Artikolu 106

Għall-finijiet tal-istabbiliment u ż-żamma tal-bażi tad-data msemmija fl-Artikolu 11, l-Awtorità għandha tikkonkludi ftehim bilaterali mal-EBA dwar l-aċċess għall-bażi tad-data tal-AML/CFT stabbilita f’konformità mal-Artikolu 9a tar-Regolament (UE) Nru 1093/2010, kif ukoll il-finanzjament u l-ġestjoni konġunta tagħha. L-arranġament għandu jiġi stabbilit għal perjodu miftiehem b’mod reċiproku, li jista’ jiġi estiż sa mhux aktar tard mit-30 ta’ Ġunju 2027. Matul dak il-perjodu, l-EBA għandha tal-anqas tkun tista’ tkompli tirċievi informazzjoni, tanalizzaha u tagħmilha disponibbli f’konformità mal-Artikolu 9a(2) tar-Regolament (UE) Nru 1093/2010 jew f’konformità ma’ dan ir-Regolament, f’isem l-Awtorità u abbażi tal-finanzjament magħmul disponibbli mill-Awtorità għal dak l-għan.

Meta l-applikazzjoni tal-kriterju msemmi fl-ewwel subparagrafu ta’ dan il-paragrafu jrendi aktar minn 40 entità jew grupp marbuta b’obbligu, l-Awtorità għandha tagħżel, mill-entitajiet jew gruppi marbuta b’obbligu li jintgħażlu f’konformità mal-ewwel subparagrafu ta’ dan il-paragrafu u li joperaw fl-iżgħar numru ta’ Stati Membri, dawk li għandhom l-ogħla proporzjon tal-volum ta’ tranżazzjonijiet ma’ pajjiżi terzi għall-volum totali ta’ tranżazzjonijiet imkejla fl-aħħar sena finanzjarja.