Airteagal 428ak Aibíocht iarmhair dliteanais nó cistí dílse

Mura sainítear a mhalairt sa Chaibidil seo, cuirfidh institiúidí aibíocht chonarthach iarmhair a ndliteanas agus a gcistí dílse san áireamh chun na fachtóirí cistiúcháin chobhsaí atá ar fáil agus atá le cur i bhfeidhm faoi Roinn 2 a chinneadh.

Cuirfidh institiúidí roghanna atá ann cheana féin san áireamh agus aibíocht iarmhair dliteanais nó cistí dílse á cinneadh. Déanfaidh siad é sin ar an tuiscint go ndéanfaidh an contrapháirtí céadroghanna ar cheannach a fhuascailt ar an dáta is luaithe is féidir. I gcás céadroghanna is infheidhmithe de rogha na hinstitiúide, cuirfidh an institiúid agus na húdaráis inniúla san áireamh fachtóirí a bhaineann le clú a d'fhéadfadh teorainn a chur le cumas institiúide gan an rogha a fheidhmiú, go háirithe ar ionchais an mhargaidh gur cheart d'institiúidí dliteanais áirithe a fhuascailt sula dtiocfaidh siad in aibíocht.

Déanfaidh institiúidí na taiscí sin a bhfuil tréimhsí seasta fógra ag gabháil leo a láimhseáil i gcomhréir lena dtréimhse fógra agus déanfaidh siad taiscí téarma a láimhseáil i gcomhréir lena n-aibíocht iarmhair. De mhaolú ar mhír 2 den Airteagal seo, ní chuirfidh institiúidí san áireamh roghanna le haghaidh aistarraingtí luatha, i gcás ina mbeidh ar an taisceoir pionós ábhartha a íoc as aistarraingtí luatha a dhéantar sula mbeidh bliain amháin istigh, ar pionós é sin a leagtar síos sa ghníomh tarmligthe dá dtagraítear in Airteagal 460(1), chun aibíocht iarmhair taiscí miondíola téarma a chinneadh.

Chun na fachtóirí cistiúcháin chobhsaí atá ar fáil atá le cur i bhfeidhm faoi Roinn 2 a chinneadh, i gcás dliteanais a bhfuil aibíocht chonarthach iarmhair aon bhliana amháin nó níos mó acu, láimhseálfar aon sciar a thiocfaidh in aibíocht laistigh de shé mhí, agus aon chuid de dhliteanais den sórt sin a thiocfaidh in aibíocht idir sé mhí agus níos lú ná aon bhliain amháin, láimhseálfar iad mar dhliteanais a bhfuil aibíocht iarmhair acu níos lú ná sé mhí agus idir sé mhí agus níos lú ná aon bhliain amháin, faoi seach.