Airteagal 10 Measúnú riosca uileghnó

1.   Glacfaidh na heintitis faoi oibleagáid bearta iomchuí, atá comhréireach le cineál a ngnó, lena n-áirítear a rioscaí agus a chasta atá sé, agus a méid, chun rioscaí go dtarlódh sciúradh airgid agus maoiniú na sceimhlitheoireachta a bhfuil siad neamhchosanta orthu a shainaithint agus a mheasúnú, chomh maith le rioscaí nach gcuirfí smachtbhannaí airgeadais spriocdhírithe chun feidhme nó go ndéanfaí iad a sheachaint, agus an méid seo a leanas á gcur san áireamh, ar a laghad:

Sula seolfar táirgí, seirbhísí nó cleachtais ghnó nua, lena n-áirítear úsáid bealaí seachadta nua agus teicneolaíochtaí nua nó teicneolaíochtaí atá ag forbairt, i gcomhar le táirgí agus seirbhísí nua nó táirgí agus seirbhísí atá ann cheana nó sula dtosófar ar sheirbhís nó táirge atá ann cheana a sholáthar do ghrúpa custaiméirí nua nó i limistéar geografach nua, déanfaidh na heintitis faoi oibleagáid na rioscaí sciúrtha airgid agus maoinithe sceimhlitheoireachta gaolmhara a shainaithint agus a mheasúnú agus déanfaidh siad bearta iomchuí chun na rioscaí sin a bhainistiú agus a mhaolú.

2.   Déanfar an measúnú riosca uileghnó a tharraingíonn an t-eintiteas faoi oibleagáid suas de bhun mhír 1 a dhoiciméadú, a choinneáil cothrom le dáta agus a athbhreithniú go rialta, lena n-áirítear i gcás ina ndéanann aon teagmhas inmheánach nó seachtrach difear suntasach do na rioscaí sciúrtha airgid agus maoinithe sceimhlitheoireachta a bhaineann le gníomhaíochtaí, táirgí, idirbhearta, bealaí seachadta, custaiméirí nó criosanna gníomhaíochtaí geografacha an eintitis faoi oibleagáid. Cuirfear ar fáil do mhaoirseoirí é arna iarraidh sin dóibh.

Déanfaidh an t-oifigeach um chomhlíonadh an measúnú riosca uileghnó a tharraingt suas agus formheasfaidh an comhlacht bainistíochta i gcáil a fheidhme bainistíochta é agus, i gcás inar ann don chomhlacht sin, cuirfidh sé in iúl don chomhlacht bainistíochta i gcáil a fheidhme maoirseachta é.

3.   Cé is moite d’institiúidí creidmheasa, institiúidí airgeadais, soláthraithe seirbhísí sluachistiúcháin agus idirghabhálaithe sluachistiúcháin, féadfaidh maoirseoirí a chinneadh nach gceanglaítear measúnuithe riosca uileghnó doiciméadaithe aonair i gcás ina bhfuil na rioscaí sonracha a bhaineann leis an earnáil soiléir ar bhealach bunúsach agus i gcás ina dtuigtear iad.

4.   Faoin 10 Iúil 2026, eiseoidh MLA treoirlínte maidir leis na híoscheanglais i gcomhair ábhar an mheasúnaithe riosca uileghnó a tharraingíonn an t-eintiteas faoi oibleagáid suas de bhun mhír 1, agus maidir leis na foinsí breise faisnéise a bheidh le cur san áireamh agus an measúnú riosca uileghnó á dhéanamh.