TAQSIMA 1 Dispożizzjonijiet ġenerali

Artikolu 44

L-Istati Membri għandhom jiżguraw li s-superviżuri jikkooperaw kemm jista' jkun ma' xulxin, irrispettivament min-natura jew mill-istatus rispettiv tagħhom. Tali kooperazzjoni tista' tinkludi t-twettiq, fil-limiti tas-setgħat tas-superviżur li lilu ssir it-talba, ta' investigazzjonijiet f'isem superviżur rikjedenti, u l-iskambju sussegwenti tal-informazzjoni li tinkiseb minn tali investigazzjoni, jew l-iffaċilitar tat-twettiq ta' tali investigazzjoni mis-superviżur rikjedenti.

Artikolu 48

Is-superviżuri, inkluż l-AMLA, għandhom jinfurmaw lil xulxin dwar każijiet li fihom il-liġi ta' pajjiż terz ma tippermettix l-implimentazzjoni tal-politiki, tal-proċeduri u tal-kontrolli meħtieġa skont l-Artikolu 16 tar-Regolament (UE) 2024/1624. F'tali każijiet, is-superviżuri jistgħu jieħdu azzjonijiet koordinati biex tinstab soluzzjoni. Fil-valutazzjoni ta' liema pajjiżi terzi ma jippermettux l-implimentazzjoni tal-politiki, tal-proċeduri u tal-kontrolli meħtieġa skont l-Artikolu 16 tar-Regolament (UE) 2024/1624, is-superviżuri għandhom iqisu kwalunkwe restrizzjoni ġuridika li tista' xxekkel l-implimentazzjoni korretta ta' dawk il-politiki, il-proċeduri u il-kontrolli, inkluż is-segretezza professjonali, livell insuffiċjenti ta' protezzjoni tad-data u restrizzjonijiet oħra li jillimitaw l-iskambju ta' informazzjoni li jistgħu jkunu rilevanti għal dak il-għan.