Artikolu 14 Kompożizzjoni tal-PRB

1.   Il-PRB għandu jkun magħmul minn seba’ membri, inkluż il-president tiegħu. Il-membri tal-PRB għandhom ikunu ċittadini tal-Unjoni jew ċittadini ta’ pajjiżi terzi li magħhom l-Unjoni tkun ikkonkludiet ftehim li skontu dawk il-pajjiżi japplikaw ir-regoli rilevanti tad-dritt tal-Unjoni fil-qasam tal-ġestjoni tat-traffiku tal-ajru u l-iskemi ta’ prestazzjoni u ta’ imposti. Il-mandat li ma jiġġeddidx tal-membri tal-PRB għandu jkun ta’ 5 snin.

2.   Il-membri tal-PRB, inkluż il-President, għandhom jinħatru abbażi tal-mertu u tal-ħiliet u l-esperjenza rilevanti għall-ġestjoni tat-traffiku tal-ajru, għas-servizzi tan-navigazzjoni bl-ajru jew għar-regolamentazzjoni ekonomika tal-industriji tan-network, f’konformità mal-kriterji tal-għażla u tal-eliġibbiltà definiti fl-att ta’ implimentazzjoni adottat f’konformità mal-Artikolu 20. Il-proċess tal-ħatra għal tali membri għandu jiżgura rappreżentanza bbilanċjata tal-kompetenza u l-għarfien espert kif ukoll tal-ġeneru u l-oriġini ġeografika.

3.   Il-Kummissjoni għandha, wara sejħa pubblika għal espressjoni ta’ interess, tistabbilixxi l-lista ta’ kandidati li għandhom ikunu membri, u l-President, tal-PRB li jikkonformaw mal-kundizzjonijiet stipulati fil-paragrafu 2.

Il-membri u l-President tal-PRB għandhom jinħatru mill-Kummissjoni minn dik il-lista, wara konsultazzjoni mal-Istati Membri u wara proċedura ta’ selezzjoni stabbilita abbażi tal-Artikolu 20.

4.   Il-Kummissjoni tista’ tistabbilixxi lista ta’ riżerva abbażi tal-lista msemmija fil-paragrafu 3, l-ewwel subparagrafu.

Membri li ma jibqgħux kapaċi jikkontribwixxu b’mod effettiv għall-ħidma tal-PRB, li jirriżenjaw jew li ma għadhomx jikkonformaw mal-kundizzjonijiet stipulati f’dan l-Artikolu għandhom jiġu sostitwiti minn persuni mil-lista ta’ riżerva, maħtura f’konformità mal-proċedura msemmija fil-paragrafu 3, it-tieni subparagrafu, għall-bqija tal-mandat ta’ dawk il-membri.

5.   Il-Kummissjoni għandha tinforma lill-Istati Membri bir-riżultati tas-sejħiet għal applikazzjonijiet u bil-listi msemmija fil-paragrafi 3 u 4.