8. Cáilíocht sonraí

Sula gcuireann siad sonraí ar fáil dá n-údaráis inniúla, ba cheart d’institiúidí agus do ghnólachtaí infheistíochta iomláine agus inchreidteacht sonraí a sheiceáil agus cibé ceartúchán is gá a dhéanamh. Ba cheart go ndéanfadh údaráis inniúla an rud céanna sula gcuireann siad sonraí ar fáil do ÚBE.

Nuair a iarrann ÚBE é, ba cheart d’údaráis inniúla sonraí ceartaithe nó míniúcháin ar aon sonraí dochreidte a chur ar fáil, de réir mar is gá, a luaithe is féidir.

Maidir leis na seiceálacha cáilíochta sonraí, ba cheart d’údaráis inniúla an méid seo a leanas a fhíorú:

• a. tá na teimpléid líonta go hiomlán agus ar bhonn aonair;
• b. an tásc ceart maidir leis an struchtúr rialachais;
• c. an roghnú ceart don chatagóir méide atá déanta ag an institiúid;
• d. an roghnú ceart má tá institiúid catagóirithe mar institiúid shuntasach nó neamhshuntasach; agus
• e. inchreidteacht an líon stiúrthóirí, ag cur san áireamh gur cheart sonraí a chur ar fáil ar bhonn aonair.

Nuair a bhíonn sonraí tagarmharcála cleachtas éagsúlachta á gcur ar fáil do ÚBE, ba cheart d’údaráis inniúla a áirithiú go gcomhlíonfaidh siad freisin EBA/DC/335 an 5 Meitheamh 2020 maidir le EUCLID (“Cinneadh EUCLID”)⁴ , arna leasú, agus go soláthróidh siad d’institiúidí agus do ghnólachtaí infheistíochta aon sonraíocht theicniúil is gá d’fhonn a áirithiú go bhfuil Cinneadh EUCLID á chomhlíonadh go leanúnach.

⁴ https://www.eba.europa.eu/sites/default/documents/files/document_library/Risk%20Analysis%20and%20Data/Report ing%20by%20Authorities/885459/Decision%20on%20the%20European%20Centralised%20Infrastructure%20of%20Dat a%20%28EUCLID%29.pdf