L-Artikolu 3 Prinċipji ġenerali

il-prezzijiet għall-gass naturali u l-idroġenu għandhom jiġu stabbiliti abbażi tad-domanda u tal-provvista;

l-operaturi tas-sistemi ta’ trażmissjoni u l-operaturi tas-sistemi ta’ distribuzzjoni, u l-operaturi tan-networks ta’ trażmissjoni tal-idroġenu u l-operaturi tan-networks ta’ distribuzzjoni tal-idroġenu għandhom jikkooperaw bejniethom biex jagħtu l-libertà lill-utenti tan-network li jipprenotaw il-kapaċità ta’ dħul u ta’ ħruġ b’mod indipendenti; il-gass naturali u, mill-2033, l-idroġenu għandhom jiġu trasportati permezz tas-sistema ta’ dħul u ta’ ħruġ, pjuttost milli linji kuntrattwali;

it-tariffi imposti fil-punti ta’ dħul u ta’ ħruġ fis-sistema tal-gass naturali u fis-sistema tal-idroġenu għandhom ikunu strutturati b’tali mod li jikkontribwixxu għall-integrazzjoni tas-suq, itejbu s-sigurtà tal-provvista u jippromwovu l-interkonnessjoni bejn in-networks tal-gass naturali u bejn in-networks tal-idroġenu;

l-impriżi li huma attivi fl-istess sistema ta’ dħul u ta’ ħruġ għandhom jiskambjaw il-gass naturali u, mill-2033, l-idroġenu fil-punt ta’ kummerċ virtwali; il-produtturi tal-gass rinnovabbli u tal-gass b’livell baxx tal-karbonju għandu jkollhom aċċess ugwali għall-punt ta’ kummerċ virtwali, irrispettivament minn jekk ikunux konnessi mas-sistema ta’ distribuzzjoni jew is-sistema ta’ trażmissjoni; il-gass naturali u, mill-2033, l-idroġenu jistgħu jiġu skambjat fiżikament fil-punti ta’ dħul minn pajjiżi terzi jew fil-punti ta’ ħruġ lejhom;

l-utenti tan-network għandhom ikunu responsabbli biex jibbilanċjaw il-portafolli tagħhom sabiex jimminimizzaw il-bżonn li l-operaturi tas-sistemi ta’ trażmissjoni u l-operaturi tan-network ta’ trażmissjoni tal-idroġenu jieħdu azzjonijiet tal-ibbilanċjar;

l-azzjonijiet tal-ibbilanċjar għandhom isiru abbażi ta’ prodotti standardizzati f’konformità mal-kodiċi tan-network dwar l-ibbilanċjar stabbilit skont dan ir-Regolament u jitwettqu fuq pjattaforma tal-kummerċ jew permezz tas-servizzi tal-ibbilanċjar f’konformità ma’ dak il-kodiċi tan-network;

ir-regoli tas-suq għandhom jevitaw azzjonijiet li jimpedixxu l-formazzjoni tal-prezzijiet abbażi tad-domanda u tal-provvista għall-gass naturali u l-idroġenu;

ir-regoli tas-suq għandhom jiżguraw approċċ iċċentrat fuq il-konsumaturi u effiċjenti fl-użu tal-enerġija fis-swieq tal-gass naturali u tal-idroġenu;

ir-regoli tas-suq għandhom irawmu l-ħolqien u l-funzjonament tal-kummerċ likwidu tal-gass naturali u tal-idroġenu, filwaqt li jrawmu l-formazzjoni tal-prezzijiet u t-trasparenza tal-prezzijiet;

ir-regoli tas-suq għandhom jippermettu d-dekarbonizzazzjoni tas-sistemi tal-gass naturali u tas-sistemi tal-idroġenu, inkluż billi jabilitaw l-integrazzjoni fis-swieq tal-gass naturali u l-idroġenu, minn sorsi tal-enerġija rinnovabbli u billi jipprovdu inċentivi għall-iffrankar tal-enerġija u l-effiċjenza enerġetika, it-tnaqqis fid-domanda, il-flessibbiltà fid-domanda u l-integrazzjoni tas-sistemi tal-enerġija u jiffaċilitaw l-ilħuq tal-miri tal-Unjoni għall-klima u l-enerġija;

ir-regoli tas-suq għandhom iwasslu għal inċentivi xierqa tal-investiment, b’mod partikolari għal investimenti fit-tul f’sistema dekarbonizzata u sostenibbli għall-gass naturali u f’sistema tal-idroġenu, għall-ħażna tal-enerġija, l-effiċjenza enerġetika, it-tnaqqis fid-domanda u r-rispons għad-domanda biex jintlaħqu l-ħtiġijiet tas-suq u l-ħtiġijiet għall-integrazzjoni tas-sistemi, u għandhom jiffaċilitaw il-kompetizzjoni ġusta u s-sigurtà tal-provvista, filwaqt li jimplimentaw il-prinċipju “l-effiċjenza enerġetika tiġi l-ewwel” biex jiġu evitati inċentivi ta’ investiment li jwasslu għal assi mhux rekuperabbli;

ir-regoli dwar l-ippjanar tan-networks għandhom, fejn xieraq, ikollhom fil-mira l-użu tal-idroġenu għal setturi li diffiċli jiġu dekarbonizzati, filwaqt li jqisu l-potenzjal tat-tnaqqis tal-gassijiet serra, jinkoraġġixxu miżuri li jnaqqsu d-domanda għall-gassijiet fossili, u jikkontribwixxu għall-użu prudenti u razzjonali tar-riżorsi naturali u għall-kisba tal-miri tal-Unjoni dwar il-klima u l-enerġija;

l-ostakli għall-flussi transfruntieri tal-gass naturali u tal-idroġenu, jekk jeżistu, bejn is-sistemi ta’ dħul u ta’ ħruġ għandhom jitneħħew;

ir-regoli tas-suq għandhom jiffaċilitaw il-kooperazzjoni u l-integrazzjoni reġjonali.