Artikolu 30 Mezzi ta' komunikazzjoni protetti

1.   Għandha tiġi stabbilita sistema għall-iskambju tal-informazzjoni bejn l-FIUs ta’ Stati Membri (FIU.net). FIU.net għandha tiżgura l-komunikazzjoni sikura u l-iskambju ta' informazzjoni u għandha tkun kapaċi tipproduċi rekord bil-miktub tal-attivitajiet ta’ proċessar kollha. FIU.net tista' tintuża wkoll għall-komunikazzjonijiet mal-kontropartijiet tal-FIUs f'pajjiżi terzi u ma' awtoritajiet u korpi, uffiċċji u aġenziji oħra tal-Unjoni. L-FIU.net għandha tiġi ġestita mill-AMLA.

FIU.net għandha tintuża għall-iskambju ta' informazzjoni bejn l-FIUs u l-AMLA għallfini ta’ analiżi konġunta skont l-Artikolu 32 ta' din id-Direttiva u l-Artikolu 40 tar-Regolament (UE) 2024/1620.

2.   L-Istati Membri għandhom jiżguraw li l-FIUs jiskambjaw informazzjoni skont l-Artikolu 31 u 32 bl-użu ta’ FIU.net. Fil-każ ta' ħsara teknika fi FIU.net, l-informazzjoni għandha tiġi trażmessa b'xi mezz xieraq ieħor li jiżgura livell għoli ta' sigurtà tad-data u ta' protezzjoni tad-data.

L-iskambji ta' informazzjoni bejn l-FIUs u l-kontropartijiet tagħhom f'pajjiżi terzi li mhumiex konnessi ma’ FIU.net għandhom isiru permezz ta' kanali ta' komunikazzjoni protetti.

3.   L-Istati Membri għandhom jiżguraw li, sabiex iwettqu l-kompiti tagħhom kif stabbiliti f'din id-Direttiva, l-FIUs jikkooperaw kemm jista' jkun fl-applikazzjoni ta' teknoloġiji tal-ogħla livell ta' żvilupp tekniku f'konformità mad-dritt nazzjonali tagħhom.

L-Istati Membri għandhom jiżguraw ukoll li l-FIUs jikkooperaw kemm jista' jkun fl-applikazzjoni ta' soluzzjonijiet żviluppati u ġestiti mill-AMLA f'konformità mal-Artikolu 5(5), il-punt (i), l-Artikolu 45(1), il-punt (d) u l-Artikolu 47 tar-Regolament (UE) 2024/1620.

4.   L-Istati Membri għandhom jiżguraw li l-FIUs ikunu jistgħu jużaw il-funzjonalitajiet tal-FIU.net biex iqabblu trasversalment, fuq bażi ta' hit/no-hit, id-data li jagħmlu disponibbli fuq FIU.net, mad-data magħmula disponibbli fuq dik is-sistema minn FIUs oħra u korpi, uffiċċji u aġenziji tal-Unjoni sa fejn tali tqabbil trasversali jaqa' fil-mandati rispettivi ta' dawk il-korpi, l-uffiċċji u l-aġenziji tal-Unjoni.

5.   L-AMLA tista' tissospendi l-aċċess ta' FIU jew kontroparti f'pajjiż terz jew korp, uffiċċju jew aġenzija tal-Unjoni għal FIU.net meta jkollha raġunijiet biex temmen li tali aċċess jipperikola l-implimentazzjoni ta' dan il-Kapitolu u s-sigurtà u l-kunfidenzjalità tal-informazzjoni miżmuma mill-FIUs u skambjata permezz ta’ FIU.net, inkluż meta jkun hemm tħassib fir-rigward tal-indipendenza u tal-awtonomija tal-FIU.