Preamble: 1

(1)

L-Artikolu 18(3) tar-Regolament (UE) Nru 575/2013 ikopri każijiet ta’ konsolidazzjoni prudenzjali ta’ gruppi ta’ impriżi li jkunu relatati fis-sens tal-Artikolu 22(7) tad-Direttiva 2013/34/UE tal-Parlament Ewropew u tal-Kunsill (2) meta ma tkunx teżisti relazzjoni bejn kumpanija prinċipali u sussidjarja. F’dawn il-każijiet, jeħtieġ li tiġi ddeterminata l-entità li fil-livell tagħha r-rekwiżiti tar-Regolament (UE) Nru 575/2013 għandhom jiġu applikati fuq bażi konsolidata. Barra minn hekk, f’dawk il-każijiet, l-aktar metodu xieraq ta’ konsolidazzjoni prudenzjali jenħtieġ li jkun il-metodu stabbilit fl-Artikolu 22(8) u (9) tad-Direttiva 2013/34/UE (il-“metodu ta’ aggregazzjoni”) f’konformità mar-regoli stabbiliti f’din id-Direttiva.

(2)

F’każijiet ta’ parteċipazzjonijiet f’istituzzjonijiet jew f’istituzzjonijiet finanzjarji ġestiti minn impriża inkluża fil-konsolidazzjoni flimkien ma’ impriża waħda jew aktar mhux inkluża fil-konsolidazzjoni, fejn tkun meħtieġa konsolidazzjoni proporzjonali skont l-Artikolu 18(4) tar-Regolament (UE) Nru 575/2013, il-kunsens unanimu ta’ dawn l-impriżi li jikkonċerna d-deċiżjonijiet dwar l-attivitajiet rilevanti tal-istituzzjoni jew tal-istituzzjoni finanzjarja jenħtieġ li jkun meħtieġ għall-applikazzjoni tal-metodu ta’ konsolidazzjoni prudenzjali stabbilit f’din id-dispożizzjoni f’konformità mad-definizzjoni ta’ arranġament bi sħab speċifikat fl-istandards internazzjonali tal-kontabilità kif applikabbli skont ir-Regolament (KE) Nru 1606/2002 tal-Parlament Ewropew u tal-Kunsill (3).

(3)

Il-punti (a) u (b) tal-Artikolu 18(6) tar-Regolament (UE) Nru 575/2013 jirreferu għar-rekwiżiti superviżorji għall-konsolidazzjoni prudenzjali fil-każ ta’ influwenza sinifikanti fuq istituzzjoni jew istituzzjoni finanzjarja waħda jew aktar iżda mingħajr parteċipazzjoni jew rabtiet kapitali oħrajn, u fil-każ meta dawk l-istituzzjonijiet jew l-istituzzjonijiet finanzjarji jitqiegħdu taħt ġestjoni unika għajr skont kuntratt, memorandum jew artikoli ta’ assoċjazzjoni, rispettivament. Biex jiġi ddeterminat jekk teżistix sitwazzjoni ta’ influwenza sinifikanti, l-awtoritajiet kompetenti jenħtieġ li jqisu diversi indikaturi ta’ influwenza sinifikanti. Barra minn hekk, sitwazzjoni ta’ ġestjoni unika jenħtieġ li tiġi ddeterminata biss meta l-awtorità kompetenti jkollha evidenza konkreta li hemm koordinazzjoni effettiva tal-politiki finanzjarji u operattivi ta’ dawn l-istituzzjonijiet jew istituzzjonijiet finanzjarji.

(4)

Il-Kumitat ta’ Basel dwar is-Superviżjoni Bankarja (Nasel Committee on Banking Supervision, BCBS) ippubblika Linji Gwida dwar l-identifikazzjoni u l-ġestjoni tar-riskju ta’ step-in (4) li jinkludu diversi indikaturi li jenħtieġ li jintużaw mill-istituzzjonijiet fl-identifikazzjoni ta’ liema entitajiet jistgħu jwasslu għal riskju ta’ step-in. Skont il-Linji Gwida tal-BCBS, “riskju ta’ step-in” huwa r-riskju li istituzzjoni tiddeċiedi li tipprovdi appoġġ finanzjarju lil entità mhux konsolidata, jiġifieri entità mhux konsolidata kompletament jew proporzjonalment, li tkun qed tiffaċċja stress, fin-nuqqas ta’, jew f’eċċess ta’, xi obbligu kuntrattwali li tipprovdi dan l-appoġġ. Skont il-Linji Gwida tal-BCBS, meta istituzzjoni tidentifika li hemm riskju ta’ step-in sinifikanti, din jeħtieġ li tiddetermina l-miżuri xierqa bbażati fuq in-natura u l-firxa tal-appoġġ step-in antiċipat f’kull każ. Dawn il-miżuri jinkludu, fost l-oħrajn, l-inklużjoni tal-entitajiet ikkonċernati fil-kamp ta’ applikazzjoni regolatorju tal-konsolidazzjoni. F’konformità mal-Linji Gwida tal-BCBS, jenħtieġ li jitqiesu diversi indikaturi mill-istituzzjonijiet u mill-awtoritajiet kompetenti biex jiġi konkluż jekk ċerti impriżi jenħtiġux li jiġu kkonsolidati kompletament jew proporzjonalment skont l-Artikolu 18(5), il-punt (a) tal-Artikolu 18(6) jew l-Artikolu 18(8) tar-Regolament (UE) Nru 575/2013, kif ikun applikabbli, filwaqt li jitqies ir-riskju ta’ step-in li dawn l-impriżi jistgħu joħolqu għal istituzzjoni. Madankollu, l-istituzzjonijiet jenħtieġ li jqisu wkoll miżuri alternattivi biex jindirizzaw ir-riskju ta’ step-in skont il-proċeduri ta’ ġestjoni tar-riskju u l-proċess ta’ valutazzjoni interna dwar l-adegwatezza tal-kapital (internal capital adequacy assessment process, ICAAP) tagħhom. Barra minn hekk, l-awtoritajiet kompetenti jistgħu jqisu miżuri oħrajn biex jittrattaw ir-riskju potenzjali ppreżentat minn dawk l-impriżi taħt il-proċess ta’ rieżami u evalwazzjoni superviżorji (supervisory review and evaluation processes, SREP). Fil-kuntest tal-qafas tal-iskoperturi l-kbar, l-Awtorità Bankarja Ewropea (EBA) ħarġet ukoll linji gwida dwar il-limiti fuq l-iskoperturi għall-entitajiet bankarji “paralleli” li jwettqu attivitajiet simili għall-banek barra minn qafas regolatorju (5), li jispeċifikaw il-metodoloġija li jenħtieġ li tintuża mill-istituzzjonijiet biex jistabbilixxu limiti, bħala parti mill-proċessi interni tagħhom, fuq l-iskoperturi individwali u aggregati tagħhom għal entitajiet bankarji “paralleli”.

(5)

B’mod partikolari, biex jiġi ddeterminat jekk ikunx hemm bżonn ta’ konsolidazzjoni sħiħa jew proporzjonali skont l-Artikolu 18(8) tar-Regolament (UE) Nru 575/2013 fil-każ ta’ sussidjarji jew impriżi li fihom istituzzjoni jkollha parteċipazzjoni meta dik is-sussidjarja jew impriża ma tkunx istituzzjoni, istituzzjoni finanzjarja jew impriża ta’ servizzi anċillari, u meta jkun hemm riskju ta’ step-in sostanzjali u dment li l-impriża ma tkunx impriża tal-assigurazzjoni jew tar-riassigurazzjoni, jew impriża azzjonarja tal-assikurazzjoni, fost l-oħrajn, l-awtoritajiet kompetenti jenħtieġ li jkunu mistennija li jiskrutinizzaw, mill-inqas, ċerti kategoriji ta’ impriżi bħal entitajiet bi skop speċjali li ma jikkwalifikawx bħala entitajiet bi skop speċjali tat-titolizzazzjoni kif definit fil-punt (2) tal-Artikolu 2 tar-Regolament (UE) 2017/2402 tal-Parlament Ewropew u tal-Kunsill (6), li għalihom huma applikabbli l-kundizzjonijiet għat-trasferiment ta’ riskju ta’ kreditu sinifikanti stabbiliti fl-Artikolu 244 tar-Regolament (UE) Nru 575/2013, kif ukoll dawk l-impriżi li jwettqu kwalunkwe waħda mill-attivitajiet imsemmija fil-punt (b) tal-Artikolu 89(1) tar-Regolament (UE) Nru 575/2013.

(6)

Biex tiġi żgurata l-konsistenza mal-qafas ta’ fondi proprji skont ir-Regolament (UE) Nru 575/2013 u biex jiġi evitat ir-rikonoxximent ta’ benefiċċji kapitali mhux dovuti, f’dawk il-każijiet meta l-konsolidazzjoni tkun meħtieġa skont l-Artikolu 18 minn (3) sa (6) jew l-Artikolu 18(8) tar-Regolament (UE) Nru 575/2013, l-inklużjoni fil-fondi proprji konsolidati tal-ammonti ta’ entrati tal-Grad 1 ta’ Ekwità Komuni u tal-istrumenti kapitali tal-Grad 1 u tal-Grad 2 Addizzjonali maħruġa mill-impriżi inklużi fil-kamp ta’ applikazzjoni prudenzjali tal-konsolidazzjoni u li jkunu jappartjenu għal persuni għajr dawn l-impriżi, kif ukoll il-kontijiet tal-primjum azzjonarju relatati, jenħtieġ li jkunu bbażati wkoll fuq l-Artikoli minn 81 sa 88 ta’ dan ir-Regolament.

(7)

Dan ir-Regolament huwa bbażat fuq l-abbozz tal-istandards tekniċi regolatorji ppreżentat lill-Kummissjoni mill-EBA.

(8)

L-EBA wettqet konsultazzjoni pubblika miftuħa dwar l-abbozz tal-istandards tekniċi regolatorji li fuqhom huwa bbażat dan ir-Regolament, analizzat l-ispejjeż u l-benefiċċji relatati potenzjali u talbet l-opinjoni tal-Grupp tal-Partijiet Bankarji Interessati stabbilit f’konformità mal-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (7).