1. Áiritheoidh na Ballstáit go dtabharfaidh FIUnna aiseolas d’eintitis faoi oibleagáid i ndáil le tuairisciú ar amhras de bhun Airteagal 69 de Rialachán (AE) 2024/1624. Leis an aiseolas sin, cumhdófar ar a laghad, cáilíocht na faisnéise arna soláthar, tráthúlacht an tuairiscithe, cur síos ar an amhras agus an doiciméadacht a soláthraíodh agus an cur síos á chur isteach.
Ní thuigfear le haiseolas de bhun an Airteagail seo go gcuimsítear ann gach tuairisc arna cur isteach ag eintitis faoi oibleagáid.
Soláthróidh an FIU aiseolas uair sa bhliain ar a laghad, cibé acu a sholáthraítear é don eintiteas aonair faoi oibleagáid nó do ghrúpaí nó catagóirí d’eintitis faoi oibleagáid, agus líon foriomlán na n-idirbheart amhrasach a thuairiscigh na heintitis faoi oibleagáid á chur san áireamh.
Cuirfear an t-aiseolas ar fáil freisin do mhaoirseoirí ionas go mbeidh siad in ann maoirseacht riosca-bhunaithe a dhéanamh i gcomhréir le hAirteagal 40.
Tuairisceoidh FIUnna ar bhonn bliantúil do AMLA maidir le haiseolas arna sholáthar d’eintitis faoi oibleagáid de bhun an Airteagail seo, agus soláthróidh siad staidreamh maidir le líon na dtuairiscí ar idirbhearta amhrasacha arna gcur isteach ag catagóirí na n-eintiteas faoi oibleagáid.
Faoin 10 Iúil 2028, eiseoidh AMLA moltaí le haghaidh FIUnna maidir le dea-chleachtais agus cineálacha cur chuige i ndáil le haiseolas a sholáthar, lena n-áirítear maidir le cineál agus minicíocht an aiseolais.
An oibleagáid aiseolas a sholáthar, ní chuirfidh sí i mbaol aon obair anailíseach atá á déanamh ag an FIU ná aon imscrúdú nó aon ghníomh riaracháin tar éis don FIU é a scaipeadh, agus ní dhéanfaidh sí difear d’infheidhmeacht na gceanglas cosanta sonraí agus na gceanglas rúndachta.