Preamble: 1

(1)

Skambju effiċjenti ta' informazzjoni xierqa huwa essenzjali biex jintlaħqu d-deċiżjonijiet konġunti dwar l-adegwatezza tal-fondi proprji, il-miżuri ta' sorveljanza rigward is-superviżjoni tal-likwidità, il-livell ta' likwidità u r-rekwiżiti kapitali applikati għal kull istituzzjoni ta' grupp u l-grupp.

(2)

Sabiex tiġi żgurata applikazzjoni konsistenti tal-proċess biex jintlaħqu d-deċiżjonijiet konġunti, huwa importanti li kull pass jiġi spjegat tajjeb. Proċess ċar jiffaċilita wkoll skambju ta' informazzjoni, jippromwovi għarfien reċiproku, jiżviluppa relazzjonijiet bejn l-awtoritajiet superviżorji u jippromwovi superviżjoni effettiva.

(3)

Sabiex issir il-valutazzjoni tar-riskji kif ukoll il-valutazzjoni tal-profil tar-riskju tal-likwidità għal grupp ta' istituzzjonijiet, is-superviżur konsolidant għandu jkollu stampa ġenerali tal-attivitajiet imwettqa mill-istituzzjonijiet kollha fil-grupp, inkluż l-istituzzjonijiet li joperaw barra mill-Unjoni. Għaldaqstant għandu jkun hemm interazzjoni bejn l-awtoritajiet kompetenti tal-Unjoni u s-superviżuri tal-pajjiżi terzi sabiex dawk tal-ewwel ikunu jistgħu jivvalutaw ir-riskji globali li l-grupp jaffaċċja.

(4)

Ippjanar f'waqtu u realistiku għall-proċess tad-deċiżjonijiet konġunti huwa essenzjali. Kull awtorità kompetenti involuta għandha tipprovdi lis-superviżur konsolidanti b'tagħrif rilevanti fuq bażi regolari. Sabiex il-valutazzjonijiet individwali jiġu ppreżentati u interpretati b'mod konsistenti u uniformi, jeħtieġ li jiġi introdott mudell komuni għar-riżultati tar-rieżami superviżorju u l-proċessi ta' evalwazzjoni li jkun speċifiku għall kull istituzzjoni.

(5)

Biex tiġi żgurata kundizzjoni uniformi tal-applikazzjoni, l-istadji li jridu jiġu segwiti għat-twettiq tal-valutazzjoni konġunta tar-riskju u għat-teħid tad-deċiżjonijiet konġunti għandhom jiġu stabbiliti, filwaqt li jiġi rikonoxxut li ċerti kompiti tal-valutazzjoni konġunta tar-riskju u l-proċess tad-deċiżjonijiet konġunti jistgħu jsiru b'mod parallel u oħrajn sekwenzjalment.

(6)

Sabiex issir aktar faċli biex jittieħdu d-deċiżjonijiet konġunti, huwa importanti li l-awtoritajiet kompetenti involuti fil-proċess tat-teħid tad-deċiżjonijiet jinvolvu ruħhom fi djalogu bejniethom, b'mod partikolari qabel ma jiġu ffinalizzati r-rapporti tal-valutazzjoni tar-riskju u d-deċiżjonijiet konġunti.

(7)

Is-superviżur konsolidant għandu jipprovdi lill-awtoritajiet kompetenti involuti bl-informazzjoni rilevanti kollha meħtieġa għat-tħejjija tal-valutazzjoni tar-riskju individwali tagħhom u t-teħid tad-deċiżjonijiet konġunti dwar il-kapital u l-likwidità.

(8)

Ir-rapport li jinkludi l-valutazzjoni tar-riskju tal-grupp huwa dokument ewlieni li jgħin lill-awtoritajiet kompetenti biex jifhmu u jirreġistraw il-valutazzjoni tal-profil tar-riskju globali tal-grupp bankarju bil-għan li jintlaħqu d-deċiżjonijiet konġunti dwar l-adegwatezza tal-fondi proprji u l-livell ta' fondi proprji li l-grupp jeħtieġ li jżomm. Ir-rapport li jinkludi l-valutazzjoni tal-profil tar-riskju tal-likwidità tal-grupp huwa dokument importanti li jgħin lill-awtoritajiet kompetenti biex jifhmu, jivvalutaw u jirreġistraw il-valutazzjoni tal-profil tal-likwidità globali tal-grupp. Sabiex il-valutazzjoni tar-riskju globali u l-valutazzjoni tar-riskju tal-likwidità tal-grupp jiġu ppreżentati b'mod konsistenti, jiġu appoġġati diskussjonijiet sinifikanti fost l-awtoritajiet kompetenti u ssir valutazzjoni msaħħa tar-riskji tal-grupp bankarju transfruntier, għandhom jiġu stabbiliti mudelli komuni għal dawn ir-rapporti.

(9)

Filwaqt li jiġi rikonoxxut li r-riżultati tal-proċess tar-rieżami superviżorju u l-proċess ta' evalwazzjoni speċifikati fl-Artikolu 97 tad-Direttiva 2013/36/UE jistgħu jiġu dokumentati b'mod differenti madwar l-Istati Membri skont l-implimentazzjoni ta' dan l-Artikolu fil-leġiżlazzjoni nazzjonali b'kunsiderazzjoni wkoll għal-linji gwida maħruġa mill-Awtorità Superviżorja Ewropea (l-Awtorità Bankarja Ewropea) (ABE) skont l-Artikolu 107(2) tad-Direttiva 2013/36/UE, il-mudelli standard għandhom jipprovdu formati konsistenti għall-komunikazzjoni tas-sejbiet u r-riżultati tal-proċess tar-rieżami superviżorju bil-għan li jintlaħqu d-deċiżjonijiet konġunti.

(10)

La r-rapport tal-valutazzjoni tar-riskju tal-grupp u lanqas ir-rapport li jinkludi l-valutazzjoni tar-riskju tal-likwidità tal-grupp ma għandu jkun limitat għal aggregazzjoni ta' kontribuzzjonijiet individwali minn awtoritajiet kompetenti. Iż-żewġ rapporti għandhom jintużaw bħala għodda biex titwettaq il-valutazzjoni konġunta tar-riskji tal-grupp kollu u tiġi analizzata l-interazzjoni tal-affarijiet intragrupp.

(11)

Billi jiġu stabbiliti proċessi ċari għall-kontenut u l-artikulazzjoni tad-deċiżjonijiet konġunti għandu jiġi żgurat li d-deċiżjonijiet konġunti jkunu motivati b'mod sħiħ u jiġi ffaċilitat il-monitoraġġ tad-deċiżjonijiet konġunti u l-infurzar tagħhom.

(12)

Sabiex il-proċess li jrid jiġi segwit ġaladarba jintlaħqu d-deċiżjonijiet konġunti jiġi ċċarat u tiġi pprovduta trasparenza dwar it-trattament tal-eżitu ta' dawn id-deċiżjonijiet u tiġi ffaċilitata azzjoni ta' segwitu xierqa fejn meħtieġ, għandhom jiġu stabbiliti standards dwar il-komunikazzjoni tad-deċiżjonijiet konġunti motivati b'mod sħiħ u l-monitoraġġ tal-implimentazzjoni tagħhom.

(13)

Il-proċess li jrid jiġi segwit għall-aġġornamenti tad-deċiżjonijiet konġunti għandu jiġi stabbilit sabiex jiġi żgurat li jkun hemm approċċ konsistenti u trasparenti, kif ukoll involviment xieraq tal-awtoritajiet kompetenti u l-komunikazzjoni tar-riżultati.

(14)

Il-proċess tad-deċiżjonijiet konġunti skont l-Artikolu 113 tad-Direttiva 2013/36/UE jinkludi l-proċess li jrid jiġi segwit meta ma tintlaħaq l-ebda deċiżjoni konġunta. Biex jiġu żgurati kundizzjonijiet ta' applikazzjoni uniformi dwar dan l-aspett tal-proċess, l-artikulazzjoni tad-deċiżjonijiet motivati b'mod sħiħ u t-trattament tal-fehmiet u r-riżervi espressi mis-superviżuri ospitanti, għandhom jiġu stabbiliti standards li jkopru l-iskeda ta' żmien biex jittieħdu d-deċiżjonijiet fin-nuqqas ta' deċiżjonijiet konġunti, u l-komunikazzjoni tad-dettalji ta' tali deċiżjonijiet.

(15)

Dan ir-Regolament huwa bbażat fuq l-abbozz tal-istandards tekniċi ta' implimentazzjoni sottomess mill-Awtorità Bankarja Ewropea lill-Kummissjoni;

(16)

L-Awtorità Bankarja Ewropea wettqet konsultazzjonijiet pubbliċi miftuħa dwar l-abbozz tal-istandards tekniċi ta' implimentazzjoni li fuqhom huwa bbażat dan ir-Regolament, analizzat il-kostijiet u l-benefiċċji potenzjali relatati u talbet l-opinjoni tal-Grupp tal-Partijiet Bankarji Interessati stabbilit skont l-Artikolu 37 tar-Regolament (UE) Nru 1093/2010 tal-Parlament Ewropew u tal-Kunsill (2);