Artikolu 23 Divulgazzjoni lill-pubbliku tal-metodoloġiji, tal-mudelli u tas-suppożizzjonijiet ewlenin tal-klassifikazzjoni użati fl-attivitajiet ta’ klassifikazzjoni ESG

1.   Il-fornituri ta’ klassifikazzjonijiet ESG għandhom jiddivulgaw fuq is-sit web tagħhom, bħala minimu, il-metodoloġiji, il-mudelli u s-suppożizzjonijiet ewlenin tal-klassifikazzjoni li jużaw fl-attivitajiet ta’ klassifikazzjoni ESG tagħhom, inkluża l-informazzjoni msemmija fil-punt (d) tal-Anness I u fil-punt 1 tal-Anness III. Tali divulgazzjoni għandha ssir b’mod ċar u trasparenti u identifikata fit-taqsima separata tas-sit web tal-fornitur ta’ klassifikazzjonijiet ESG.

Il-fornitur ta’ klassifikazzjonijiet ESG għandu jipprovdi l-informazzjoni msemmija fil-punt 1 tal-Anness III sa mhux aktar tard minn meta jibda joħroġ il-klassifikazzjonijiet ESG.

2.   Għandhom jiġu pprovduti klassifikazzjonijiet E, S u G separati minflok ma tintuża klassifikazzjoni ESG unika li taggrega l-fatturi E, S u G. Il-fornituri ta’ klassifikazzjonijiet ESG għandhom jipprovdu d-divulgazzjonijiet imsemmija f’dan l-Artikolu u fl-Artikolu 24 b’mod separat għal kull fattur.

3.   B’deroga mill-paragrafu 2 ta’ dan l-Artikolu, il-fornituri tal-klassifikazzjonijiet ESG jistgħu jipprovdu klassifikazzjoni ESG waħda li taggrega l-fatturi E, S u G jekk jipprovdu, mingħajr preġudizzju għal obbligi ulterjuri ta’ divulgazzjoni skont dan ir-Regolament, l-informazzjoni msemmija fil-punt (h) tal-punt 1 tal-Anness III.

4.   L-ESMA għandha tiżviluppa abbozz ta’ standards tekniċi regolatorji li jispeċifikaw aktar l-elementi li għandhom jiġu ddivulgati f’konformità mal-paragrafu 1, l-ewwel subparagrafu. Dawk l-elementi ma għandhom jinkludu l-ebda rekwiżit ta’ divulgazzjoni addizzjonali minbarra dawk elenkati fil-punt 1 tal-Anness III.

L-ESMA għandha tissottometti l-abbozzi ta’ standards tekniċi regolatorji msemmija fl-ewwel subparagrafu ta’ dan il-paragrafu lill-Kummissjoni sat-2 ta’ Ottubru 2025.

Il-Kummissjoni għandha s-setgħa li tissuplimenta dan ir-Regolament billi tadotta l-istandards tekniċi regolatorji msemmija fl-ewwel subparagrafu ta’ dan il-paragrafu f’konformità mal-proċedura stabbilita fl-Artikoli minn 10 sa 14 tar-Regolament (UE) Nru 1095/2010.

5.   L-ESMA tista’ tiżviluppa abbozzi ta’ standards tekniċi ta’ implimentazzjoni biex tispeċifika l-istandards, il-formati u l-mudelli tad-data li l-fornituri ta’ klassifikazzjonijiet ESG jeħtieġ li jużaw biex jippreżentaw l-informazzjoni msemmija fil-paragrafu 1.

L-ESMA għandha tissottometti l-abbozz ta’ standards tekniċi ta’ implimentazzjoni msemmija fl-ewwel subparagrafu ta’ dan il-paragrafu lill-Kummissjoni.

Il-Kummissjoni hija mogħtija s-setgħa li tadotta l-istandards regolatorji ta’ implimentazzjoni msemmija fl-ewwel subparagrafu ta’ dan il-paragrafu skont il-proċedura stabbilita fl-Artikolu 15 tar-Regolament (UE) Nru 1095/2010.