Airteagal 5 Na socruithe oibre a bheidh ag baill den fhoireann scrúdúcháin chomhpháirteach

1.   Déanfaidh baill den fhoireann scrúdúcháin chomhpháirteach na cúraimí a shainaithnítear sa phlean formhaoirseachta bliantúil aonair leis an inniúlacht chuí, cúram cuí agus dícheall cuí, gan aon chlaonadh agus i gcomhréir le treoracha chomhordaitheoir an Phríomh-Fhormhaoirseora dá dtagraítear in Airteagal 40(2), an dara fomhír, de Rialachán (AE) 2022/2554.

2.   Agus cúraimí formhaoirseachta á ndéanamh acu, déanfaidh baill den fhoireann scrúdúcháin chomhpháirteach nósanna imeachta formhaoirseachta arna ndréachtú go comhpháirteach ag na hÚdaráis Mhaoirseachta Eorpacha i ndáil le gníomhaíochtaí formhaoirseachta a leanúint agus i ndáil le haon réimse oibríochtúil ábhartha, lena n-áirítear sonraíochtaí a bhaineann le húsáid uirlisí agus trealaimh TF agus bainistiú ama.

3.   Leanfaidh baill den fhoireann scrúdúcháin chomhpháirteach na sonraíochtaí agus na treoracha faisnéise agus láimhseála sonraí a sholáthraíonn comhordaitheoir an Phríomh-Fhormhaoirseora dá dtagraítear in Airteagal 40(2), an dara fomhír, de Rialachán (AE) 2022/2554 agus comhlíonfaidh siad córas rúndachta na nÚdarás Maoirseachta Eorpach.

4.   Bunóidh an Príomh-Fhormhaoirseoir agus na húdaráis ainmniúcháin socruithe chun na ceanglais a leagtar síos sa Rialachán seo a chur chun feidhme, lena n-áirítear socruithe maidir leis an am a chaitear agus na costais mheasta a bhaineann leis na gníomhaíochtaí formhaoirseachta a dhéanann an fhoireann scrúdúcháin chomhpháirteach, oiliúint, agus breithnithe eiticiúla agus iompair i ndáil le ról na mball den fhoireann scrúdúcháin chomhpháirteach, i gcás inarb iomchuí.

5.   Áiritheoidh an Príomh-Fhormhaoirseoir agus na húdaráis ainmniúcháin go ndéanfar na socruithe dá dtagraítear i mír 4 a chur chun feidhme go tráthúil, go ndéanfar iad a athbhreithniú agus a choinneáil cothrom le dáta.