Artikolu 8a

Fil-pjanijiet ta' mmaniġġjar tal-baċini tax-xmajjar prodotti f'konformità mal-Artikolu 13 tad-Direttiva 2000/60/KE, mingħajr preġudizzju għar-rekwiżiti tat-Taqsima 1.4.3 tal-Anness V ta' dik id-Direttiva rigward il-preżentazzjoni tal-istatus kimiku ġenerali u l-objettivi u l-obbligi stabbiliti fil-punt (a) tal-Artikolu 4(1), il-punt (k) tal-Artikolu 11(3) u l-Artikolu 16(6) ta' dik id-Direttiva, l-Istati Membri jistgħu jipprovdu mapep addizzjonali biex jippreżentaw l-istatus kimiku kif previst fit-taqsima 1.4.3 tal-Anness V tad-Direttiva 2000/60/KE.

L-Istati Membri jistgħu jimmonitorjaw is-sustanzi identifikati fil-Parti A tal-Anness I għal din id-Direttiva bħala sustanzi li jaġixxu bħal PBTs li jinsabu kullimkien b'mod anqas intensiv minn kif meħtieġ għas-sustanzi prijoritarji f'konformità mal-Artikolu 3(4) ta' din id-Direttiva u mal-Anness V tad-Direttiva 2000/60/KE, dment li l-monitoraġġ ikun rappreżentattiv u tkun disponibbli linja bażi statistikament robusta rigward il-preżenza ta' dawk is-sustanzi fl-ambjent akkwatiku. Bħala linja gwida, f'konformità mat-tieni subparagrafu tal-Artikolu 3(6) ta' din id-Direttiva, jenħtieġ li l-monitoraġġ isir mill-inqas kull tliet snin, dment li l-użu jew l-emissjoni tas-sustanza, jew l-għarfien tekniku u l-ġudizzju espert, ma jiġġustifikawx intervall ieħor.

Fuq perjodu ta' sentejn mill-1 ta' Jannar 2030, l-Istati Membri għandhom jimmonitorjaw il-preżenza ta' sustanzi estroġeniċi fil-mases tal-ilma, billi jużaw metodi ta' monitoraġġ ibbażati fuq l-effetti. It-teħid ta' kampjuni u l-analiżi ma għandhomx għalfejn jibdew fil-bidu ta' dak il-perjodu ta' sentejn, iżda għandhom jitwettqu mill-inqas erba' darbiet kull sena. L-Istati Membri għandhom iwettqu l-monitoraġġ f'għadd mis-siti fejn it-tliet ormoni estroġeniċi 17-beta estradjol (E2), Estron (E1) u 17-alfa-etinilestradjol (EE2), elenkati fil-Parti A tal-Anness I ta' din id-Direttiva, qegħdin jiġu mmonitorjati bl-użu ta' metodi analitiċi konvenzjonali f'konformità mal-Artikolu 8 tad-Direttiva 2000/60/KE u mal-Anness V tagħha u sabiex jiksbu riżultati komparattivi fuq firxa ta' konċentrazzjonijiet. Id-data għandha tiġi rrapportata flimkien, u f'konformità mal-Artikolu 8(4) ta' dik id-Direttiva. L-għadd tas-siti ma għandux ikun inqas minn dak speċifikat fl-Artikolu 8b(3) ta' din id-Direttiva għall-monitoraġġ ta' sustanzi fil-lista ta' sorveljanza. L-Istati Membri jistgħu jibdew il-monitoraġġ qabel l-1 ta' Jannar 2030 dment li l-ispeċifikazzjonijiet tekniċi msemmija fil-paragrafu 4 ta' dan l-Artikolu jkunu ġew adottati. L-Istati Membri ma għandhomx jużaw ir-riżultati bbażati fuq l-effetti mill-perjodu ta' monitoraġġ komparattiv ta' sentejn għall-fini tal-klassifikazzjoni tal-istatus kimiku tal-mases tal-ilma mmonitorjati kif deskritt fit-Taqsima 1.4.3 tal-Anness V tad-Direttiva 2000/60/KE.

Sal-1 ta’ Diċembru 2027, il-Kummissjoni għandha tadotta att ta' implimentazzjoni li jistabbilixxi l-ispeċifikazzjonijiet tekniċi għall-monitoraġġ ta' sustanzi estroġeniċi permezz tal-użu ta' metodi ta' monitoraġġ ibbażati fuq l-effetti. L-atti ta' implimentazzjoni għandhom jiġu adottati f'konformità mal-proċedura ta' eżami msemmija fl-Artikolu 9(2).

Fi żmien 18-il xahar minn meta d-data tkun ġiet irrapportata mill-Istati Membri, il-Kummissjoni għandha tippubblika rapport li jqabbel ir-riżultati mill-metodi analitiċi konvenzjonali ma' dawk ibbażati fuq l-effetti u tanalizza l-possibbiltà li jintużaw metodi ta' monitoraġġ ibbażati fuq l-effetti flimkien ma' valur ta' skattar ibbażat fuq l-effetti għall-estroġeni kif definit fil-punt 35a tal-Artikolu 2 tad-Direttiva 2000/60/KE għal skopijiet ta' skrinjar biex tiġi appoġġata l-valutazzjoni tal-istatus kimiku.