Artikolu 16 Kooperazzjoni bejn l-awtoritajiet kompetenti tal-Istati Membri, il-Kummissjoni, il-Europol, il-Eurojust u l-Uffiċċju tal-Prosekutur Pubbliku Ewropew

1.   Meta jkun hemm suspett li r-reati kriminali msemmija fl-Artikoli 3 u 4 jkunu ta’ natura transfruntiera, l-awtoritajiet kompetenti tal-Istati Membri kkonċernati għandhom jikkunsidraw li jirreferu l-informazzjoni relatata ma’ dawk ir-reati kriminali lill-korpi kompetenti xierqa.

Mingħajr preġudizzju għar-regoli dwar il-kooperazzjoni transfruntiera u l-assistenza legali reċiproka f’materji kriminali, l-Istati Membri, il-Europol, il-Eurojust, l-Uffiċċju tal-Prosekutur Pubbliku Ewropew u l-Kummissjoni għandhom, fil-kompetenzi rispettivi tagħhom, jikkooperaw flimkien fil-ġlieda kontra r-reati kriminali msemmija fl-Artikoli 3 u 4. Għal dak il-għan, il-Europol u l-Eurojust għandhom, meta jkun xieraq, jipprovdu l-assistenza teknika u operazzjonali meħtieġa mill-awtoritajiet nazzjonali kompetenti biex jiffaċilitaw il-koordinazzjoni tal-investigazzjonijiet tagħhom.

2.   Il-Kummissjoni tista’, meta meħtieġ, tistabbilixxi network ta’ esperti u prattikanti biex jikkondividu l-aħjar prattiki u, fejn xieraq, jipprovdu assistenza lill-awtoritajiet kompetenti tal-Istati Membri sabiex tiffaċilita l-investigazzjoni ta’ reati relatati mal-ksur tal-miżuri restrittivi tal-Unjoni. Dak in-network, meta xieraq, jista’ jipprovdi wkoll immappjar pubblikament disponibbli u aġġornat regolarment tar-riskji ta’ ksur jew ċirkomvenzjoni tal-miżuri restrittivi tal-Unjoni f’żoni ġeografiċi speċifiċi, u fir-rigward ta’ setturi u attivitajiet speċifiċi.

3.   Fejn il-kooperazzjoni msemmija fil-paragrafu 1 tinvolvi kooperazzjoni mal-awtoritajiet kompetenti ta’ pajjiżi terzi, dik il-kooperazzjoni għandha sseħħ b’rispett sħiħ għad-drittijiet fundamentali u l-liġi internazzjonali.

4.   L-awtoritajiet kompetenti tal-Istati Membri għandhom jikkondividu fuq bażi regolari u frekwenti informazzjoni dwar kwistjonijiet prattiċi, b’mod partikolari, mudelli ta’ ċirkomvenzjoni, bħal strutturi biex jaħbu s-sjieda benefiċjarja u l-kontroll tal-assi, mal-Kummissjoni u ma’ awtoritajiet kompetenti oħrajn.