Airteagal 74 Rialaitheoireacht

1.   Measfar gur rialaitheoir é an sealbhóir sonraí sláinte chun na sonraí leictreonacha sláinte arna n-iarraidh de bhun Airteagal 60(1) a chur ar fáil don chomhlacht rochtana sonraí sláinte.

Measfar gur rialaitheoir é an comhlacht rochtana sonraí sláinte chun na sonraí leictreonacha pearsanta sláinte a phróiseáil agus a chúraimí á gcomhlíonadh aige de bhun an Rialacháin seo.

D’ainneoin an dara fomhír den mhír seo, measfar go ngníomhóidh an comhlacht rochtana sonraí sláinte mar phróiseálaí thar ceann an úsáideora sonraí sláinte ag gníomhú dó mar rialaitheoir chun próiseáil a dhéanamh ar na sonraí leictreonacha pearsanta sláinte de bhun cead sonraí arna eisiúint faoi Airteagal 68 sa timpeallacht shlán phróiseála agus sonraí á soláthar tríd timpeallacht den sórt sin nó chun sonraí den sórt sin a phróiseáil de bhun iarraidh ar shonraí sláinte arna formheas faoi Airteagal 69 ionas go ngintear freagra.

2.   Sna cásanna dá dtagraítear in Airteagal 72(6), measfar an sealbhóir iontaofa sonraí sláinte a bheith ina rialaitheoir ar an bpróiseáil a dhéanann sé ar shonraí leictreonacha sláinte pearsanta a bhaineann le sonraí leictreonacha sláinte a sholáthar don úsáideoir sonraí sláinte de bhun cead sonraí nó iarraidh ar shonraí sláinte. Measfar go ngníomhóidh an sealbhóir iontaofa sonraí sláinte mar phróiseálaí thar ceann an úsáideora sonraí sláinte agus sonraí á soláthar aige trí thimpeallacht shlán phróiseála.

3.   Féadfaidh an Coimisiún, trí bhíthin gníomhartha cur chun feidhme, teimpléad a bhunú le haghaidh comhaontuithe idir rialaitheoirí agus próiseálaithe faoi mhíreanna (1) agus (2) den Airteagal seo. Glacfar na gníomhartha cur chun feidhme sin i gcomhréir leis an nós imeachta scrúdúcháin dá dtagraítear in Airteagal 98(2).