Airteagal 79 Cuntais anaithnide agus scaireanna iompróra agus barántais scaire iompróra

1.   Cuirfear toirmeasc ar institiúidí creidmheasa, institiúidí airgeadais agus soláthraithe seirbhísí cripteashócmhainní cuntais anaithnide bainc agus íocaíochta, pasleabhair anaithnide, taisceadáin anaithnide nó cuntais cripteashócmhainní anaithnide a choinneáil, chomh maith le haon chuntas eile a lamhálann d’anaithnidiú shealbhóir an chuntais custaiméara, nó d’anaithnidiú nó doiléiriú méadaithe idirbheart, lena n-áirítear trí bhoinn lena gcuirtear leis an anaithnideacht.

Beidh úinéirí agus tairbhithe cuntas anaithnid bainc agus íocaíochta, pasleabhar anaithnid, taisceadán anaithnid atá i seilbh institiúidí creidmheasa nó institiúidí airgeadais, nó cuntas cripteashócmhainní atá ann cheana féin faoi réir bearta díchill chuí do chustaiméirí sula ndéanfar na cuntais, na pasleabhair, nó na taisceadáin sin a úsáid ar aon slí.

2.   Ní ghlacfaidh institiúidí creidmheasa agus institiúidí airgeadais a ghníomhaíonn mar fhaighteoirí de réir bhrí Airteagal 2, pointe (1), de Rialachán (AE) 2015/751 ó Pharlaimint na hEorpa agus ón gComhairle (46) le híocaíochtaí a dhéantar le cártaí réamhíoctha anaithnide a eisítear i dtríú tíortha, mura bhforáiltear a mhalairt sna caighdeáin theicniúla rialála a ghlac an Coimisiún i gcomhréir le hAirteagal 28 den Rialachán seo ar bhonn riosca íseal cruthaithe.

3.   Cuirfear toirmeasc ar chuideachtaí barántais scaire iompróra a eisiúint, agus déanfaidh siad na scaireanna iompróra uile atá ann cheana a chomhshó ina scaireanna cláraithe, déanfaidh siad iad a bhlocáil de réir bhrí Airteagal 2(1), pointe (3), de Rialachán (AE) Uimh. 909/2014, nó iad a thaisceadh le hinstitiúid airgeadais faoin 10 Iúil 2029. Mar sin féin, ceadófar do chuideachtaí a bhfuil urrúis liostaithe acu ar mhargadh rialáilte nó a ndéantar a gcuid scaireanna a eisiúint mar urrúis idirghafa trí bhlocáil de réir bhrí Airteagal 2(1), pointe (3), den Rialachán sin nó trí eisiúint dhíreach i bhfoirm dhí-ábharaithe de réir bhrí Airteagal 2(1), pointe (4), den Rialachán sin, ceadófar dóibh scaireanna iompróra nua a eisiúint agus scaireanna iompróra atá ann cheana a choinneáil. Maidir le scaireanna iompróra atá ann cheana nach ndéantar a chomhshó, a bhlocáil nó a thaisceadh faoin 10 Iúil 2029, déanfar na cearta vótála uile agus na cearta dáilte uile a ghabhann leis na scaireanna sin a chur ar fionraí go huathoibríoch go dtí go ndéanfar iad a chomhshó, a bhlocáil nó a thaisceadh. Déanfar na scaireanna uile den sórt sin nach bhfuil comhshóite, blocáilte ná taiscthe faoin 10 Iúil 2030 a chur ar ceal, as a dtiocfaidh laghdú ar scairchaipiteal an mhéid chomhfhreagraigh.

Cuirfear toirmeasc ar chuideachtaí barántais scaire iompróra nach mbeidh i bhfoirm idirghafa a eisiúint.