5. Measúnú na n-údarás ar shonraí stairiúla

Bunaithe ar thorthaí na measúnuithe ar cháilíocht, ar chruinneas, ar chomhsheasmhacht agus ar iomláine na sonraí tuairiscithe ag na hinstitiúidí airgeadais, lena n-áirítear trí bhíthin bailíochtú sonraí agus measúnuithe dearbhaithe cáilíochta sonraí, féadfaidh údaráis inniúla, údaráis réitigh nó ÚBE a cheangal ar institiúidí airgeadais athruithe agus ceartúcháin a dhéanamh ar na sonraí reatha, agus, má mheastar gur gá é, ar na sonraí stairiúla freisin.

I gcás inar sainaithníodh earráidí, míchruinneas agus ceartúcháin ghaolmhara sna sonraí a cuireadh isteach, ba cheart do na húdaráis inniúla, do na húdaráis réitigh nó do ÚBE a cheangal go gcuirfear na sonraí stairiúla ceartaithe isteach an athuair i gcomhréir le ceanglais na dtreoirlínte sin, mura ndearna na hinstitiúidí airgeadais iad a thíolacadh an athuair as a stuaim féin, mar a fhoráiltear i Mír 4 de na treoirlínte.

Ag brath ar a measúnú agus ar an ngá atá lena ndualgais a chomhlíonadh, féadfaidh údaráis inniúla, údaráis réitigh nó ÚBE a cheangal ar institiúidí airgeadais mínithe iomchuí a thabhairt ar na ceartúcháin agus ar na cúiseanna atá leo, nuair a bheidh ceangal á chur ar na hinstitiúidí sonraí stairiúla a chur isteach an athuair.

Féadfaidh údaráis inniúla, údaráis réitigh nó ÚBE a éileamh freisin go gcuirfear isteach an athuair sonraí stairiúla le haghaidh dátaí tagartha breise i gcomparáid leis na ceanglais a leagtar amach sna treoirlínte, i gcás inar gá chun a gcúraimí reachtúla nó maoirseachta a dhéanamh. I gcás ina n-iarrtar dátaí tagartha breise a chur isteach an athuair i gcomparáid le ceanglais na dtreoirlínte sin, ba cheart do na húdaráis inniúla agus réitigh a áirithiú go bhfuil na hiarrataí sin comhréireach i ndáil le hábharthacht na n-earráidí sna sonraí a tuairiscíodh roimhe sin agus i ndáil le próifíl riosca nó ceanglais stuamachta na hinstitiúide.