Artikolu 41 Punti ta' kuntatt ċentrali

1.   Għall-finijiet tal-Artikolu 37(1) u tal-Artikolu 38(1), l-Istati Membri jistgħu jesiġu li l-emittenti tal-flus elettroniċi, il-fornituri ta' servizzi ta' pagament u l-fornituri ta' servizzi ta’ kriptoassi li joperaw stabbilimenti fit-territorju tagħhom għajr sussidjarja jew fergħa, jew li joperaw fit-territorju tagħhom permezz ta' aġenti jew distributuri jew permezz ta’ tipi oħra ta' infrastruttura, bil-libertà li jipprovdu servizzi, jaħtru punt ta' kuntatt ċentrali fit-territorju tagħhom. Dak il-punt ta' kuntatt ċentrali għandu jiżgura, f'isem l-entità marbuta b'obbligu, il-konformità mar-regoli tal-AML/CFT u għandu jiffaċilita s-superviżjoni mis-superviżuri, inkluż billi jipprovdi dokumenti u informazzjoni lis-superviżuri fuq talba.

2.   Sal-10 ta’ Lulju 2026, l-AMLA għandha tiżviluppa abbozz ta' standards tekniċi regolatorji u tippreżentah lill-Kummissjoni għall-adozzjoni. Dak l-abbozz ta' standards tekniċi regolatorji għandu jistabbilixxi l-kriterji għad-determinazzjoni taċ-ċirkostanzi li fihom il-ħatra ta' punt ta' kuntatt ċentrali skont il-paragrafu 1 hija adattata, u l-funzjonijiet tal-punti ta' kuntatt ċentrali.

Il-Kummissjoni tingħata s-setgħa li tissupplimenta din id-Direttiva billi tadotta l-istandards tekniċi regolatorji msemmija fl-ewwel subparagrafu f'konformità mal-Artikoli 49 sa 52 tar-Regolament (UE) 2024/1620.