Airteagal 16 Comhar idir údaráis inniúla na mBallstát, an Coimisiún, Europol, Eurojust agus Oifig an Ionchúisitheora Phoiblí Eorpaigh

1.   I gcás ina meastar gur de chineál trasteorann iad na cionta coiriúla dá dtagraítear in Airteagail 3 agus 4, déanfaidh údaráis inniúla na mBallstát lena mbaineann breithniú ar an bhfaisnéis a bhaineann leis na cionta coiriúla sin a tharchur chuig comhlachtaí inniúla iomchuí.

Gan dochar do na rialacha maidir leis an gcomhar trasteorann agus cúnamh frithpháirteach dlí in ábhair choiriúla, oibreoidh na Ballstáit, Europol, Eurojust, Oifig an Ionchúisitheora Phoiblí Eorpaigh agus an Coimisiún, laistigh dá n-inniúlachtaí faoi seach, i gcomhar le chéile sa chomhrac i gcoinne na gcionta coiriúla dá dtagraítear in Airteagail 3 agus 4. Chuige sin, soláthróidh Europol agus Eurojust, i gcás inarb iomchuí, an cúnamh teicniúil agus oibríochtúil a theastaíonn ó na húdaráis náisiúnta inniúla chun comhordú a n-imscrúduithe a éascú.

2.   Féadfaidh an Coimisiún, i gcás inar gá, líonra saineolaithe agus cleachtóirí a bhunú chun dea-chleachtais a chomhroinnt agus, i gcás inarb iomchuí, cúnamh a thabhairt d’údaráis inniúla na mBallstát chun imscrúdú cionta a bhaineann le sárú ar bhearta sriantacha de chuid an Aontais a éascú. Leis an líonra sin, i gcás inarb iomchuí, féadfar mapáil a sholáthar freisin, a bheidh ar fáil go poiblí agus a nuashonrófar go tráthrialta, ar na rioscaí a bhaineann le sáruithe nó le himchéimniú ar bhearta sriantacha de chuid an Aontais i limistéir gheografacha shonracha, agus i leith earnálacha agus gníomhaíochtaí sonracha.

3.   I gcás ina bhfuil comhar le húdaráis inniúla tríú tíortha i gceist leis an gcomhar dá dtagraítear i mír 1, ba cheart dul i mbun an chomhair sin agus lánurraim á tabhairt do chearta bunúsacha agus don dlí idirnáisiúnta.

4.   Déanfaidh údaráis inniúla na mBallstát faisnéis a chomhroinnt go minic agus ar bhonn tráthrialta leis an gCoimisiún agus le húdaráis inniúla eile, ar faisnéis í faoi shaincheisteanna praiticiúla go háirithe, maidir le patrúin imchéimniúcháin, amhail struchtúir chun úinéireacht thairbhiúil agus rialú tairbhiúil sócmhainní a cheilt.