Artikolu 21 Akkomunament tal-konformità

1.   Il-bilanċi ta’ konformità għall-intensità tal-gassijiet serra msemmija fl-Artikolu 4(2) u, jekk applikabbli, is-submira tal-RFNBO kif imsemmi fl-Artikolu 5(3) ta’ żewġ bastimenti jew aktar, kif ikkalkolati f’konformità mal-Artikolu 16(4), jistgħu jinġabru flimkien għall-finijiet ta’ konformità mar-rekwiżiti stipulati fl-Artikolu 4 u jekk applikabbli, fl-Artikolu 5(3). Il-bilanċ ta’ konformità ta’ bastiment ma jistax jiġi inkluż f’aktar minn akkomunament wieħed fl-istess perjodu ta’ rappurtar.

Jistgħu jintużaw żewġ akkomunamenti separati għall-mira tal-intensità tal-gassijiet serra u għas-submira għall-RFNBO.

2.   Il-kumpanija għandha tirreġistra lill-bażi tad-data FuelEU l-intenzjoni tagħha li tinkludi l-bilanċ ta’ konformità tal-bastiment f’akkomunament, l-allokazzjoni tal-bilanċ totali ta’ konformità tal-akkomunament għal kull bastiment individwali u l-għażla tal-verifikatur magħżul għall-verifika ta’ dik l-allokazzjoni.

3.   Meta l-bastimenti li jipparteċipaw fl-akkomunament ikunu kkontrollati minn żewġ kumpaniji jew aktar, id-dettalji tal-akkomunament rreġistrati fil-bażi tad-data FuelEU, inkluż l-allokazzjoni tal-bilanċ totali ta’ konformità tal-akkomunament lill-bastimenti tal-akkomunament u l-għażla tal-verifikatur magħżul għall-verifika tal-allokazzjoni tal-bilanċ totali ta’ konformità tal-akkomunament għal kull bastiment individwali, għandha tiġi vvalidati fil-bażi tad-data FuelEU mill-kumpaniji kollha kkonċernati fl-akkomunament.

4.   Akkomunament ikun validu biss jekk il-bilanċ totali ta’ konformità tal-akkomunament ikun pożittiv, jekk il-bastimenti li kellhom defiċit ta’ konformità kif ikkalkulat f’konformità mal-Artikolu 16(4) ma jkollhomx defiċit ta’ konformità ogħla wara l-allokazzjoni tal-akkomunament tal-konformità u jekk il-bastimenti li kellhom surplus ta’ konformità kif ikkalkulat f’konformità mal-Artikolu 16(4) ma jkollhomx defiċit ta’ konformità wara l-allokazzjoni tal-akkomunament tal-konformità.

5.   Bastiment ma għandux jiġi inkluż f’akkomunament jekk ma jikkonformax mal-obbligu stipulat fl-Artikolu 24.

6.   Jekk il-bilanċ totali ta’ konformità tal-akkomunament jirriżulta f’surplus ta’ konformità għal bastiment individwali, għandu japplika l-Artikolu 20(1).

7.   L-Artikolu 20(2) ma għandux japplika għal bastiment li jipparteċipa fl-akkomunament.

8.   Sat-30 ta’ April tal-perjodu ta’ verifika, il-verifikatur magħżul għandu jirreġistra fil-bażi tad-data FuelEU l-kompożizzjoni definittiva tal-akkomunament u l-allokazzjoni tal-bilanċ totali ta’ konformità tal-akkomunament għal kull bastiment individwali.