Article 14 Mekkaniżmi ta’ trasparenza u ta’ salvagwardja għas-servizzi tar-roaming bl-imnut tad-data

1.   Il-fornituri tar-roaming għandhom jiżguraw li l-klijenti tar-roaming tagħhom ikunu infurmati kif xieraq, qabel u wara l-konklużjoni ta’ kuntratt bl-imnut, dwar it-tariffi applikabbli għall-użu tagħhom tas-servizzi tar-roaming regolati tad-data, b’mod li jkun eħfef għall-klijenti biex jifhmu l-konsegwenzi finanzjarji ta’ dan l-użu u jkunu jistgħu jimmonitorjaw u jikkontrollaw in-nefqa tagħhom fuq is-servizzi tar-roaming regolati tad-data skont il-paragrafi 2 u 4.

Meta jkun xieraq, il-fornituri tar-roaming għandhom jinfurmaw lill-klijenti tagħhom, qabel il-konklużjoni ta’ kuntratt bl-imnut u b’mod regolari wara dan, dwar ir-riskju ta’ konnessjoni u tniżżil awtomatiku u bla kontroll ta’ servizzi tar-roaming tad-data. Barra minn hekk, il-fornituri tar-roaming għandhom jinnotifikaw lill-klijenti tagħhom, mingħajr ħlas, b’mod ċar u li jista’ jinftiehem faċilment, dwar kif dawk il-konnessjonijiet awtomatiċi tar-roaming tad-data jistgħu jintfew biex jevitaw konsum bla kontroll ta’ servizzi tar-roaming tad-data.

2.   Messaġġ awtomatiku mill-fornitur tar-roaming għandu jinforma lill-klijenti tar-roaming li dawn tal-aħħar ikunu qed jużaw servizzi tar-roaming regolati tad-data, u għandu jipprovdi informazzjoni personalizzata bażika dwar it-tariffi, bil-munita tal-kont tal-pajjiż tal-oriġini pprovdut mill-fornitur domestiku tal-klijent, applikabbli għall-forniment ta’ servizzi tar-roaming regolati tad-data lil dawk il-klijenti tar-roaming fl-Istat Membru kkonċernat, għajr meta l-klijenti jkunu nnotifikaw lill-fornitur tar-roaming li ma jeħtiġux dik l-informazzjoni.

Dik l-informazzjoni personalizzata bażika dwar it-tariffi għandha tinkludi informazzjoni dwar:

L-informazzjoni għandha tintbagħat direttament lill-apparat mobbli tal-klijenti tar-roaming, pereżempju b’messaġġ SMS, b’email, b’messaġġ testwali jew b’pop-up fuq l-apparat mobbli, kull darba li l-klijenti tar-roaming jidħlu fi Stat Membru li mhux dak tal-fornitur domestiku tagħhom u jibdew servizz għall-ewwel darba ta’ roaming tad-data f’dak l-Istat Membru partikolari. Din għandha tintbagħat mingħajr ħlas fil-mument meta l-klijenti tar-roaming jibdew servizz tar-roaming regolat tad-data, permezz ta’ mezz xieraq li jista’ jasal u jinftiehem faċilment.

Il-klijenti li jkunu nnotifikaw lill-fornitur tar-roaming tagħhom li huma ma jeħtiġux l-informazzjoni awtomatika dwar it-tariffi, għandu jkollhom id-dritt li fi kwalunkwe ħin u mingħajr ħlas jitolbu lill-fornitur tar-roaming biex jerġa’ jipprovdi dan is-servizz.

3.   Il-fornitur tar-roaming għandu jibgħat notifika meta jiġi kkunsmat il-volum kollu ta’ użu ġust applikabbli għas-servizzi tar-roaming regolati tad-data jew meta jintlaħaq kwalunkwe limitu massimu għall-użu applikat skont l-Artikolu 6. Dik in-notifika għandha tindika t-tariffa supplimentari li se tiġi applikata għal kwalunkwe konsum addizzjonali tas-servizzi tar-roaming regolati tad-data min-naħa tal-klijent tar-roaming. Il-klijenti kollha għandu jkollhom id-dritt li jitolbu lill-fornitur tar-roaming biex ma jibqax jibgħat dawn in-notifiki u għandu jkollhom id-dritt li fi kwalunkwe ħin u mingħajr ħlas jitolbu lill-fornitur tar-roaming biex jerġa’ jibda jipprovdi s-servizz.

4.   Kull fornitur tar-roaming għandu jagħti lill-klijenti tar-roaming kollha tiegħu mingħajr ħlas aċċess għal faċilità li tipprovdi informazzjoni fil-ħin dwar il-konsum akkumulat, espressa bħala volum jew bil-munita tal-fatturar tal-klijent tar-roaming għas-servizzi tar-roaming regolati tad-data u li tiggarantixxi li, mingħajr il-kunsens espliċitu tal-klijent, in-nefqa akkumulata għas-servizzi tar-roaming regolati tad-data tul perjodu speċifikat tal-użu, għajr il-messaġġi MMS iffatturati abbażi ta’ kull unità, ma taqbiżx limitu finanzjarju speċifikat. Il-klijenti jistgħu jinnotifikaw lill-fornitur tar-roaming li ma jeħtiġux aċċess għal tali faċilità.

Għal dak il-għan, il-fornitur tar-roaming għandu jagħmel disponibbli limitu finanzjarju massimu wieħed jew aktar għal perjodi speċifikati tal-użu, diment li l-klijenti jkunu informati minn qabel dwar l-ammonti tal-volum korrispondenti. Wieħed minn dawk il-limiti (il-limitu finanzjarju awtomatiku) għandu jkun viċin u ma għandux jaqbeż il-EUR 50 ta’ tariffi pendenti għal kull perjodu ta’ fatturar ta’ kull xahar, eskluża l-VAT.

Inkella, il-fornitur tar-roaming jista’ jistabbilixxi limiti espressi f’volum, diment li l-klijenti jkunu informati minn qabel dwar l-ammonti finanzjarji korrispondenti. Wieħed minn dawk il-limiti (il-limitu tal-volum awtomatiku) għandu jkollu ammont finanzjarju korrispondenti li ma jaqbiżx il-EUR 50 ta’ tariffi pendenti għal kull perjodu ta’ fatturar ta’ kull xahar, eskluża l-VAT.

Barra minn hekk, il-fornitur tar-roaming jista’ joffri limiti oħra lill-klijenti tar-roaming tiegħu b’limiti massimi finanzjarji differenti ta’ kull xahar, jiġifieri, ogħla jew aktar baxxi.

Il-limiti awtomatiċi msemmija fit-tieni u t-tielet subparagrafi għandu jkun applikabbli għall-klijenti kollha li ma jkunux għażlu limitu ieħor.

Kull fornitur tar-roaming għandu wkoll jiżgura li tintbagħat direttament notifika xierqa lill-apparat mobbli tal-klijent tar-roaming, pereżempju b’messaġġ SMS, b’email, b’messaġġ testwali jew b’pop-up fuq il-kompjuter, meta s-servizzi tar-roaming tad-data jkunu laħqu t-80 % tal-limitu finanzjarju jew tal-volum miftiehem. Il-klijenti kollha għandu jkollhom id-dritt li jitolbu lill-fornitur tar-roaming biex ma jibqax jibgħat notifiki ta’ dan it-tip u għandu jkollhom id-dritt li fi kwalunkwe ħin u mingħajr ħlas jitolbu lill-fornitur tar-roaming biex jerġa’ jibda jipprovdi s-servizz.

Meta l-limitu finanzjarju jew tal-volum jinqabeż mod ieħor, għandha tintbagħat notifika lill-apparat mobbli tal-klijent tar-roaming. Meta klijenti tar-roaming soġġetti għal limitu finanzjarju awtomatiku jew limitu tal-volum awtomatiku kif imsemmi fil-ħames subparagrafu jikkonsmaw aktar minn EUR 100 f’perjodu ta’ fatturazzjoni ta’ kull xahar, eskluża l-VAT, għandha tintbagħat notifika addizzjonali lill-apparat mobbli ta’ dawk il-klijenti tar-roaming. Dawk in-notifiki għandhom jindikaw il-proċedura li trid tintuża jekk il-klijenti jixtiequ jissoktaw il-forniment ta’ dawn is-servizzi u jerfgħu il-kost assoċjat ma’ kull unità addizzjonali kkonsmata. Jekk il-klijenti tar-roaming ma jwiġbux kif mitlub fin-notifika li rċevew, il-fornitur tar-roaming għandu jwaqqaf minnufih il-forniment u l-impożizzjoni tat-tariffi għas-servizzi tar-roaming regolati tad-data lill-klijenti tar-roaming, sakemm il-klijenti tar-roaming ma jkunux talbu li jissokta jew jiġġedded il-forniment ta’ dawn is-servizzi.

Kull meta klijenti tar-roaming jitolbu t-tneħħija jew l-istabbiliment mill-ġdid tal-faċilità ta’ limitu finanzjarju jew tal-volum, il-bidla għandha ssir fi żmien jum wieħed tax-xogħol mill-wasla tat-talba, għandha tkun mingħajr ħlas, u ma għandhiex tinvolvi kundizzjonijiet jew restrizzjonijiet relatati ma’ elementi oħra tal-abbonament.

5.   Il-paragrafi 2 u 4 ma għandhomx japplikaw għall-apparati minn magna għal magna li jużaw komunikazzjoni mobbli tad-data.

6.   Il-fornituri tar-roaming għandhom jieħdu l-passi kollha raġonevoli biex jipproteġu lill-klijenti tagħhom milli jħallsu tariffi tar-roaming għal aċċess involontarju għas-servizzi tar-roaming meta jkunu fl-Istat Membru tagħhom. Dan għandu jinkludi informazzjoni lill-klijenti dwar kif effettivament jistgħu jevitaw ir-roaming involontarju fir-reġjuni tal-fruntieri.

7.   Il-fornituri tar-roaming għandhom jieħdu l-passi raġonevoli kollha biex jipproteġu lill-klijenti tagħhom milli jħallsu tariffi addizzjonali għal servizzi ta’ data għall-konnessjoni involontarja ma’ networks mobbli pubbliċi mhux terrestri, pereżempju billi tingħata l-possibbiltà lill-klijenti tar-roaming li ma jikkonnettjawx ma’ networks mhux terrestri. Meta jiġi offrut mekkaniżmu ta’ rinunzja fakultattiva bħal dan, il-klijenti għandu jkollhom id-dritt li ma jużawx networks mhux terrestri fi kwalunkwe ħin, faċilment u mingħajr ħlas u li jitolbu li l-konnessjoni terġa’ tiġi stabbilita ma’ dawn in-networks.

8.   Għajr il-paragrafu 2, it-tieni subparagrafu, il-paragrafu 3 u l-paragrafu 6, u soġġett għat-tieni u t-tielet subparagrafu ta’ dan il-paragrafu, dan l-Artikolu għandu japplika wkoll kemm għas-servizzi tar-roaming tad-data użati mill-klijenti tar-roaming, meta jkunu qed jikkonettjaw ma’ networks pubbliċi ta’ komunikazzjoni mobbli mhux terrestri nazzjonali jew internazzjonali provduti minn fornitur tar-roaming kif ukoll għas-servizzi tar-roaming tad-data użati mill-klijenti tar-roaming li jivvjaġġaw barra mill-Unjoni u pprovduti minn fornitur tar-roaming.

Fir-rigward tal-faċilità msemmija fil-paragrafu 4, l-ewwel subparagrafu, ir-rekwiżiti previsti fil-paragrafu 4 ma għandhomx japplikaw jekk l-operatur tan-network miżjur fil-pajjiż miżjur barra mill-Unjoni ma jkunx jippermetti lill-fornitur tar-roaming jimmonitorja l-użu tal-klijenti tiegħu f’ħin reali.

F’dak il-każ, il-klijenti għandhom jiġi nnotifikati b’messaġġ SMS meta jidħlu f’pajjiż bħal dan, mingħajr dewmien żejjed u mingħajr ħlas, li l-informazzjoni dwar il-konsum akkumulat u l-garanzija li ma jinqabiżx limitu finanzjarju speċifikat, mhijiex disponibbli.