u 10 tar-Regolament (UE) 575/2013 u l-Artikolu 21 tad-Direttiva 2013/36/UE.

Meta istituzzjoni jkollha sussidjarja fl-istess Stat Membru, iżda ma tkun ingħatat l-ebda rinunzja speċifikata fl-Ewwel Parti tar-Regolament (UE) 575/2013, approċċ proporzjonat għall-valutazzjoni tal-adegwatezza tal-kapital u tal-likwidità tista’ tiġi applikata billi tiffoka fuq il-valutazzjoni tal-allokazzjoni tal-kapital u tal-likwidità bejn l-entitajiet u l-impedimenti potenzjali għat-trasferibbiltà tal-kapital jew tal-likwidità fi ħdan il-grupp.

Għal gruppi transfruntiera, ir-rekwiżiti proċedurali għandhom jiġu applikati b’mod koordinat fi ħdan il-qafas tal-kulleġġi tas-superviżuri stabbiliti skont l-Artikolu 116 jew 51 tad-Direttiva 2013/36/UE. It-Titolu 10 jispjega d-dettalji ta’ kif dawn il-linji gwida japplikaw għall-gruppi transfruntiera u l-entitajiet tagħhom.

Meta istituzzjoni tkun stabbiliet sottogrupp ta’ likwidità skont l-Artikolu 8 tar-Regolament (UE) 575/2013, l-awtoritajiet kompetenti għandhom iwettqu l-valutazzjoni tagħhom tar-riskji għal-likwidità u l-finanzjament, u japplikaw miżuri superviżorji, għall-entitajiet koperti minn tali sottogrupp fil-livell tas-sottogrupp ta’ likwidità.