12.1 Formheas nua táirge, córais agus próisis

Ba cheart beartais agus nósanna imeachta a bheith ag eisitheoir ARTanna chun táirgí, próisis agus córais nua a mheasúnú agus a fhormheas, lena n-áirítear maidir le heisiúint nua ARTanna agus próisis agus córais ghaolmhara.

Ba cheart a chur san áireamh sa phróiseas formheasa na rioscaí uile, lena n-áirítear rioscaí dlíthiúla agus TFC, i seoladh táirgí nua agus i gcur chun feidhme próiseas agus córas nua, agus ba cheart rioscaí a bhaineann le daoine, próisis, córais agus imeachtaí seachtracha a chur san áireamh ann.

Ba cheart breithniú a dhéanamh sa phróiseas formheasa freisin ar éifeachtaí ar sheachadadh feidhmeanna criticiúla nó tábhachtacha agus ar a n-idirnaisc agus a n-idirspleáchais chomh maith le hathruithe ar phróifíl riosca oibriúcháin eisitheoirí ARTanna, lena n-áirítear athruithe ar an riosca a bhaineann le táirgí nó gníomhaíochtaí atá ann cheana, na rialuithe inmheánacha is gá, próisis bainistithe riosca, agus maolú riosca.

Ba cheart d’eisitheoir ARTanna a áirithiú go ndéanfar measúnú ar éabhlóid na rioscaí a bhaineann le táirgí, córais agus próisis nua le himeacht ama ar feadh saolré iomlán táirge, gníomhaíochtaí nó seirbhísí.

Ba cheart d’eisitheoirí ARTanna córas láidir rialaithe inmheánaigh a bheith acu i gcomhréir le Teideal V freisin maidir le táirgí, próisis agus córais nua chun a áirithiú go bhfuil oibríochtaí éifeachtúla agus éifeachtacha ag eisitheoir ARTanna; a chúlchiste sócmhainní a choimirciú; faisnéis iontaofa a tháirgeadh agus na dlíthe agus na rialacháin is infheidhme a chomhlíonadh.