Airteagal 2 Sainmhínithe

ciallaíonn ‘millíní plaisteacha’ mais d’ábhar ina bhfuil polaiméir, gan beann ar a cruth, a foirm, nó a méid, a tháirgtear le haghaidh an mhúnlaithe in oibríochtaí monaraíochta táirgí plaisteacha, gan beann ar a húsáid iarbhír;

ciallaíonn ‘doirteadh’ millíní plaisteacha arna n-éalú óna n-imshrianadh príomhúil ar ócáid amháin nó in imeacht tréimhse fhada laistigh de theorainneacha suiteála nó laistigh d’fheithiclí bóthair, vaigíní iarnróid nó soithí uiscebhealaí intíre ina n-iompraítear millíní plaisteacha;

ciallaíonn ‘caillteanas’ millíní plaisteacha arna n-éalú chuig an gcomhshaol ar ócáid amháin nó in imeacht tréimhse fhada ag aon chéim den slabhra soláthair, as teorainn na suiteála nó ó fheithiclí bóthair, vaigíní iarnróid, soithí uiscebhealaí intíre nó soithí farraige, ina n-iompraítear millíní plaisteacha agus a fhágann calafort Ballstáit nó a thugann cuairt ar chalafort Ballstáit;

ciallaíonn ‘suiteáil’ aon áitreabh, struchtúr, suíomh, láithreán nó áit ina ndéantar gníomhaíocht eacnamaíoch amháin nó níos mó a bhaineann le millíní plaisteacha a láimhseáil;

ciallaíonn ‘oibreoir eacnamaíoch’ aon duine nádúrtha nó dlítheanach a oibríonn nó a rialaíonn an tsuiteáil i bpáirt nó ina hiomláine, nó, i gcás ina bhforáiltear don mhéid sin sa dlí náisiúnta, duine ar tarmligeadh an chumhacht chinntitheach eacnamaíoch ar fheidhmiú teicniúil na suiteála chuige nó chuici;

ciallaíonn ‘iompróir de chuid an Aontais’ aon duine nádúrtha nó duine dlítheanach atá bunaithe i mBallstát, a ghabhann d’iompar millíní plaisteacha mar chuid dá ghníomhaíocht nó dá gníomhaíocht eacnamaíoch trí úsáid a bhaint as feithiclí bóthair, vaigíní iarnróid nó soithí uiscebhealaí intíre;

ciallaíonn ‘iompróir nach iompróir de chuid an Aontais é’ aon duine nádúrtha nó duine dlítheanach atá bunaithe i dtríú tír, a ghabhann d’iompar millíní plaisteacha mar chuid dá ghníomhaíocht nó dá gníomhaíocht eacnamaíoch san Aontas trí úsáid a bhaint as feithiclí bóthair, vaigíní iarnróid nó soithí uiscebhealaí intíre;

ciallaíonn ‘seoltóir’ aon duine nádúrtha nó dlítheanach a thug conradh iompair earraí i gcrích nó ar tugadh conradh iompair earraí i gcrích in ainm an duine sin nó thar ceann an duine sin le haon duine nádúrtha nó dlítheanach a bhíonn ag gabháil d’iompar millíní plaisteacha mar chuid dá ghníomhaíocht nó dá gníomhaíocht eacnamaíoch trí shoithí farraige a úsáid;

ciallaíonn ‘oibreoir’ úinéir nó bainisteoir soithigh farraige;

ciallaíonn ‘gníomhaire’ aon duine atá sainordaithe nó údaraithe chun faisnéis a sholáthar thar ceann an oibreora;

ciallaíonn ‘micrifhiontar, fiontar beag nó fiontar meánmhéide’ micrifhiontar, fiontar beag nó fiontar meánmhéide de réir bhrí na hIarscríbhinne a ghabhann le Moladh 2003/361/CE ón gCoimisiún (18);

ciallaíonn ‘fiontar mór’ fiontar nach micrifhiontar, fiontar beag nó fiontar meánmhéide é;

ciallaíonn ‘údarás inniúil’ údarás nó comhlacht atá ainmnithe ag Ballstát chun a oibleagáidí faoin Rialachán seo a dhéanamh;

ciallaíonn ‘ionadaí údaraithe’ duine nádúrtha nó dlítheanach atá bunaithe san Aontas a ainmníodh le sainordú i scríbhinn ó iompróir nach iompróir de chuid an Aontais é de bhun Airteagal 4, chun gníomhú thar a cheann i ndáil le cúraimí sonracha maidir leis na hoibleagáidí a leagtar síos in Airteagal 3(2) agus (3), in Airteagal 5(6), an tríú fomhír, agus in Airteagal 15(1);

ciallaíonn ‘deimhnitheoir’ aon duine de na daoine nádúrtha nó dlítheanacha seo a leanas:

ciallaíonn ‘measúnú comhréireachta’ an próiseas lena léirítear cé acu a chomhlíonann nó nach gcomhlíonann suiteáil na rialacha is infheidhme den Rialachán seo agus de na gníomhartha tarmligthe a ghlactar ar a bhonn sin;

ciallaíonn ‘cead’ údarú i scríbhinn, arna eisiúint ag an údarás inniúil ábhartha, chun suiteáil a oibriú.