Airteagal 4 Soláthar seirbhísí fánaíochta miondíola rialáilte

1.   Ní dhéanfaidh soláthraithe seirbhísí fánaíochta aon fhormhuirear a thobhach sa bhreis ar an bpraghas miondíola baile ar chustaiméirí seirbhísí fánaíochta i mBallstát ar bith as aon ghlaonna fánaíochta rialáilte a dhéantar nó a fhaightear, as aon teachtaireachtaí SMS fánaíochta rialáilte a sheoltar ná as aon seirbhísí fánaíochta sonraí rialáilte a úsáidtear, ná ní thoibheoidh siad aon mhuirear ginearálta lena gcumasófar an trealamh teirminéil nó an tseirbhís teirminéil a úsáid thar lear, faoi réir Airteagal 5 agus Airteagal 6.

2.   Ní thairgfidh soláthraithe seirbhísí fánaíochta seirbhísí fánaíochta miondíola rialáilte faoi dhálaí nach bhfuil chomh fabhrach leis na dálaí sin a thairgtear sa bhaile, go háirithe i dtéarmaí cháilíocht na seirbhíse dá bhforáiltear sa chonradh miondíola, i gcás ina bhfuil an ghlúin chéanna de líonraí agus teicneolaíochtaí cumarsáide soghluaiste ar fáil ar an líonra a bhfuil cuairt á tabhairt air.

Seachnóidh oibreoirí cumarsáide soghluaiste moilleanna míréasúnacha ar aistrithe idir líonraí ag trasnuithe teorann inmheánacha an Aontais.

3.   Chun rannchuidiú le feidhmiú comhsheasmhach an Airteagail seo, déanfaidh BEREC, faoin 1 Eanáir 2023, agus tar éis dó dul i gcomhairle le geallsealbhóirí agus i ndlúthchomhar leis an gCoimisiún, a threoirlínte miondíola a nuashonrú maidir le cur chun feidhme na mbeart cáilíochta seirbhíse.