Airteagal 55 Láimhseáil scairshealbhóirí, sealbhóirí polasaí, tairbhithe, éilitheoirí, agus creidiúnaithe eile i gcás aistrithe páirteacha agus chur i bhfeidhm na huirlise díluachála nó comhshó

1.   Áiritheoidh na Ballstáit, i gcás inar cuireadh uirlis réitigh amháin nó níos mó i bhfeidhm, seachas i gcás a bhfuil tuairisc air i mír 2 den Airteagal seo, agus i gcás nach n-aistríonn na húdaráis réitigh ach codanna de chearta, de shócmhainní agus de dhliteanais an ghnóthais faoi réiteach, gurb éard a gheobhaidh na scairshealbhóirí, na sealbhóirí polasaí, na tairbhithe, na héilitheoirí agus na creidiúnaithe eile, nár aistríodh a n-éilimh, mar shásamh ar a n-éilimh an méid céanna ar a laghad a gheobhaidís dá ndéanfaí an gnóthas faoi réiteach a fhoirceannadh faoi ghnáthimeachtaí dócmhainneachta an tráth a rinneadh an cinneadh dá dtagraítear in Airteagal 64.

2.   Áiritheoidh na Ballstáit, i gcás inar cuireadh uirlis réitigh amháin nó níos mó i bhfeidhm agus i gcás ina gcuireann na húdaráis réitigh an uirlis díluachála nó chomhshó i bhfeidhm, maidir leis na scairshealbhóirí, na sealbhóirí polasaí, na tairbhithe, na héilitheoirí agus na creidiúnaithe eile a ndearnadh a n-éilimh a dhíluacháil nó a chomhshó ina gcothromas, nach dtabhóidh siad caillteanais is mó ná na caillteanais a thabhóidís dá ndéanfaí an gnóthas faoi réiteach a fhoirceannadh láithreach faoi ghnáthimeachtaí dócmhainneachta an tráth a rinneadh an cinneadh dá dtagraítear in Airteagal 64.