Airteagal 21 Comhlíontacht a chomhthiomsú

1.   Maidir le hiarmhéideanna comhlíontachta, do dhéine GCT dá dtagraítear in Airteagal 4(2) agus, más infheidhme, fosprioc RFNBO dá dtagraítear in Airteagal 5(3), de chuid dhá long nó níos mó, arna ríomh i gcomhréir le hAirteagal 16(4), féadfar iad a chomhthiomsú chun críocha na ceanglais a chomhlíonadh a leagtar amach in Airteagal 4 agus, más infheidhme, in Airteagal 5(3). Ní fhéadfar iarmhéid comhlíontachta loinge a chur ar áireamh i níos mó ná aon chomhthiomsú amháin sa tréimhse tuairiscithe chéanna.

Féadfar dhá chomhthiomsú ar leith a úsáid le haghaidh na sprice déine GCT agus le haghaidh na forsprice do RFNBO.

2.   Cláróidh an chuideachta i mbunachar sonraí FuelEU go bhfuil sé de rún aici iarmhéid comhlíontachta na loinge a chur san áireamh i gcomhthiomsú, leithdháileadh iarmhéid comhlíontachta iomlán an chomhthiomsaithe ar gach long ar leith, agus rogha an fhíoraitheora a roghnófar chun an leithdháileadh sin a fhíorú.

3.   I gcás ina bhfuil na longa atá rannpháirteach sa chomhthiomsú á rialú ag dhá chuideachta nó níos mó, déanfaidh gach cuideachta lena mbaineann sa chomhthiomsú, i mbunachar sonraí FuelEU, sonraí an chomhthiomsaithe arna gclárú i mbunachar sonraí FuelEU a bhailíochtú, lena n-áirítear leithdháileadh iarmhéid comhlíontachta iomlán an chomhthiomsaithe ar longa an chomhthiomsaithe agus rogha an fhíoraitheora a roghnófar chun leithdháileadh iarmhéid comhlíontachta iomlán an chomhthiomsaithe ar gach long ar leith a fhíorú.

4.   Ní bheidh comhthiomsú bailí ach amháin más comhlíonadh dearfach é an comhlíonadh iomlán arna chomhthiomsú, mura mbeidh easnamh comhlíontachta níos airde, tar éis leithdháileadh na comhlíontachta comhthiomsaithe, ag longa a raibh easnamh comhlíontachta acu arna ríomh i gcomhréir le Airteagal 16(4) agus mura mbeidh easnamh comhlíontachta, tar éis leithdháileadh na comhlíontachta comhthiomsaithe, ag longa a raibh barrachas comhlíontachta acu arna ríomh i gcomhréir le hAirteagal 16(4).

5.   Ní áireofar long i gcomhthiomsú mura gcomhlíonfaidh sí an oibleagáid a leagtar amach in Airteagal 24.

6.   Más barrachas comhlíontachta le haghaidh long aonair is toradh ar iarmhéid comhlíontachta iomlán an chomhthiomsaithe, beidh feidhm ag Airteagal 20(1).

7.   Ní bheidh feidhm ag Airteagal 20(2) maidir le long atá rannpháirteach sa chomhthiomsú.

8.   Faoin 30 Aibreán den tréimhse fíorúcháin, déanfaidh an fíoraitheoir roghnaithe taifead i mbunachar sonraí FuelEU ar chomhdhéanamh críochnaitheach an chomhthiomsaithe agus ar leithdháileadh iarmhéid comhlíontachta iomlán an chomhthiomsaithe ar gach long ar leith.