Artikolu 9 Prezz tal-karbonju mħallas f’pajjiż terz

Meta l-emissjonijiet integrati jiġu determinati abbażi ta’ emissjonijiet reali, dikjarant awtorizzat CBAM jista’, fid-dikjarazzjoni CBAM, jitlob tnaqqis fl-għadd ta’ ċertifikati CBAM li jridu jiġu ċeduti sabiex jitqies il-prezz tal-karbonju mħallas f’pajjiż terz għall-emissjonijiet integrati ddikjarati. It-tnaqqis jista’ jintalab biss jekk il-prezz tal-karbonju jkun effettivament tħallas f’pajjiż terz. F’tali każ, għandhom jitqiesu kull ribass jew forma oħra ta’ kumpens disponibbli f’dak il-pajjiż li jkunu rriżultaw fi tnaqqis ta’ dak il-prezz tal-karbonju.

Id-dikjarant awtorizzat CBAM għandu jżomm rekords tad-dokumentazzjoni meħtieġa biex juri li l-emissjonijiet integrati ddikjarati kienu soġġetti għal prezz tal-karbonju f’pajjiż terz li jkun effettivament tħallas kif imsemmi fil-paragrafu 1. Id-dikjarant awtorizzat CBAM, b’mod partikolari, għandu jżomm l-evidenza relatata mar-ribassi disponibbli jew ma’ kwalunkwe forma oħra ta’ kumpens, b’mod partikolari r-referenzi għal-leġiżlazzjoni rilevanti ta’ dak il-pajjiż. L-informazzjoni li tinsab f’dik id-dokumentazzjoni għandha tiġi ċċertifikata minn persuna li tkun indipendenti mid-dikjarant awtorizzat CBAM u mill-awtoritajiet tal-pajjiż terz. L-isem u l-informazzjoni ta’ kuntatt ta’ dik il-persuna indipendenti għandhom jidhru fuq id-dokumentazzjoni. Id-dikjarant awtorizzat CBAM għandu jżomm ukoll evidenza tal-pagament reali tal-prezz tal-karbonju.

Id-dikjarant awtorizzat CBAM għandu jżomm ir-rekords imsemmija fil-paragrafu 2 sa tmiem ir-raba’ sena wara s-sena li matulha d-dikjarazzjoni CBAM tkun ġiet ippreżentata jew kellha tiġi ppreżentata.

B’deroga mill-paragrafi 1, 2 u 3, dikjarant awtorizzat CBAM jista’ jitlob fid-dikjarazzjoni CBAM, tnaqqis fl-għadd ta’ ċertifikati CBAM li jridu jiġu ċeduti sabiex jitqies il-prezz tal-karbonju mħallas għall-emissjonijiet integrati ddikjarati, b’referenza għall-prezzijiet prestabbiliti annwali tal-karbonju. F’tali każ, għandu jitqies kwalunkwe ribass jew forma oħra ta’ kumpens disponibbli f’dak il-pajjiż li kien jirriżulta fi tnaqqis ta’ dak il-prezz tal-karbonju prestabbilit. It-tnaqqis jista’ jintalab biss meta prezz tal-karbonju jkun ġie stabbilit mir-regoli applikabbli fil-pajjiż terz u jkun jista’ jiġi ddeterminat prezz tal-karbonju prestabbilit annwali, inkluż fuq bażi konservattiva, għal dak il-pajjiż terz. Meta l-emissjonijiet integrati jiġu ddeterminati abbażi ta’ valuri prestabbiliti, jista’ jintalab tnaqqis biss b’referenza għall-prezzijiet prestabbiliti annwali tal-karbonju.

Il-Kummissjoni għandha s-setgħa li tadotta atti ta’ implimentazzjoni dwar il-konverżjoni tal-prezz annwali medju tal-karbonju effettivament imħallas f’konformità mal-paragrafu 1 ta’ dan l-Artikolu u tal-prezzijiet prestabbiliti annwali tal-karbonju ddeterminati, f’konformità mal-paragrafu 4 ta’ dan l-Artikolu fi tnaqqis korrispondenti tal-għadd ta’ ċertifikati CBAM li jridu jiġu ċeduti. Dawk l-atti għandhom jirregolaw ukoll il-konverżjoni tal-prezz tal-karbonju espress f’munita barranija f’euro bir-rata tal-kambju medja annwali, l-evidenza meħtieġa tal-pagament reali tal-prezz tal-karbonju, eżempji ta’ kwalunkwe ribass rilevanti jew forma oħra ta’ kumpens imsemmija fil-paragrafu 1 ta’ dan l-Artikolu, il-kwalifiki tal-persuna indipendenti msemmija fil-paragrafu 2 ta’ dan l-Artikolu u l-kundizzjonijiet biex tiġi aċċertata l-indipendenza ta’ dik il-persuna. Dawk l-atti ta’ implimentazzjoni għandhom jiġu adottati f’konformità mal-proċedura ta’ eżami msemmija fl-Artikolu 29(2).