Airteagal 9 Údaráis inniúla agus pointí teagmhála aonair

1.   Ainmneoidh nó bunóidh gach Ballstát údarás inniúil amháin nó níos mó a bheidh freagrach as na rialacha a leagtar amach sa Treoir seo a chur i bhfeidhm i gceart agus, i gcás inar gá, a fhorfheidhmiú ar an leibhéal náisiúnta.

A mhéid a bhaineann leis na heintitis chriticiúla sna hearnálacha a leagtar amach i bpointí 3 agus 4 den tábla san Iarscríbhinn a ghabhann leis an Treoir seo, is iad na húdaráis inniúla dá dtagraítear in Airteagal 46 de Rialachán (AE) 2022/2554 a bheidh ina n-údaráis inniúla, i bprionsabal. A mhéid a bhaineann leis na heintitis chriticiúla san earnáil a leagtar amach i bpointe 8 den tábla san Iarscríbhinn a ghabhann leis an Treoir seo, is iad na húdaráis inniúla faoi Airteagal 8 de Threoir (AE) 2022/2555 a bheidh ina n-údaráis inniúla i bprionsabal. Féadfaidh na Ballstáit údarás inniúil éagsúil a ainmniú do na hearnálacha sin a leagtar amach i bpointí 3, 4 agus 8 den tábla san Iarscríbhinn a ghabhann leis an Treoir seo i gcomhréir leis na creataí náisiúnta atá ann cheana.

I gcás ina n-ainmneoidh nó ina mbunóidh na Ballstáit níos mó ná údarás inniúil amháin, leagfaidh siad amach go soiléir cúraimí sonracha gach -údaráis lena mbaineann, agus áiritheoidh siad go n-oibreoidh siad i gcomhar go héifeachtach chun a gcuid cúraimí faoin Treoir seo a chomhlíonadh, lena n-áirítear cúraimí maidir le hainmniú agus gníomhaíochtaí an phointe teagmhála aonair dá dtagraítear i mír 2.

2.   Ainmneoidh nó bunóidh gach Ballstát aon phointe teagmhála aonair, chun feidhm idirchaidrimh a fheidhmiú chun críche comhar trasteorann a áirithiú le pointí teagmhála aonair na mBallstát eile agus leis an nGrúpa um Athléimneacht Eintiteas Criticiúil dá dtagraítear in Airteagal 19 (“pointe teagmhála aonair”). I gcás inarb ábhartha, ainmneoidh Ballstát a phointe teagmhála aonair laistigh d’údarás inniúil. I gcás inarb ábhartha, féadfaidh Ballstát foráil a dhéanamh freisin go bhfeidhmeoidh a phointe teagmhála aonair feidhm idirchaidrimh leis an gCoimisiún agus go n-áiritheoidh sé comhar le tríú tíortha.

3.   Faoin 17 Iúil 2028, agus gach 2 bhliain ina dhiaidh sin, cuirfidh na pointí teagmhála aonair tuarascáil achomair faoi bhráid an Choimisiúin agus an Ghrúpa um Athléimneacht Eintiteas Criticiúil dá dtagraítear in Airteagal 19 maidir leis na fógraí a fuarthas, lena n-áirítear an líon fógraí, cineál na dteagmhas ar tugadh fógra ina leith agus na bearta a rinneadh i gcomhréir le hAirteagal 15(3).

Déanfaidh an Coimisiún, i gcomhar leis an nGrúpa um Athléimneacht Eintiteas Criticiúil, teimpléad tuairiscithe comhchoiteann a fhorbairt. Féadfaidh na húdaráis inniúla an teimpléad tuairiscithe sin a úsáid, ar bhonn deonach, chun tuarascálacha achoimre dá dtagraítear sa chéad fhomhír a thíolacadh.

4.   Áiritheoidh gach Ballstát go mbeidh na cumhachtaí agus na hacmhainní leordhóthanacha airgeadais, daonna agus teicniúla ag a údarás inniúil agus ag an bpointe teagmhála aonair, chun na cúraimí a shannfar dóibh a chur i gcrích ar bhealach éifeachtach éifeachtúil.

5.   Áiritheoidh gach Ballstát go rachaidh a údarás inniúil, nuair is iomchuí agus i gcomhréir le dlí an Aontais agus an dlí náisiúnta, i gcomhairle le húdaráis náisiúnta ábhartha eile agus go n-oibreoidh siad i gcomhar leo, lena n-áirítear na húdaráis sin a bhfuil an chosaint shibhialta, forfheidhmiú an dlí agus cosaint sonraí pearsanta mar chúraimí orthu, agus le heintitis chriticiúla agus páirtithe leasmhara ábhartha.

6.   Áiritheoidh gach Ballstát go n-oibreoidh a údarás inniúil faoin Treoir seo i gcomhar le, húdaráis inniúla faoi Threoir (AE) 2022/2555, agus go ndéanann sé faisnéis a mhalartú leo i dtaca le rioscaí cibearshlándála, cibearbhagairtí agus cibirtheagmhais agus rioscaí, bagairtí teagmhais, nach bhfuil cibirghné ag baint leo, a dhéanann difear d’eintitis chriticiúla, lena n-áirítear i dtaca le bearta ábhartha arna ndéanamh ag a údaráis inniúla arna n-ainmniú faoin Treoir seo agus faoi Threoir (AE) 2022/2555.

7.   Laistigh de 3 mhí ón údarás inniúil agus an pointe teagmhála aonair a ainmniú nó a bhunú, tabharfaidh gach Ballstát fógra don Choimisiún faoi chéannacht an údaráis inniúil agus an phointe theagmhála aonair sin mar aon faoina gcuid cúraimí agus freagrachtaí faoin Treoir seo, a gcuid sonraí teagmhála agus aon athrú a dhéanfar orthu ina dhiaidh sin. Cuirfidh na ballstáit an Choimisiún ar an eolas i gcás ina gcinnfidh na Ballstáit údaráis eile seachas na húdaráis inniúla dá dtagraítear i mír 1, an dara fomhír, a ainmniú mar na húdaráis inniúla i ndáil leis na heintitis chriticiúla sna hearnálacha a leagtar amach i bpointí 3, 4 agus 8 den tábla san Iarscríbhinn. Déanfaidh gach Ballstát an t-údarás inniúil agus an pointe teagmhála aonair a d’ainmnigh siad a phoibliú.

8.   Cuirfidh an Coimisiún liosta de na pointí teagmhála aonair ar fáil go poiblí..