4.1 Breithnithe ginearálta

Féadfaidh údaráis inniúla gnólacht infheistíochta a chomhlíonann na coinníollacha maidir le cáiliú mar ghnólacht infheistíochta beag agus neamh-idirnasctha mar atá leagtha amach in Airteagal 12(1) de Rialachán (AE) 2019/2033 a dhíolmhú ó na ceanglais leachtachta a leagtar amach in Airteagal 43(1) de Rialachán (AE) 2019/2033 i gcás ina gcomhlíonann gnólacht infheistíochta na critéir maidir leis an díolúine a leagtar amach sna treoirlínte seo.

I gcás ina bhfuil ceanglais shonracha leachtachta forchurtha ag údarás inniúil faoi Airteagal 42 de Threoir (AE) 2019/2034 ar ghnólacht infheistíochta, ní féidir gnólacht infheistíochta den sórt sin a dhíolmhú ó cheanglais leachtachta ach amháin nuair a scoirfidh sé de bheith faoi réir ceanglais leachtachta shonracha den sórt sin i gcomhréir le hAirteagal 42 de Threoir (AE) 2019/2034.

Níor cheart d’údaráis inniúla gnólacht infheistíochta a dhíolmhú ó na ceanglais leachtachta faoi Airteagal 43(1) de Rialachán (AE) 2019/2033 ach amháin bunaithe ar iarratas ó ghnólacht infheistíochta a bheith díolmhaithe. In éineacht le hiarratas den sórt sin, ba cheart don ghnólacht infheistíochta an fhaisnéis uile is gá a sholáthar chun go bhféadfaidh an t-údarás inniúil a mheasúnú an bhfuil ceanglais na dtreoirlínte seo á gcomhlíonadh. Ba cheart go n-áireofaí san fhaisnéis sin cur síos ar ghníomhaíocht an ghnólachta infheistíochta agus ar an gcaoi a gcomhlíonann an gnólacht infheistíochta ceanglais na díolúine.