CAIBIDIL III FIUNNA

Airteagal 25

Áiritheoidh na Ballstáit go dtabharfar de chumhacht do FIUnna treoir a thabhairt d’eintitis faoi oibleagáid faireachán a dhéanamh ar feadh tréimhse a bheidh le sonrú ag an FIU, ar na hidirbhearta nó na gníomhaíochtaí atá á ndéanamh trí chuntas bainc nó cuntas íocaíochta nó cripteashócmhainní amháin nó níos mó nó trí ghaolmhaireacht gnó eile arna mbainistiú ag an eintiteas faoi oibleagáid do dhaoine a bhfuil riosca suntasach sciúrtha airgid, a chionta preideacáide, nó maoinithe na sceimhlitheoireachta ag baint leo. Áiritheoidh na Ballstáit freisin go dtabharfar de chumhacht do na FIUnna treoir a thabhairt don eintiteas faoi oibleagáid torthaí an fhaireacháin a thuairisciú.

Áiritheoidh na Ballstáit go dtabharfar de chumhacht do na FIUnna na bearta faireacháin sin dá dtagraítear san Airteagal seo a fhorchur arna iarraidh sin do FIU ó Bhallstát eile.

Airteagal 29

Áiritheoidh na Ballstáit go rachaidh FIUnna i gcomhar le chéile a mhéid is mó is féidir, beag beann ar a stádas eagraíochtúil.

Airteagal 33

Úsáidfear faisnéis agus doiciméid arna bhfáil de bhun Airteagail 29, 31 agus 32 chun cúraimí an FIU a chur i gcrích mar a leagtar síos sa Treoir seo. Agus faisnéis agus doiciméid á malartú de bhun Airteagail 29 agus 31, féadfaidh an FIU a tharchuireann an fhaisnéis srianta agus coinníollacha a fhorchur maidir le húsáid na faisnéise sin, ach amháin i gcás inarb éard atá sa tarchur tuairisc arna cur isteach ag eintiteas faoi oibleagáid de bhun Airteagal 69(1) de Rialachán (AE) 2024/1624, nó faisnéis a eascraíonn as sin, a bhaineann le Ballstát eile ina n-oibríonn an t-eintiteas faoi oibleagáid tríd an tsaoirse chun seirbhísí a sholáthar agus nach n-áirítear aon nasc inti chuig Ballstát an FIU a tharchuireann an fhaisnéis. An FIU a fhaigheann an fhaisnéis nó na doiciméid sin, déanfaidh sé na srianta agus na coinníollacha sin a chomhlíonadh.

Áiritheoidh na Ballstáit go n-ainmneoidh na FIUnna teagmhálaí nó pointe teagmhála amháin ar a laghad le bheith freagrach as iarrataí ar fhaisnéis a fháil ó FIUnna i mBallstáit eile.

Airteagal 35

Ní chuirfidh difríochtaí idir na sainmhínithe ar choireanna preideacáide, sna dlíthe náisiúnta, aon bhac ar chumas FIUnna cúnamh a thabhairt do FIU eile ná ní chuirfidh siad teorainn le malartú, scaipeadh ná úsáid faisnéise de bhun Airteagail 31, 32, 33 agus 34.