Artikolu 4 Forniment ta’ servizzi tar-roaming bl-imnut regolati

1.   Il-fornituri tar-roaming ma għandhom jitolbu l-ebda tariffa supplimentari addizzjonali mal-prezz bl-imnut domestiku lill-klijenti tar-roaming fi kwalunkwe Stat Membru għal kwalunkwe telefonata bir-roaming regolata magħmula jew riċevuta, għal kwalunkwe messaġġ SMS bir-roaming regolat mibgħut jew għal kwalunkwe servizz tar-roaming regolat tad-data użat, u lanqas ma għandhom jimponu xi tariffa ġenerali biex it-tagħmir jew is-servizz terminali jkun jista’ jintuża barra mill-pajjiż, soġġett għall-Artikoli 5 u 6.

2.   Il-fornituri tar-roaming ma għandhomx joffru servizzi regolati tar-roaming bl-imnut taħt kundizzjonijiet li huma inqas vantaġġużi minn dawk offruti domestikament, b’mod partikolari f’termini ta’ kwalità tas-servizz previsti fil-kuntratt bl-imnut, meta l-istess ġenerazzjoni tan-networks tal-komunikazzjonijiet mobbli u teknoloġiji jkunu disponibbli fuq in-network miżjur.

L-operaturi tal-komunikazzjoni mobbli għandhom jevitaw dewmien mhux raġonevoli fit-trasferimenti bejn in-networks fil-punti ta’ qsim tal-fruntieri interni tal-Unjoni.

3.   Sabiex jikkontribwixxi għall-applikazzjoni konsistenti ta’ dan l-Artikolu, sal-1 ta’ Jannar 2023, wara konsultazzjoni mal-partijiet ikkonċernati u f’kooperazzjoni mill-qrib mal-Kummissjoni, il-BEREC għandu jaġġorna l-linji gwida tiegħu dwar il-bejgħ bl-imnut fir-rigward tal-implimentazzjoni tal-miżuri tal-kwalità tas-servizz.