Artikolu 9 Relazzjoni bejn il-fornituri tas-servizzi tan-navigazzjoni bl-ajru

1.   Mingħajr preġudizzju għall-Artikolu 7(4) ta’ dan ir-Regolament, il-fornituri tas-servizzi tan-navigazzjoni bl-ajru jistgħu jagħmlu użu mis-servizzi ta’ fornituri ta’ servizzi oħra li huma ċċertifikati jew li ddikjaraw il-kapaċità tagħhom f’konformità mal-Artikolu 41 tar-Regolament (UE) 2018/1139. Din il-kooperazzjoni għandha ssir f’konformità mal-Artikolu 11 ta’ dan ir-Regolament fejn applikabbli.

Għal fornituri tas-servizzi tat-traffiku tal-ajru ddeżinjati f’konformità mal-Artikolu 8 u fornitur tas-servizzi tal-MET ddeżinjati f’konformità mal-Artikolu 10, din il-kooperazzjoni għandha tkun soġġetta għall-awtorizzazzjoni tal-Istati Membri kkonċernati.

2.   Għall-fini tal-paragrafu 1, il-fornituri tas-servizzi tan-navigazzjoni bl-ajru għandhom jifformalizzaw ir-relazzjonijiet ta’ ħidma tagħhom permezz ta’ ftehimiet bil-miktub jew arranġamenti legali ekwivalenti, fejn jiġu stipulati d-doveri speċifiċi, inkluż kwalunkwe saldu finanzjarju applikabbli, u l-funzjonijiet assunti minn kull fornitur. Dawk il-ftehimiet jew arranġamenti għandhom jiġu notifikati lill-awtoritajiet superviżorji nazzjonali u lill-awtorità kompetenti nazzjonali kkonċernata.