Artikolu 13 Stabbiliment u rwol tal-Bord ta’ Analiżi tal-Prestazzjoni

1.   B’dan qed jiġi stabbilit Bord ta’ Analiżi tal-Prestazzjoni (PRB) konsultattiv indipendenti u imparzjali. Il-PRB għandu jkun rappreżentat mill-president tiegħu u megħjun minn segretarjat.

2.   Ir-rwol tal-PRB għandu jkun li jassisti lill-Kummissjoni twettaq il-kompiti tal-Kummissjoni relatati mal-funzjonament dettaljat tal-iskemi ta’ prestazzjoni u ta’ imposti stabbiliti fl-Artikoli 21 sa 27 u fl-Artikoli 29 sa 32, rispettivament, kif ukoll skont l-Artikolu 34, u fl-atti ta’ implimentazzjoni msemmija fl-Artikoli 28 u 33. Għal dan il-fini, il-PRB għandu jipprovdi opinjonijiet, rakkomandazzjonijiet, materjal ta’ gwida u rapporti lill-Kummissjoni, f’konformità mal-prijoritajiet definiti mill-Kummissjoni.

3.   Il-PRB għandu joħroġ materjal ta’ gwida biex jappoġġa lill-awtoritajiet superviżorji nazzjonali, u, fuq talba, jassisti lil dawk l-awtoritajiet fl-implimentazzjoni tal-iskemi ta’ prestazzjoni u ta’ imposti.

4.   L-opinjonijiet, ir-rakkomandazzjonijiet, ir-rapporti u l-materjal ta’ gwida adottati jew ipprovduti mill-PRB ma għandhomx ikunu vinkolanti. Il-PRB għandu jkollu rwol purament konsultattiv. Ma għandu jkollu l-ebda funzjoni regolatorja jew setgħa oħra ta’ teħid ta’ deċiżjonijiet ħlief għall-adozzjoni tal-opinjonijiet, ir-rakkomandazzjonijiet, il-materjal ta’ gwida u r-rapporti tiegħu.